Numelo 14
14
Agatuu a le kakai : 40 fetuu i le toafa
1Na siki ake loa le leo o le kakai katoa, o tagi ; ti na lotou fetagisi loa i le po katoa. 2Na lalau loa fanau fuli o Iselaele kia Moisese mo Alone, o pati : Felaaki ake na motou mate i le fenua o Esipito ! Felaaki ake foki na motou mate i le toafa ! 3Kolea kua ave ai matou e le Eteleno ki le fenua leinei, ke motou mamate ai i le tau, ti ke ave loa omatou avaga mo omatou fanau o fakapopulai ! Pe leaise malie ake kia matou ke motou toe liliu ki Esipito ? 4Ti na lotou fonofono loa ia latou, o pati : Tou fakanofo loa se pule, ti tou toe liliu loa ki Esipito.
5Na tulolo loa Moisese mo Alone o fakatuu o la ulu ki le kele, i mua o le kakai katoa o Iselaele. 6Ti ko Sosue, vosa o Nune, mo Kalepo, vosa o Sefune, ia latou fuli ala na tio i le fenua, na sae ia loa ola kofu, 7ti na la masau loa ki le kakai katoa o Iselaele, o pati : Ko le fenua leia na motou takai o tioi, ko se fenua malie ai. 8Kapau e loto malie le Eteleno kia tatou, ti e fakaulu loa e ia tatou ki le fenua leinei, ti e soli mai loa e ia le fenua leinei kia tatou : Ko se fenua a ia e sali ai le sua manu mo le sua meli. 9Ko leia fua, ke aua na kotou agatuu ki le Eteleno ti ke aua na kotou i ki le kakai o le fenua lena, talie e tou kai loa latou i se maaga e tasi. Kua leaise malu fua leia ke lotou fakamalumalu ai, kae e nofo le Eteleno mo tatou, aua na kotou i kia latou.
10Na masau loa le kakai katoa ke tuki fatui laua ke mate, kae fokifa kua sa le kololia o le Eteleno i aluga o le falela tapu, i mua o fanau fuli o Iselaele. 11Ti na pati loa le Eteleno kia Moisese : E kaku loa kiafea le fakamamae o loku loto e le kakai leinei ? E oki loa afea lana tuigataa kiate au, logo ai a fakamailoga fuli o loku mafimafi ala kua kau fakatio a ia ki ai ? 12E kau tautea loa a ia ki se masaki veli, ti e kau maumaui loa a ia ; kae e kau fai loa kiate koe se puleaga leia e lasi ake loa mo makeke ake loa iate ia.
Kole a Moisese
13Na pati loa Moisese ki le Eteleno : E logo loa ki ai le kau Esipito, leia na iloa ia ko lou lima atamai leia na fakamavae ia le kakai leinei mei lolatou fenua, 14ti e lotou fakamatala loa a ia ki le kakai o le fenua leinei. Talie kua lotou iloa ko koe, ko le Eteleno, e ke nofo mo lou kakai ; ti e ke sa mata kiate ia, a koe, ko le Eteleno ; ti e tuu lou ao iate ia ; ti e ke saele i ona mua i le ao i se pou afu, mo le pouli i se pou afi. 15Kapau e tamate loa le kakai leinei ofaipe se tagata e tasi, e pati loa puleaga fuli ala na logo masau kiate koe : 16Na leaise mafai loa e le Eteleno ke ave e ia le kakai leinei ki le fenua leia na fakapapau e ia ke soli kiate ia : koia leia kua tamate ai e ia a ia i le toafa. 17Koia e kau kole atu ai kiate koe, Eteleno, ke ke fakasa le lasi o lou mafimafi, o mulimuli ki le nea leia na ke fakasa kia matou : 18E kataki fualoa le Eteleno, ti e apele a ia i le manava alofa, ti e fakamolemole e ia a agasala mo patigataa ; kae e leaise fakatonuia e ia le tagata agasala, ti e tautea e ia a agasala o tamana ki vosa o kaku ki le tolu mo le fa o tautupu. 19Eteleno, fakamolemole ki le sala o lou kakai o mulimuli ki le lasi o lou agamalie, ofaipe lau fakamolemole tuumau kiate ia talu mei Esipito o kaku mai ki leinei.
Fakamolemole a le Eteleno
20Ti na masau loa le Eteleno kia Moisese mo Alone, o pati : E kau fakamolemole, ofaipe lau kole. 21Kae e kau mauli ! ti e fakaapele loa e le kololia o le Eteleno le malama nei katoa ! 22Ko latou fuli ala na tio ki loku kololia mo fakamailoga ala na kau fai i Esipito mo le toafa, ala kua asiasii ia au o tua kau agafulu o kaku mai ki le aso nei, talie na leaise lotou fakalogo ki loku leo, 23e leaise lotou tio loa ki le fenua leia na kau fakapapau ki olatou tamana ke soli kia latou ; io, e leaise lotou tio loa ki ai, latou fuli ala na tiaki ia au. 24Kae ko laku tagata fakasausau ko Kalepo, talie na nofo iate ia se laumalie kese, ti na mulimuli katoa a ia i loku ala, e kau fakaulu loa a ia ki le fenua leia na ano ki ai, ti e maua loa a ia e lona sakoga. 25Na nofo le kau Amaleke mo le kau Kanaane i le vaivailiua. Apogipogi, kotou maliu loa, ti kotou ano loa ki le toafa, i le ala ki le tai Kula.
26Na masau loa le Eteleno kia Moisese mo Alone, o pati : 27E kaku loa kiafea laku tuku le kakai agaveli leinei ke lalau kiate au ? Kua kau logo ki lalau o vosa o Iselaele ala na fai kiate au. 28Pati kia latou : E kau mauli ! e pati le Eteleno, e kau fai loa o mulimuli ki akoutou masau ala na logo ki ai oku taliga. 29E kotou mamate loa i le toafa leinei. Ko koutou fuli ala na kau i le tosi kakai, ala kua fetuu kau lua o fai ki aluga, ti na lalau kiate au, 30e leaise kotou ulu loa ki le fenua leia na kau fakapapau ke fakanonofo ai koutou, gato fai kia Kalepo, vosa o Sefune, mo Sosue, vosa o Nune. 31Ti ko akoutou fanau liliki, ala na kotou pati : E lotou liliu loa ko le nea kai a le fili malo ! e kau fakaulu loa latou ki ai, ti e lotou iloa loa le fenua leia kua kotou aga o tiaki. 32Io, e kotou mate loa i le toafa leinei ; 33ti e eva loa okoutou fanau i fetuu e kau fa i le toafa, ti e lotou amo loa le tua o akoutou agatuu, o kaku ki lokoutou mamate fuli i le toafa. 34Na kotou tioi le fenua i aso e kau fa, e kotou amo loa le mamae o akoutou agaveli i fetuu e kau fa, ko le fetuu e tasi ki le aso e tasi. Ti e kotou iloa ai loa le veli o le agatuu kiate au. 35Ko au, ko le Eteleno, kua kau masau ! Ti e kau fai maoki loa le nea lena ki le kakai agaveli leinei, leia kua fakatasi o fakafesagai mai kiate au. E lotou mamate fuli loa i le toafa.
36Ko tagata ala na kakau e Moisese ke ano o tioi le fenua, ti na toe liliu ake loa o lauveli ki le fenua ti mo fakalagai ia le kakai ke lalau kia Moisese, 37ko tagata ana na lauveli ki le fenua na mamate loa : na taai loa latou e le Eteleno ki se masaki veli. 38Na gato loa kia Sosue, vosa o Nune, mo Kalepo, vosa o Sefune, na mauli loa i tagata ala na ano o tioi le fenua.
Toe pati gataa a le kakai
39Na fakasa loa e Moisese a folafola ana ki fanau fuli o Iselaele, ti na mamae lasi ai le kakai i ai. 40Na lotou tutuu ake loa i le mafoata o pale ki le tumutumu o le mauga, o pati : Kua motou agasala ! Kae ko leinei kua motou tokamalie ke motou pale ki le ganea leia na pati ki ai le Eteleno. 41Na pati loa Moisese : Kolea e kotou maumaui ai le fakatotonu a le Eteleno ? E leaise manuia loa le nea lena kia koutou. 42Ke aua na kotou pale ! talie e leaise nofo le Eteleno mo koutou. E tamate loa koutou e okoutou fili. 43Talie ko le kau Amaleke mo le kau Kanaane e nonofo i lena, i okoutou mua ; e kotou mamate loa i le tau talie kua kotou titua ki le Eteleno, ti e leaise ano loa le Eteleno mo koutou. 44Kae na lotou patigataa loa, o pale ki le tumutumu o le mauga ; kae na leaise mavae le aleka o le fakamaoki o le Eteleno mo Moisese i loto malie o le nofolaga. 45Ti na ifo ake loa le kau Amaleke mo le kau Kanaane, ala na nonofo i le mauga lena, o tamate latou ti mo kapu latou o kaku ki Olama.
Currently Selected:
Numelo 14: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
