Mbete Efezeri 3
3
1Ɓay tul lawsuki ké Ŋgerzah laɓ ziŋ na ra, a bi Pɔl mi ɓa mgbal Mbay Zezu ɓay tul woiri ké sa̧w woiri na ɓoɗ, mí nzukri mbih mi vul mgbal ɓayu. 2Ɓay pihna ké Ŋgerzah hi̧ mi ɓay mí ko tul lawsuki ye ké ta̧w woiri le, i lah ɓayu lah. 3Pihna-aw mah ke kerɓay ké Ŋgerzah mu̧h ké law ye, mí ke ten sa̧wɓayu hi̧ mi, mi ko. Mi vbeh ɓayu ndi̧ hi̧ wuri pol da. 4Mbete ké i ki̧ ra hi̧ i tu sa̧w goso fe tuna bi ɓay ten sa̧wɓay Ŋgermbay hi̧ wuri, i ko pi. 5Ŋgerzah hi̧ nzuk a lewsa̧ri ko ya. Mí aŋay, Tempuki ten sa̧wɓayu hi̧ nzukri ké Ŋgerzah lu niri ku̧ ɓoɗ ɓa gun nzak pihna ye ke gun nzak pihna Ŋgermbayri. A woyri ku ten sa̧wɓay Ŋgermbay ma kala hi̧ nzukri lah.
6Sa̧wɓay ké ten ma kala ɓahri, ɓaysuki hul Ŋgermbay hi̧ nzukri ké ƴo mbew ziŋ Ŋgermbay Zezu ɓa gun-ya̧ fe baah ke haniri, ɓa ra gun Izarayelri, ɓa ra sa̧wnzuk a ɓoruri#3.6 Ɓay tu ɓay mbú̧h hani sa̧wnzukri ɓa sa̧wnzuk mbew, í mgba Mbete Galaɗri 3.6-9 tuh ke gel ki̧na-ay.. Ku ɓa nzuk ké mbew ke haniri. Ku ɓa gunri ké ziŋ wahɓay ké Ŋgerzah wah ziŋ gun Izarayelri pi. 7Ɓaysuki hul Ŋgermbay ra, Ŋgerzah laɓ lawsuki ziŋ mi. Ke ŋger mi ke ŋgerna ye hi̧ mi ti̧h ɓa gun-laɓ pihna ɓaysuki ye. 8A bi gun a mah gelu ndi̧ ké sakra gun yeri, mí ke laɓ lawsuki ziŋ mi. Ke pih mi si ka-kah ɓaysuki hul Ŋgermbay hi̧ nzukri ké sa̧w woyri na ɓoɗ hi̧ ku mbu̧h ɓa sa̧w mbew, ɓa sa̧w in Ŋgermbay. Ɓaysuki ra na ndɔk Ŋgermbay ké na ɓa ah-u, ɓa fe ziŋna a luki ké nzuk mah tu gbu̧h-u ya. 9Ke pih mi si ten ɓayu ɓa teh-u hi̧ niri kú ko ani mí Ŋgerzah a ye nzuk-laɓ feri gbam lek ɓay hi̧ sa̧wɓay ké mu̧h ké law ye ke titilu da̧y ɓá ti̧h. 10Kaŋ dale ke hi̧ sa̧w in Ŋgermbay mí ɓa goso fe sɔkna ye hi̧ záhri ɓoɗ ɓoɗ gbam ko goso ru̧na ye, ɓa ra záh mbayri, ɓa ra záh-lak mbayri mí ku ko. 11Fe-u kal kandɔk ké-e lek ɓay laɓu ke sewu-aw sa̧. Ke laɓ pihna-aw ké tul Gaŋ wah a ye Mbay Zezu. 12Law ye Ŋgermbay ké ƴo mbew ziŋ Ŋgerzah mí hi̧ na, a wah ké nah ƴo mbew ziŋ ni ra mahful-si pol Ŋgerzah dan su̧hru na ŋgah hi̧ na. 13Sa̧wu mí-i ƴo goŋ wuri, koseh ké mi ko ɓay tul woiri ɓá ta̧h wuri ya. Koseh-ay ɓa fe ké hi̧ riŋ ɗina Ŋgerzah mgbe ké haŋsekle woiri.
14-15Ɓay tul lawsuki ké Ŋgerzah laɓ ziŋ na ra, mi huk ké pol ye bah feri gbam, a ye mí ke tu riŋ hi̧ feri gbam, ɓa ra feri ké nunmbam, ɓa ra sa̧wnzukri ké tusiɓa. 16-17Mi goŋ bah wah, a ye ké riŋ ɗina ye ɓa fe ziŋna a luki, ké hi̧ Tempuki ɓá ŋger tem woiri ke ŋgerna ye hi̧ Ŋgermbay ɓá kaɓ ɓil law woiri ke law sana ɓay kanlaw. 18-19Law sana ra ɓa fe ké ɓar sa̧w ɓa ɗih-u, ɓa mah sa̧w fe woiri. Mi goŋ ni kaŋ ɓay í ƴo ke huhrumun ɓay hi̧ ahna law sana-u, pehna-u, ɗihna-u, gaŋna-u gbamaw í mah mgba ma law woiri ziŋ sa̧w nzuk yeri hi̧ í tu law sana Ŋgermbay ké mba tul fe tuna nzukri mba-mba dale, feri gbam ké mun Ŋgerzah ɓá ya̧ mun woiri ɔh gbam pi.
20Riŋ ɗina ɓa a ye Ŋgerzah nzuk huhrumun a luki ké fe laɓna ye kal tul ɓayri gbam ké nah vbi ni, ké nah ker ka-kal. Ke ƴo laɓ mah ke ŋgerna ye. Ŋgerna-u, ke ƴo ŋger na keni. 21Riŋ ye mgbe le, mgbe ɓáy ké haŋsekle sa̧w in Ŋgermbay Zezu ziŋ ni. Riŋ ye mgbe sew ke sew.
Gelu munu !
Currently Selected:
Mbete Efezeri 3: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
