Numelo 13
13
Esipio e kau agafulu tupu lua
1Na masau loa le Eteleno kia Moisese, o pati : 2Kakau loa ni tagata ke ano o tioi le fenua ko Kanaane leia e kau soli ki fanau a Iselaele. Kotou filifili loa se fa tagata i faasiga taki tasi o olatou tamana ; ko latou ko ni pule fuli loa. 3Na kakau loa latou e Moisese mei le toafa o Palani, o mulimuli ki le fakatotonu a le Eteleno : ko tagata fuli ana ko ni pule o fanau a Iselaele.
4Ko nei olatou igoa : Ki le faasiga o Lupeni : ko Samua, vosa o Sakule.
5Ki le faasiga o Simeone : ko Sapate, vosa o Oli.
6Ki le faasiga o Suta : ko Kalepo, vosa o Sefune.
7Ki le faasiga o Isakale : ko Sikuale, vosa o Sosefo.
8Ki le faasiga o Efalaimi : ko Sosue, vosa o Nune.
9Ki le faasiga o Pesamino : ko Paleti, vosa o Lafu.
10Ki le faasiga o Sapulone : ko Katiele, vosa o Soti.
11Ki le faasiga o Sosefo, mo le faasiga o Manase : ko Kati, vosa o Susi.
12Ki le faasiga o Tane : ko Amiele, vosa o Kemali.
13Ki le faasiga o Asele : ko Setuli, vosa o Misaele.
14Ki le faasiga o Nefetali : ko Napi, vosa o Vofesi.
15Ki le faasiga o Kate : ko Keuli, vosa o Maki.
16Ko igoa ana o le kau tagata leia na kakau e Moisese ke ano o tioi le fenua o Kanaane. Na tuku loa e Moisese kia Ose, vosa o Nune, le igoa ko Sosue.
17Na kakau loa latou e Moisese ke ano o tioi le fenua o Kanaane. Na pati loa a ia kia latou : Kotou pale loa i leinei, i le ala o le Saute, ti kotou pale loa ki le mauga. 18Kotou sivisivi loa le agaaga o le fenua, mo le kakai leia e nofo i ai, pe makeke pe gagae, pe toka api pe toka teiki ; 19pe feaki le fenua leia e lotou nonofo ai, pe malie pe veli ; pe feaki a kolo ala e lotou nofo ai, mo nofolaga, mo kolo tau. 20Pe feaki le kele, pe malie pe veli, pe mauli ai ni laakau pe leai. Kotou loto toa. Kotou too loa ni fua o le fenua o aumai. Ko le temi lena o uluaki fua o le vite.
21Na lotou pale loa, ti na lotou tioi loa le fenua, o kamata mei le toafa o Sini o kaku ki Leopoti, i le uluaga o Amati. 22Na lotou ulu loa ki le potu Saute ti na lotou ano loa o kaku ki Epelone, leia na nonofo ai a vosa o Anake ko Asimani, mo Sesai, mo Talamai. Na laga Epelone i ni fetuu e fitu i mua o le laga o Tesoane i Esipito. 23Na lotou ano loa o kaku ki le vaitafe o Esikoli, ti na lotou tuuti loa i ai se laa vite mo ona fui fulumeto, leia na amo loa e se toka lua ki se laakau ; ti na lotou toe too foki mo ni fuai kelenati mo ni fuai fiki. 24Na tuku loa ki le potu fenua lena le igoa ko le vaivailiua o Esekoli, o tupu ko le fui fulumeto leia na tuuti i ai e le kau Iselaele.
Fakamatala a le kau esipio
25Na lotou toe liliu loa i le oki o le fakatele i le kau fa aso. 26I lalatou kaku ake, na lotou ano loa kia Moisese, mo Alone, mo le kakai katoa o Iselaele, i Katesi i le toafa o Palani. Ti na lotou fakamatala loa kia latou a nea fuli ala na lotou tio ki ai, ti na lotou fakatio loa latou ki fua o le fenua.
27Ko leinei le nea leia na lotou fakamatala loa kia Moisese : Na motou ano ki le fenua leia na ke kakau matou ki ai. E maoki ai ko se fenua a ia e apele i le sua manu mo le sua meli, ti ko nei ona fuai laakau. 28Kae e makeke le kakai leia e nofo i le fenua lena, ti e lalasi a kolo, ti e takatakai latou ki ni a fatu makeke. Na motou tio foki i ai ki ni fanau a Anake. 29E nofo le kau Amaleke i le saute o le fenua. E nofo le kau Iti, mo le kau Sepusi, ti mo le kau Amole i le mauga. E nofo le kau Kanaane i le mata tai mo kauvai o le Solotane.
30Na fakagato loa e Kalepo a lalau ala na kamata fai loa e le kakai kia Moisese. Na pati loa a ia : Ke tou ano nei o too le fenua ma tatou, talie e tou malo loa ! 31Kae na pati loa le kau tagata ala na ano mo ia : E leaise mafai ke tou ano o taui le kakai lena talie e lotou makeke lasi ake ia tatou. 32Ti na lotou kamata lauveli loa ki le fenua leia na lotou ano o tioi. Na lotou pati loa : Ko le fenua leia na matou taka ai, o tioi, ko se fenua leia e tamate ia latou ala e nonofo i ai ; e tagata lalasi fuli le kakai katoa leia na motou tio ki ai. 33Na motou tio foki i ai ki ni tagata lalasi fakaii, ko vosa o Anake : I lamatou tio na motou fai kia latou pe ni seseivaka, ti na toe felaaki foki lalatou tio kia matou.
Currently Selected:
Numelo 13: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
