Mbete 2 Kɔrenteri 4
4
1Sa̧wu mí pihna ké Ŋgerzah ndoh ndɔk wah ra nah ta̧h tulu ya. Pihna sal in a foyu ra si ke law in ké-e laɓ ziŋ na. 2Wara le nah ƴo to ɓay a mu̧h-uri ɓa ɗih-u mak ké ta̧w wah, fe laɓna-uri ɓa fe-se su̧hru. Nah mbi siŋ sina ru̧na a tukala ya, nah ra̧h ɓay Ŋgerzah ya. Wara le ketina mí nah ten ma gel a teh-u. Ké nun Ŋgerzah nah ƴo sɔk mun wah ké nun nzuk pirmatulri gbam hi̧ law woyri tu ɓayu. 3Mí gelke ɓaysuki hul Ŋgermbay ké nah ka-kah-u ra mu̧-mu̧h le, mu̧-mu̧h ké ta̧w nzukri ké ƴo zina. Gar pɔr nun woyri. 4Záh tukala ra̧h kerɓay nzukri ké deh nzak pihna Ŋgerzah rɔkɔ ku ko ndu̧yna ɓaysuki. Ɓaysuki ra ɓa riŋ ɗina Ŋgermbay a ye ké-e ba Ŋgerzah ɓa fe tem mun ye. 5Nah ka-kah ɓay riŋ wah ya. Wara le nah ka-kah ɓay riŋ ɗina Ŋgermbay Zezu Gaŋ tul feri riw. Mí nah ɓa mgbal woiri ɓay ye Zezu.
6Ɓay fe le a ye Ŋgerzah ke ɓahri se, gel tehna ɓá teh ké ɓil tirim#4.6 Ɓayay ziŋ ɓil Mbete Sa̧w fe 1.3.. Ŋgerzah mí hi̧ gel teh ké ɓil law wah hi̧ nah tu gel tehna ye ké ndu̧y ké nun Ŋgermbay tu-tu. 7Mun wah mah hani ke iri mí mbah ke fe ziŋna-aw ɓay hi̧ huhrumun ké ŋgi̧ kal ŋgoŋaw, sa̧wu ɓa Ŋgerzah, ta ɓa fe ké ur ké ta̧w wah ya.
8Nzukri ƴo o̧kro na, mí ku vbar na ya.
Kerɓay wah zi mí law wah to ya.
9Ku faŋ bol wah si laɓ na koseh, mí nah ƴo ke hȩk wah ya.
Ku ndih na ɓu siɓa, mí nah ziŋ ɓeɓna ya.
10Nah ƴo ya̧ hul Zezu ké mun wah kpatara ɓay hi̧ ɔkna ye kara ɓá ten mun ké mun wah pi. 11A wah ké nah ɓa nzukri ké ƴo ke ɔkna, ku ɓaŋ na ndoh ndɔk hul kpatara ɓay tul Zezu ɓay hi̧ ɔkna ye ɓá ten mun ké pa̧ymun wah a puŋu-ay. 12Kaŋ mí hul ké ƴo laɓ mun wah a puŋu ko seh ra ɓa ɔkna ké ta̧w woiri. 13Mí nah ƴo ke Tem mbew ké ƴo fal kanlaw tul Ŋgermbay kandɔk kú-u vbeh lewsa̧ ɓahri, mi ya̧ ɓayu kan law bi da, sa̧wu mí-i ƴo ɓah-ay#4.13 Ɓayay na ɓil Mbete Siŋ 116.10.. A wah kara nah ya̧ ɓayu kan law wah da. Sa̧wu mí nah ƴo ɓah-ay. 14Nah tu ɓahri se, a ye Ŋgerzah ké-e ten Gaŋ tul feri riw a ye Zezu ke pa̧ymun a foyu ra, ke tén na ziŋ Zezu ke pa̧ymun a foyu pi, ke hí̧ na wuri, nah gi ƴo ndiseŋe ziŋ ni. 15Ɓayu ké kosehri gbam ké ziŋ na ra, ziŋ na ɓay tul woiri mí hi̧ daɓa nzukri el ke tumbɔl ɓay lawsuki Ŋgerzah. Tumbɔl ra mgbe goɗi goɗi ké nzak nzukri mí seh ma pol pol hi̧ riŋ ye mgbe keni.
16Sa̧wu mí nah ta̧h ya. Mun hay wah ɓe-ɓeɓ kara tem wah na ɓa a foyu nam ke nam. 17-18Ɓayu ké koseh ké nah ƴo ɓilu-ay ra yih ya tafalaw ta mgba tuh ke baw riŋ ɗina ké na ɓa ŋgɔh ya. Koseh-awri mí ƴo laɓ hi̧ na nah hu̧h ɓil riŋ ɗina ké ŋgi̧-ŋgi̧ ra mí ƴo laɓ hi̧ fe ké nun nzukri ko-ko ra nah ɓaŋ nun kan tulu ya. Le fe ké nun nzukri ko ya mí nah ɓaŋ nun kan tulu. Fe ké nun nzukri ko-ko ra ƴo ɓay sa̧wseh ndi̧ kaŋto, mí fe ké nun nzuk ko ya ba, ƴo ɓa ŋgɔh.
Currently Selected:
Mbete 2 Kɔrenteri 4: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
