Mbete 2 Kɔrenteri 6
6
1Kandɔk ké nah ɓa bɔh pihnari ra, nah ƴo hew wuri, í mgba lawsuki Ŋgerzah ké i ya̧ ra ɓa fe ndikpo ya. 2Ɓayu ké lewsa̧ Ŋgerzah ɓahri, ké ɓil sew law rihna bi, mi láh mu ké mu ɗi mi, ké ɓil nam-ya̧ nzukri-aw mi tén mu ke ɓil hul#6.2 Ɓayay na ɓil Mbete Esaïe 49.9..
Mú ko, aŋay nah ƴo ɓil sew law rihna ra. Mú ko, guri nah ƴo ɓil nam-ya̧ nzukri ra. 3Nah sa laɓ suya mbew hi̧ law nzukri ɓá ɓeɓ ya rɔkɔ pihna-mgba nzak nzaw ɓá ziŋ zɔmna. 4Wara le nah sɔk mun wah ɓa gun-laɓ pihna hi̧ Ŋgerzah ɓil sam feri ɓoɗ ɓoɗ gbam,
ɓil su̧hlawri, ɓil kosehri, ɓil fe zɔklɔri ké kal tul, ɓil fe-mbaŋ lawri, 5ɓil vba̧nari, ɓil vul mgbalri, ɓil urna ké nzukri ur ku̧ tul wah, ɓil ta̧hma pihnari, ɓil káɓ ke nun suŋri ɓa ŋgi̧-u, ɓil káɓ ɓa ɗaka,
6ɓil lawpuki, ɓil fe tuna, ɓil iklaw, ɓil láɓ lawsuki, ɓil ƴona wah ke Tempuki, ɓil law sana ké mu̧h ɓay ya, 7ɓil ɓay a ketina, ɓil huhrumun Ŋgerzah.
Nah sɔk mun wah ɓa gun-laɓ pihna hi̧ Ŋgerzah. Nah ƴo ke fe remri ké ndɔk lakna wah ke ndɔk kperu wah pi. Fe remuri ɓa sal in Ŋgerzah. 8Nah ƴo ke riŋ ɗina ke riŋ-se su̧hru, nah ƴo ke riŋ farna ke riŋ pirna.
Nzukri ko na ɓa nzuk nzak rɔkna, mí nah ƴo ɓah ketina.
9Ku ko na ɓa nzukri kú-u tu niri ya, mí ku tu na te-teh.
Ku ko na ɓa hulri, mí í ko, nah ƴo ke ɔkna.
Ku ko na ɓa gun-ya̧ vba̧nari, mí nah hu ya.
10Ku ko na ɓa nzuk law senari, mí nah ƴo ke law rihna kpatara.
Ku ko na ɓa ko̧hkori, mí daɓa nzukri ƴo ziŋ suki ké ta̧w wah.
Ku ko na ndɔk ndikpo, mí feri gbam ɓa fe wah.
11A woiri Kɔrenteri, nah ɓah ɓay ɓa teh-u hi̧ wuri. Law wah kara mgbur ŋgah ɓay tul woiri pi. 12Nah mu̧h wuri law sana wah ya. A woiri gaŋ mí i mu̧h na law sana woiri. 13Mi ƴo ɓah ɓay hi̧ wuri kandɔk gun biri. Í mgbur law woiri ɓa ah-u hi̧ na kandɔk a wah ké nah mgbur law sana wah hi̧ wuri kaŋ. 14Nzukri ké saŋ Ŋgermbay, í mgba ma̧ra ziŋ niri ya. A fe mí ɓay mbu̧h nzukri ké ƴo mbew ke Ŋgerzah ɓa záh woyri ke nzukri ké poŋ Ŋgerzah le ? A fe mí ɓay mbu̧h gel tehna ke tirima le ? 15Láh hani fe mí ɓay ƴo ké sakra Ŋgermbay ke nzukbaa ye le ? A fe mí ɓa fe-mbu̧h nzuk ké ƴo ke Ŋgermbay ke nzuk ké saŋ Ŋgermbay le ? 16A fe mí ɓay mbu̧h gel kani Ŋgerzah ke gel kani záhri le ? A wah nah mbu̧h ɓa gel kani Ŋgerzah ké ɓa Ŋgɔhnzuk kandɔk ké-e ɓah lewsa̧ ɓahri : « Mi ɗéh puh ké law woyri, mi há̧rma ziŋ niri. Mi ná ɓa záh woyri, a woyri ba, ku ná ɓa sa̧w bi#6.16 Ɓayay na ɓil Mbete Lévitique 26.11-12, Mbete Ézéchiel 36.26-27, Mbete Jérémie 31.33.. » 17Kaŋ le í ti̧h ké sakra woyri, í kehr siŋ sina woiri ɓoɗ.
Gaŋ tul feri riw wahɓay ɓahri se : Fe ké mah nun bi ya le, í za ya. A bi gaŋ mí-i yá̧ wuri ndɔk seɗe#6.17 Ɓayay na ɓil Mbete Esaïe 52.11-12.. 18Mi ná ɓa bah woiri. A woiri ba, i ná ɓa gun biri#6.18 Ɓayay na ɓil Mbete 2 Samuel 7.14.. Gaŋ tul feri riw Nzuk huhrumun a luki ɓah kaŋ.
Currently Selected:
Mbete 2 Kɔrenteri 6: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
