Mbete 2 Kɔrenteri 5
5
1Kandɔk ké nah ɓaŋ nun kan tul fe ké nun nzukri ko-ko ya ra nah tu ɓahri, nam ké vul a som siɓa ké pɔr tem wahri dir dale, nah ƴo ke vul a nunmbam, vulu na ɓa ŋgɔh. Nzuk pirmatulri mboh ya, sa̧wu ɓa Ŋgerzah. 2Aŋay ba, nah ƴo taw vul wah ké sa̧wu ɓa a nunmbam ra ɓá pɔr na. 3Ketina gaŋ, gelke vul wah a som siɓa dir le, vul a foyu ɓay pɔr na, nah ta kaɓ yȩku ya. 4Mí a wah ké tem wah kaɓ ɓil vul a som siɓa ɓáy ra, ɓayu yih tul wah kandɔk sukna ké kaɓ haŋ wah kaŋ. Nah taw ɓay kaɓ yȩku ya wara le, nah yih vul a foyu ɓá pɔr na ɓay hi̧ vul a ɔkna-u ɓá tu̧h vul ké ɓay pú-puŋ ra malak. 5Nzuk ké ɔh lek suki-aw riw ɓay tul wah ɓa Ŋgerzah. Ke hi̧ na Tempuki ɓa fe-ŋga̧h wahɓay ye. 6Kaŋ dale kpatara nah ko kona siŋriŋ dan hȩkme. Nah tu ɓahri se, nah kaɓ ɓil mun hayay le, nah ɗi-ɗih ke vul wah ké ta̧w Gaŋ tul feri riw pi. 7Ɓayu ké nzuk kan law tul Ŋgermbay le, kanlawu mí ƴo sɔk ni siŋ sina ké-e si, ta ɓa nun ye mí sɔk ni siŋ sina-u ya. 8Kaŋ mí nah ƴo ko kona siŋriŋ, nah ƴo ke law rihna ɓay poŋ gel kaɓna a mun hayay ɓay si káɓ ta̧w Gaŋ tul feri riw.
9Sa̧wu mí nah kaɓ ɓil mun hayay mini nah ti̧h ke ɓilu kara nah taw mun ɓay hi̧ law ye ɓá rih. 10Ɓayu ké gbam wah nah ƴó gel kuŋ salɓay Ŋgermbay ɓay hi̧ a ge ge ɓá ziŋ kpaŋndɔk fe ké-e laɓ ke mun hay ye ra, ɓa ra fe laɓna a suki, ɓa ra fe laɓna a kɔkɔ-u kara ke zíŋ kpaŋndɔku.
11Kandɔk ké nah tu hȩk Gaŋ tul feri riw tu-tu dale, nah ƴo hi̧ law nzukri ɓá mgba ɓayu pi. Ɓay wah te-teh ké nun Ŋgerzah. Mi ker ɓahri se, ké nun woiri kara ketina wah te-teh pi. 12Nah sɔk mun wah hi̧ wuri ɓáy ya. Le nah ƴo ten sa̧wɓay vbá̧ haŋ woiri ɓay tul wah hi̧ wuri dale, í mah yih nzak nzukri ké nda giri tul fe ké nun nzukri ko-ko, mí fe a ɓil law le, ku nda giri tulu ya. 13Gelke nah ɓa kɔkɔ le, kɔkɔ wah ra ɓay tul Ŋgerzah munu. Nah ru̧-ru̧ bale, nah ru̧ ɓay tul woiri. 14Law sana Ŋgermbay sɔkrɔ na hi̧ nah tu ké ɓil law wah ɓahri se, nzuk mbew hu ɓay tul nzukri gbam kaŋ dale, gbam woyri ku hu pi. 15Kandɔkaw mí ke hu ɓay tul nzukri gbam ɓay hi̧ ɔkna ye hi̧ nzuk yeri hi̧ káɓ tukala woyri na ɓay tul woyri ya. Wara le káɓ tukala nzuk yeri na ɓay tul ye ké-e hu, ké-e ti̧h ke pa̧ymun a foyu ɓay tul woyri.
16Kaŋ mí nah ta ko nzuk ke kerɓay a tukala ya. Lewsa̧ ra nah ko Ŋgermbay ke kerɓay a tukala, mí aŋay bale, nah ko ni kaŋ mba. 17Kaŋ mí nzuk ké ƴo ziŋ Ŋgermbay le, ɓa nzuk pirmatul a foyu wara. Fe a ta̧wuri kal da. Mú ko, feri ti̧h ɓa a foyu. 18Dale sa̧w fe a foyuri gbam ur ké ta̧w Ŋgerzah. Ke mgba nzak nzaw ziŋ na ɓay Ŋgermbay, mí ke el ndoh pihna-mgba nzak nzaw kan ndɔk wah. 19Sɔk ɓahri se, feri gbam ké Ŋgerzah laɓ ra, nunmbam, tusiɓa, nzukri, gbam ke mgba nzak nzaw ziŋ niri ɓay Ŋgermbay hi̧ ke ki̧ suya woyri ya. Mí ke ɓaŋ ɓay-mgba nzak nzaw ra ndoh nzak wah. 20Kaŋ dale ɓay tul Ŋgermbay mí nah ɓa gun nzak pihna ké-e pih ke riŋ ye. Ké fál ta̧w wah le ɓa Ŋgerzah mí ƴo hew wuri ke nzak pihna wah-ay. Nah ƴo goŋ wuri ke riŋ Ŋgermbay, í mgba nzak nzaw ziŋ Ŋgerzah mgba. 21A ye ké-e tu suya ya, mí ke hi̧ suya wah mgba tul ye ɓay hi̧ náh ƴo ziŋ Ŋgerzah ɓa záh wah, a wah ké nah ƴo ziŋ ni Ŋgermbay.
Currently Selected:
Mbete 2 Kɔrenteri 5: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
