Mbete Efezeri 4
4
1Kaŋaw mí a bi ké mi na vul mgbal ɓay Gaŋ tul feri riw, mi ƴo hew wuri ɓahri, í hi̧ siŋ sina woiri ɓá mah ke riŋ ɗina ké Ŋgerzah kan tul woiri ɓa sa̧w ye. 2Pór nzuk a suŋ suŋ gbam ke kusol a voh-u ɓa fe ké ƴo fal siŋ sina sa̧w nzuk yeri. Su̧hlaw ɓa fe ké ƴo fal iklaw tul haniri ɓil law sana. 3Kandɔk ké Tempuki hi̧ ku ƴo ke hani ɓa mbew, ku ta mun woyri ɓay kɔr ƴona woyri mbew kaŋ pi. Ku ŋga̧h law woyri ɓa kpuh-u kparaŋ kparaŋ ke sal ké ɓa ɗeŋ ké Ŋgermbay hi̧#4.3 Ɓay tu ɓay ɗeŋ Ŋgermbay ra, í ki̧ Mbete Efezeri 2.14-15,17.. 4Mun Ŋgermbay ɓa mbew, tem Ŋgermbay ké ɓa Tempuki ɓa mbew. Mbew ra mah ke ɗina ké Ŋgerzah ɗi wuri ɓa sa̧w ye, mí suki ké law woiri te tulu ra ɓa mbew. 5Gaŋ tul feri riw mbew, kanlaw mbew, batem mbew. 6Ŋgerzah mbew, a ye ke ɓa bah feri riw, ke ɓa tul feri riw, feri riw ƴo ɓay tul ye, ke ƴo ri ké gelri riw.
7Ké sakra wah-ay, a ge ge le Ŋgerzah kuŋ lawsuki hi̧ ni mah ke fe puhna Ŋgermbay ké-e leh hi̧ na. 8Sa̧wu mí mbete Ŋgerzah vbeh lewsa̧ ɓahri, ké-e hil si síɓa kaɓ ɓa Mbay, ke mgba nzukbaa ɓa mgbal, ke el wal suki hi̧ nzuk pirmatulri#4.8 Í mgba Mbete Siŋ (Psaumes) 68.19 tuh ke gel ki̧na-ay. Mbete Siŋ 68.19 ɓah ɓay tul Miƴori, mí Pɔl mgba tul Ŋgermbay Zezu leh ke tul Miƴori ké gel ki̧na-ay. Ke dim Ŋgermbay Zezu ke Miƴori a ye Ŋgerzah ɓa mbew yaŋ. Siŋay ɓah ɓay ŋgermu ké Ŋgermbay haw ti̧h ɓa Mbay tul mbayri.. 9Ke hil ra wa, yih ɓah ani munu le ? Ɓayu sɔk ɓahri se, ke ɗer gi tusiɓa kal si puh záhri mí ke el hil ƴo ɓa Mbay. 10A ye ké-e ɗer ra ɓa a ye gaŋ mí ke hil hi̧ mun ye ɓá ya̧ mun feri ɔh riw. 11A ye mí ke hi̧ nzukri pihna ɓoɗ ɓoɗ. Ke hi̧ nzuk a haniri ti̧h ɓa gun nzak pihna Ŋgermbay, a ɓoruri ti̧h ɓa gun nzak pihna Ŋgerzah, a ɓoruri ti̧h ɓa nzuk-ka-kah ɓaysuki lák mbay ye#4.11 Ku ɗi nzuk-ka-kah ɓaysuki ɓa évangeliste ke nzak faraŋse.. Nzuk a ɓoruri ɓa nzuk-kɔr sami#4.11 Ku ɗi nzuk-kɔr sami ɓa pasteur ke nzak faraŋse., a ɓoruri ɓa nzuk-firma nzukri ɓay Ŋgerzah. 12Ke hi̧ niri pihnari-aw ɓay kú so sa̧w nzuk Ŋgerzah mbaŋ woyri hi̧ ndɔk sa̧w Ŋgerzah tu pihna ké ɓay hi̧ mun Ŋgermbay ɓá hu̧h gaŋ ɓa vul kani Ŋgerzah. 13Ku ƴo laɓ pihna-aw hi̧ nzukri gbam ké kan law tul Ŋgermbay kpu̧ru ka̧h kú-u ƴo ke hani ɓa nzuk mbew ké si ke law mbew Ŋgermbay, ké si ke tuna kú-u tu gun Ŋgerzah kpu̧ru ka̧h kú-u ŋger ɓa nzuk pirmatul ké mun woyri leh ke mun Ŋgermbay ké ya̧ mun woyri ɔh gbam. 14Le náh na wuri ɓa gunri mba. Gunri ƴo hi̧ sam fe firma a suŋ suŋ kɔklɔ niri kandɔk kuna ke mbih ké kɔklɔ kumbon ma gini ma sa̧. Fe firma nzuk pirmatulri-awri ƴo rah nzukri ke kerlaw woyri kú-u lek ɓay hi̧ nzukri ɓá vbol. 15Mí nah si siŋ sina a ketina ɓil law sana dale, nah hú̧h ké ɓil feri gbam eŋ Ŋgermbay a ye ké ɓa tul. 16Ke ɓa sa̧w fe ké hi̧ kehrna mun yeri gbam mbu̧h ku̧ hani ɓa mun ké mbew. Gel-ɗom munri riw so hani so hani mah ke ŋgerna ké-e ŋger gelri mbew mbew gbam mah ŋgerna-u ŋgerna-u. Kandɔkaw mí mun Ŋgermbay ƴo gaŋ ma síɓa síɓa ɓil law sana ɓa vul kani Ŋgerzah.
17-18Kaŋ dale mi ƴo ɓah ɓay, mi ƴo te-teh ɓay hi̧ wuri ké nah ƴo ke Gaŋ tul feri riw. Í si siŋ sina ɓa sa̧wnzuk a ɓoruri mba. Kerɓay woyri na kpo̧k mí ku si keni sina, ké law woyri sih na nduŋ. Ɔkna Ŋgerzah tu niri ya, ku ɓa nzuk a kalari ɓay tul law kpuhna woyri ké hi̧ fe ké law woyri tu na va̧h. 19A woyri ra, law woyri lah sena hani ya. Ku hi̧ tul woyri si wɔrɔk ɓil sam fe laɓna a pipiri-uri ɓoɗ ɓoɗ ké mah nun Ŋgerzah ya. 20Mí a woiri le i tih ke Ŋgermbay kaŋ ya. 21I lah ɓay ké-e ɓah gaŋ. Mí fe firma ké i firma ra, ke ƴo ziŋ wuri kandɔk ké ketina ƴo mun Zezu. 22I tih ke Ŋgermbay, i firma-lur sa̧w mbuŋna woiri a tusiɓa ma fal kandɔk ta̧w gar kú-u lu kaŋ. I firma-lur sa̧w fe laɓna a lewsa̧-aw ké i si keni sina. Sa̧w mbuŋna woiri a lewsa̧-aw ɓa fe a puŋu ké puŋna-u si ke fe rɔkna ɗaka feri. 23Mí i firma hi̧ Tempuki sɔɓ kerɓay woiri ɓa foyu, 24mí i ndoh sa̧w woiri a foyu ra ɓa gar ndohna woiri ké i ndoh ke ketina sal in ké Ŋgerzah ŋga̧h ziŋ sa̧w ye ɓa záh woyri, ke ketina law a teh-u pi, sa̧w woiri ɓa nzuk pirmatul ké mah ke nzuk pirmatul ké Ŋgerzah laɓ.
25Sa̧wu mí kuŋɓay lu ké law woiri, nzak woiri ɓá ɓah ɓay ketina ke hani ɓay fe le, nah ɓa mbew ke haniri, sem wah mbew. 26Law woiri fa̧h wuri le, í laɓ keni suya ya, seh ɓá riŋ tulu ya. 27Dale í poŋ mahful hi̧ mbay záh tukala ɓá laɓ ɓay kan tul woiri ya. 28Nzuk riɓa ɓá rih riɓa mba. Wara le ké laɓ pihna ke ndɔk ye. Mí ke ta̧hma ye, ké ziŋ fe a ti̧h suk le, ké so keni nzuk a a̧yri ké fe zɔklɔ ziŋ niri. 29Kɔk ɓay a suŋ suŋ gbam ɓá ti̧h ke nzak woiri ya. Wara le ɓay a a̧yri ké ti̧h suk mí í ɓah le, nzukri ké lah ɓay ké i ɓah ra law woyri ɓá ziŋ ŋgerna. 30Dara mí í laɓ hi̧ law sena ɓá mgbaŋ law Tem Ŋgerzah a ye Tem lawpuki ya. A ye mí ke ɓa zezele fe ké Ŋgerzah vbeh kan mun woiri ɓa nzuku a ye ɓay nam ké feri gbam ké tusiɓa pi, ké nunmbam pi ké-e sel ké ndɔk hul ɓá ten mun.
31Sam suyari riw, í lu ké mun woiri ku̧ kpah kandɔk law a zuŋu, tí̧h wo̧ro, háŋ fa̧hna, ɓáh ke kusol a ŋgeru, ɓéɓ riŋ nzuk, gbamaw í lu ma fal. 32Í ti̧h suk hi̧ haniri, í ker seh haniri, í hi̧ law woiri sel kandɔk ké Ŋgerzah hi̧ law ye sel ké tul woiri ké i ƴo ke Ŋgermbay.
Currently Selected:
Mbete Efezeri 4: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
