Numelo 15
15
Lekula ki sakilifisio
1Na masau loa le Eteleno kia Moisese, o pati : 2Masau ki fanau a Iselaele, o pati kia latou : Ka kotou ulu loa ki le fenua leia e kau soli kia koutou ke kotou fakatuu ai okoutou nofoaga, 3e kotou momoli loa ki le Eteleno ni sakilifisio tutu katoa e le afi mo ni sakilifisio fakafetai, pe ki le fakasoko o se fakapapau, pe i le loto malie, pe i aso fakafiafia. E kotou filifili loa ki sakilifisio ana se pipi tagata, pe ko se ovi, pe ko se koti fafine, ti e kau tali malie loa le afu manogi o sakilifisio ana, ko au ko le Eteleno. 4Ko leia e fai ia loa lana moliga ki le Eteleno e ave loa e ia se moliga nea kai ko kilo falina e tolu ala kua lusi fakatasi mo se liti lolo e tasi mo se vaelua, 5ti e ke fai loa se lipasio ki se liti vino e tasi mo se vaelua ki akeno fuli ala e momoli loa i se failaulau pe ko se sakilifisio fakafetai. 6Ki se ovi tagata, e ke ave loa ni kilo falina e ono ala kua lusi fakatasi mo ni liti lolo e lua, 7ti e ke fai loa mo se lipasio ki ni liti vino e lua, ofaipe se moliga leia e afu manogi ki le Eteleno. 8Ti kapau e ke momoli se pipi tagata muli, pe ki se failaulau, pe ki se sakilifisio ki se fakapapau, pe ki se sakilifisio fakafetai ki le Eteleno, 9E momoli loa se moliga nea kai, mo le pipi tagata muli, ko ni kilo falina e iva ala kua lusi fakatasi mo ni liti lolo e tolu, 10ti e ke fai loa se lipasio ki ni liti vino e tolu : ko se sakilifisio tutu katoa e le afi, ti e afu manogi a ia ki le Eteleno. 11E fai fenaaki loa ki pipi tagata taki tasi, mo ovi tagata taki tasi, mo akeno taki tasi, ti mo koti tagata liliki taki tasi. 12O mulimuli ki le lasi o manu, e kotou fai fenaaki loa ki manu taki tasi, o fakatatau ki lolatou lasi. 13E fai fenaaki loa e fanau fuli a Iselaele, mo ka lotou momoli loa ni sakilifisio tutu e le afi, ko se nea a ia e afu manogi ki le Eteleno. 14Kapau e momoli e se matapule leia e nofo ia koutou, pe ko se tasi leia kua lau tautupu lona famili i lokoutou fenua, se sakilifisio tutu e le afi, ko se nea manogi malie ki le Eteleno, e momoli loa e ia a ia ofaipe koutou. 15Ko se lekula loa e tasi ki le fakatasi katoa, kia koutou mo le matapule leia e nofo ia koutou ; ko se lao loa lena ki okoutou tautupu fuli ki muli. E tatau loa kia koutou mo le matapule, i mua o le Eteleno. 16E i ai loa se lao e tasi mo se fakatotonu e tasi kia koutou mo le matapule leia e nofo ia koutou.
Moliga o uluaki fa pane
17Na masau loa le Eteleno kia Moisese, o pati : 18Masau ki fanau a Iselaele ; ti ke pati loa kia latou : Ka kotou kaku loa ki le fenua leia e kau fakaulu loa koutou ki ai, 19ti ka kotou kai loa le pane o le fenua lena, kotou too loa se moliga ki le Eteleno. 20Kotou siki loa se fa keke, ko uluaki fua o lokoutou falina foou leia kua fakapaapaa ; e kotou ave loa a ia ofaipe le moliga leia e too mei le ganea sasa fulumeto. 21E kotou too loa ki le Eteleno se moliga o uluaki fua o lakoutou falina kua fakapaapaa, i temi ka au.
Sakilifisio ki agasala e fai fuanoa
22Kapau e kotou agasala loa i le fai fakafuanoa, o leaise kotou fai loa a fakatotonu fuli ala na fakailo e le Eteleno kia Moisese, 23mo nea fuli ala na fakatotonu kia koutou e le Eteleno ia Moisese, mei le aso leia na tuku ai e le Eteleno ana fakatotonu kia koutou mo okoutou tautupu fuli ki muli ; 24Ti kapau na agasala kae na leaise iloa, e momoli loa e le fakatasi katoa se failaulau ki se pipi tagata muli, ko se nea manogi malie a ia ki le Eteleno, mo lona moliga falina, mo lona lipasio, ti mo se koti tagata ki le sakilifisio o le fakamalie. 25E fai loa e le tagata faisakilifisio le fakamalie ki le fakatasi o fanau fuli a Iselaele, ti e fakamolemole loa kia latou ; talie na lotou agasala fakafuanoa, ti kua lotou ave lalatou moliga, ko se sakilifisio tutu e le afi ki le Eteleno ti ko se vikitima fakamalie i mua o le Eteleno, o tupu ko le agasala leia na lotou fai fakafuanoa. 26E fakamolemole loa ki le fakatasi katoa o fanau a Iselaele ti mo le matapule leia e nofo ia latou, talie na agasala fakafuanoa le kakai katoa.
27Ti kapau ko se tagata toka tasi leia na agasala fakafuanoa, e momoli loa e ia se koti fafine fetuu tasi ki le sakilifisio fakamalie. 28E fai loa e le tagata faisakilifisio le fakamalie ki le tagata lena na fai ia le agasala fakafuanoa i mua o le Eteleno ; ti ka oki loa lana momoli le sakilifisio o le fakamalie, ti e fakamolemole loa kiate ia. 29Ko le lekula lena e tatau loa kia latou fuli ala e fai ia se agasala fakafuanoa, ki le kau Iselaele mo le kau matapule ala e mauli i loto malie o latou. 30Kae kapau e fai loa e se tagata Iselaele pe ko se tagata matapule se agasala i lona loto faitalisa, e nukinuki loa a ia ki le Eteleno, ti e tuuti loa a ia mei loto malie o lona kakai. 31Kua nukinuki a ia ki le folafola a le Eteleno, ti kua maumaui e ia lana fakatotonu : kua tuuti e le tagata lena a ia totonu mei lona kakai, ti e amo loa e ia le tua o lana agasala.
Tuaa o le maumau sapato
32I le temi leia na nonofo ai fanau a Iselaele i le toafa, na maua loa se tagata leia na tae fafie i le aso o le sapato. 33Na ave loa a ia e latou ala na maua ia a ia e lolotoga tae fafie kia Moisese, mo Alone, ti mo le fakatasi katoa. 34Na fakapilisoni loa a ia, talie na leikiaise fakasa le nea leia e tonu ke fai kiate ia. 35Na pati loa le Eteleno kia Moisese : E tautea loa le tagata lena ki le mate ; e tuki fatui loa a ia e le fakatasi katoa i fafo o le nofolaga. 36Na ave loa a ia e le fakatasi katoa ki fafo o le nofolaga, ti na lotou tuki fatui loa a ia, ti na mate loa a ia, o mulimuli ki le fakatotonu a le Eteleno kia Moisese.
Kapa usi o kofu
37Na pati loa le Eteleno kia Moisese : 38Masau ki fanau a Iselaele, ti ke pati loa kia latou : i tautupu fuli, ke lotou tui loa se ga potui kie kua kotikotii i le kapa o olatou kofu, ti ke lotou tui loa i le ga kie lena se filo usi. 39Ka kotou maua loa le ga kie lena i le kapa o okoutou kofu, e kotou tio loa ki ai ti e kotou manatui loa a folafola fuli a le Eteleno ke kotou fai latou, ti e leaise kotou mulimuli loa ki oli o okoutou loto mo okoutou mata ala e ave ia loa koutou ki tausi fakapagani. 40E kotou manatui loa i ai aku folafola, ti e kotou fai loa latou, ti e kotou maokioki loa ki lokoutou Atua. 41Ko au ko le Eteleno, ko lokoutou Atua, leia na fakamavae ia koutou mei le fenua o Esipito, ke kau nofo ko lokoutou Atua. Ko au ko le Eteleno, ko lokoutou Atua.
Currently Selected:
Numelo 15: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
