Maleko 13

mai o le Vosa o le tagata

1I le mavae a Sesu mei le fale tapu, na pati loa se tasi o ana tisipulo kiate ia : Pule, tio ki le fulumalilie o fatu, ti mo fale ! 2Na tali loa Sesu kiate ia : E ke tio ki fale lalasi ana ? E leaise toe teki loa se fa fatu i aluga o se tasi fa fatu, talie e laku fuli loa latou ki lalo.

3Na tonatona loa a ia i le mauga o Oliveto, i mua o le fale tapu. Ti ko Petelo, mo Sakopo, mo Soane, ti mo Atelea, na fai ia loa kiate ia le vesili leinei, i lolatou tefua mo Sesu : 4Fakasa mai kia matou, pe koafea e soko ai loa le nea lena, ti kolea le fakamailoga e iloa ai loa ka soko loa a nea fuli ana ?

Temi fakamuli

5Na pati loa Sesu kia latou : Kotou tokaga na kakaai koutou e se tasi. 6Talie e au loa le toka api i loku suafa, o pati : Ko au. Ti e lotou kakaai loa se kakai toka api. 7Ka kotou logo loa ki le masau ki ni tau kua soko, ti mo ni tau e teuteui, aua na kotou i, talie e tonu ke soko a nea ana. Kae e leaise ko le aso fakamuli loa lena. 8E tau loa se kakai ki se tasi kakai, ti mo se puleaga ki se tasi puleaga ; e i ai loa ni mafuike i potu kesekese, ti e i ai loa mo ni oge. Ko le kamataaga loa a ia o mamae o le fanauga. 9Kotou tokaga kia koutou totonu. E ave loa koutou ki telepinale, ti e sasa loa koutou ki ni laakau i sinakoka ; e kotou tutuu loa i mua o ni kovana ti mo ni sau, o tupu ko au, talie ke kotou fakasa le maoki kia latou. 10E tonu mua ke fakasa le logo malie ki puleaga fuli. 11Ka ave loa koutou ke fakamaaui, aua na kotou tuania le nea leia ka kotou masau loa ki ai i mua, kae kotou fakasa le nea leia e tuku atu loa kia koutou i le ola totonu lena ; talie e leaise ko koutou ala e masau loa, kae ko le Laumalie Maokioki. 12E tuku loa e le taina lona taina ki le mate, ti ko le tamana lana fanau ; e tuu ake loa a fanau ki olatou matua, o tuku latou ke tamate. 13E vesiainai loa koutou e kakai fuli, o tupu ko loku suafa, kae ko leia e kataki fualoa loa o kaku ki le fakaoki e saofaki loa.

Le fakalialia o le maumau

14Ka kotou tio loa ki le tagata leia e igoa ko le Fakalialia o le veli, kua fakanofo i le ganea leia e leaise tonu ke nofo ai, ko leia e lautosi ke matala ! Ti ko latou ala e nonofo loa i Sutea ke fesolaki ki mauga ; 15ko leia e nofo loa i le taufufu o lona fale ke aua na ifo loa a ia ki lona loto fale, o too se nea ke ano mo ia ; 16ti ko leia e nofo loa i faisaga ke aua na toe liliu a ia ki lona fale, o too lona taupulupulu. 17Malaia ki fafine ala e tinanae loa ti mo latou ala e fakau ia ni toe i aso ana ! 18Kotou faikole ke aua na soko a nea ana i le temi momoko.

Le mamae lasi

19Talie e lasi ake loa le mamae i aso ana i mamae fuli ala kua sa talu mei le fakatupu o le malama nei e le Atua o kaku mai ki le temi lena, ti e leaise toe loa i ai ni iki o tatau mo latou ki muli. 20Ti kanapau na leaise fakatoetoe e le Aliki a aso ana, e leaise saofaki loa se tasi ; kae na fakatotoe e ia a aso ana o tupu ko lana kau filifiliia. 21Ka pati atu loa se tasi kia koutou : E nofo Kilisito i leinei, pe : E nofo a ia i leia, aua na kotou tui ki ai. 22Talie e malaga loa ni Kilisito loi mo ni polofeta loi ; ti e lotou fai loa ni nea fakaofolele, mo ni milakulo ke kakaai ai le kau filifiliia, mo ka na feala a ia.

Le toe liliu mai o Sesu-Kilisito

23Ke kotou tokaga : Kua kau fakasa fakatomua atu kia koutou a nea fuli. 24Kae i aso ana, i le oki o le mamae lena, e fakapouli loa le laa, ti e leaise toe tuku mai loa e le masina lona malama, 25Ti e maluluku loa a fetuu mei le lagi, ti e galulu loa a makeke fuli o le lagi. 26Ti fokifa e tio loa ki le Vosa o le tagata e ifo mai i le ao mo le makeke lasi ti mo le kololia. 27Ti e kakau loa e ia le kau aselo, ti e tanaki fakatasi loa e ia le kau filifiliia mei fetuu matagi e fa, mei le gatoaga o le kele ki le gatoaga o le lagi.

Folafola o le fiki

28Kotou ako mei se folafola fakatata kua too mei le fiki. Ka kamata malulu ona laa, ti mo sosomo ona lau, e kotou iloa kua ofi mai le temi vevela. 29Ti e fenaaki foki, peka kotou tio loa kua soko mai a nea ana, ke kotou iloa kua ofi le Vosa o le tagata, i le matapa. 30E kau pati maoki atu kia koutou, e leaise puli le tautupu leinei, kae e leikiaise se soko a nea fuli ana. 31E puli loa le lagi mo le kele, kae e leaise puli loa aku folafola.

Fakalotomakeke ki le mauli alaala

32Kae ki le aso pe ko le ola, e leaise iloa a ia e se tasi fua, pe ko le kau aselo i le lagi, pe ko le Alo, kae ko le Tamana toka tasi. 33Kotou tokaga, kotou alaala, ti kotou faikole ; talie e leaise kotou iloa pe au fakaa loa le aso lena. 34E fai loa pe se tagata leia ka folau e tuku ia lona fale. E tuku e ia le pule ki ana tagata fakasausau, o fakailoilo ki le tagata taki toka tasi lana gaoi, ti fakatotonu ki le tagata taupau matapa ke leo. 35Koia kotou alaala, talie e leaise kotou iloa le lakaga leia e au ai loa le pule o le fale, pe ko le afiafi, pe ko le vaeluapo, pe ko le koukoua o moa, pe ko le usu. 36Kotou i na au fakafokifa a ia, o maua mai koutou e kotou momoe. 37Ko le nea leia e kau fakasa kia koutou, e kau fakasa a ia ki tagata fuli : Kotou alaala.

Currently Selected:

Maleko 13: FB2000

Highlight

Copy

Compare