Maleko 12
12
Folafola o tagata faivite
1Na toe masau loa Sesu kia latou i ni folafola fakatata. Na to loa e se tagata se vite. Ti na takatakai loa e ia a ia ki se a, ti na kenu loa e ia se tatauaga vino, ti na fakatuu loa e ia se tule ; ti na lue loa e ia le vite ki ni tagata faivite, ti na mavae loa a ia i le fenua. 2I le temi tau o le vite, na kakau loa e ia se tagata fakasausau ki le kau tagata faivite, o tupu ke maua e ia meia latou sona vaega i le fua o le vite. 3Ti na lotou too loa a ia, o sasa, ti na lotou kakau loa a ia ke ano ata. 4Na toe kakau loa e ia se tasi ake tagata fakasausau kia latou ; ti na lotou tuki loa a ia ki fatu, o mafaa ai lona ulu, ti na lotou fakavelivelii a ia, o kakau ke ano. 5Na toe kakau loa e ia se tasi ake tagata fakasausau, leia na lotou tamate loa ; ti mo ni iki ake o toka api, kae na lotou sasa ni iki, ti tamate ni iki. 6Ti na koi maua e ia se vosa alofaina ; na kakau fakamuli loa e ia a ia kia latou, o pati : E lotou fakaapaapa loa ki loku vosa. 7Kae na pati loa a tagata faivite ana : Ko leinei le vosa leia e maua tofiga ; kotou au, tou tamate a ia, ti tou maua loa le tofiga. 8Ti na lotou too loa a ia, o tamate, ti na lotou ti loa a ia ki le tua vite. 9Kolea loa ka fai e le pule o le vite ? E au loa a ia o tamate le kau tagata faivite, kae e soli loa e ia le vite ki ni iki ake.
10Pe na leaise kotou lau le folafola leinei o le Tosi :
Ko le fatu leia na tiaki e le kau tufuga
Na liliu ko le fatu tafito o le agele ;
11 Ko le nea lena na au mei le Aliki,
Ti ko se nea fakaofolele ki omatou mata ?
12Na lotou afa ke too a ia, kae na lotou tuania ia le kakai. Na lotou matala loa na fakasa e Sesu le folafola fakatata lena kia latou. Ti na lotou mavae loa iate ia, o ano.
Tukusau kia Sesale
13Na lotou kakau loa kia Sesu ni iki o le kau faliseo mo le kau Elote, o tupu ke fakamauatoka a ia i ana folafola totonu. 14Ti na lotou au loa, o pati kia Sesu : Pule, e motou iloa e ke maoki, ti e leaise ke tuania ia fua se tasi ; talie e leaise ke tio ki le tagata, ti e ke akonaki ki le ala o le Atua o mulimuli ki le maoki. Pe taga pe leai ke soli le tukusau kia Sesale ? Pe tonu ke motou soli a ia pe leaise tonu ke motou soli a ia ? 15Na iloa loa e Sesu lolatou malualoi, ti na tali loa a ia kia latou : Kolea e kotou asiasii ai au ? Kotou aumai ake se fa tenalio, ke kau tio ki ai. 16Na lotou avake loa se fa tenalio ; ti na vesili loa Sesu kia latou : Ko le paaki mo le fakamailoga o ai leia e tuu i ai ? Na lotou tali loa : o Sesale. 17Ti na pati loa a ia kia latou : Kotou liufaki kia Sesale le nea a Sesale, ti kotou liufaki ki le Atua le nea a le Atua. Ti na lotou ofolele ai kiate ia.
Ko le kau Satuseo mo le toe tuuake
18Ko le kau Satuseo, ala na pati e leaise toe tuuake, na au loa kia Sesu o fai kiate ia le vesili leinei : 19Pule, ko leinei le nea leia na fakatotonu mai e Moisese kia matou : Kapau e mate le taina o se tagata, kae tuku e ia lona avaga sala fanau, e toe avaga loa lona taina mo le fafine lena, ke tupu ai se sakoga ki lona taina. 20Kae na i ai ni fetaina e toka fitu. Na avaga loa le uluaki, ti na mate loa a ia kae na leaise tupu sona sakoga. 21Na avaga loa le lua mo le fafine lena, ti mate loa a ia kae na leai sona sakoga. Ti na toe fenaaki ki le tolu, 22ti na leaise tuku e se tasi fua i le toka fitu lena se sakoga. I le oki o latou fuli, na mate loa le fafine. 23I le toe tuuake, ko ai ia latou ka avaga loa mo le fafine ? Talie na avaga fuli le toka fitu mo ia. 24Na tali loa Sesu kia latou : Ko leinei le tupuaga o lakotou fai sala : E leaise kotou matala ki le Tosi ti mo le mafimafi o le Atua. 25Talie i le toe tuuake o le kau mate, e leaise too loa e tagata ni fafine, pe ko fafine ni tagata, kae e lotou liliu loa ofaipe le kau aselo i le lagi. 26Ki le toe tuuake o le kau mate, pe na leaise kotou lau i le tosi a Moisese, le nea leia na fakasa e le Atua kiate ia i le ga ulu vao : Ko au ko le Atua o Apalaamo, ko le Atua o Isaake, ti ko le Atua o Saakopo ? 27Ko le Atua e leaise ko le Atua o le kau mate, kae ko le Atua o le kau mauuli. E kotou fai sala lasi ai.
Le fakatotonu lasi toka tasi
28Ko se tasi o le kau sekelipa, leia na fakalogo ki lalatou masau, ti na tio ki le malie o le tali a Sesu ki le kau Satuseo, na fakafeofi ake loa, o vesili kiate ia : Ko le fakatotonu fea e lasi oki i fakatotonu fuli ? 29Na tali loa Sesu : Ko leinei le uluaki : Fakalogo, Iselaele : ko le Aliki, lotatou Atua, ko le Aliki a ia e tasi ; 30ti : E ke alofa loa ki le Aliki, lou Atua, i lou loto katoa, mo lou laumalie katoa, mo lou atamai katoa, ti mo lou makeke katoa. 31Ko leinei lona lua : E ke alofa loa ki lou oloi ofaipe koe totonu. E leaise tasi ake fakatotonu e lasi ake i fakatotonu ana. 32Na pati loa le sekelipa kiate ia : E malie, ei pule ; kua ke fakasa ia le maoki ko le Atua e tasi, ti e leaise tasi ake Atua iate ia, 33ti ko le alofa kiate ia i le loto katoa, mo le atamai katoa, mo le laumalie katoa, mo le makeke katoa, ti mo le alofa ki le oloi ofaipe kiate kita totonu, e lasi ake i failaulau fuli mo sakilifisio fuli. 34I le iloa e Sesu lana tali poto, na pati loa a ia kiate ia : E leaise ke mamao i le puleaga o le Atua. Ti na leaise tasi fua na mafai ke toe fai ia ni vesili kiate ia.
Kilisito ko le vosa o Tavite
35Na soko atu le akonaki a Sesu i le fale tapu, o pati : Kolea e pati ai le kau sekelipa ko le Kilisito ko le vosa o Tavite ?
36Talie na pati foki Tavite i le Laumalie Maokioki :
Na pati le Aliki ki loku Aliki :
Eke a koe i loku fetuu atamai,
Okaku ke kau fakaliliu ou fili ko lou tekiaga vae.
37Na fakaigoa a ia e Tavite totonu ko le Aliki ; pe feaki loa ke liliu a ia ko lona vosa ? Ti na fakalogo se kakai lasi kiate ia i le fiafia.
Valoki o le kau sekelipa
38Na pati loa Sesu kia latou i lana akonaki : Kotou tokaga ai ki le kau sekelipa, ala e manako ke taka mo kofu loloa, ti ke fakamalo ake kia latou i ganea apiapi ; 39ala e afa ia a ekeekeaga malilie i sinakoka, mo nofoaga malilie i kaitasi ; 40ala e tafi ia a fale o fafine lokonui, mo fai ia ni kole loloa ke fakamatamalie. E fakamaaui loa latou o mamafa ai.
Moliga o le fafine lokonui
41Na tonatona loa Sesu o tautonu mo le fa pusa tanaki koloa o le fale tapu, o tio ki le tuku e le kakai alatou paaga ki ai. Ko se kau mou koloa toka lasi na laku ia ki ai se paaga lasi ai. 42Na au foki mo se fafine lokonui mativa, ti na tuku loa e ia ki ai ni fa piesi liliki fua e lua, ko lona tatau ko se sagatimi e tasi. 43Ti na kalagai loa e Sesu ana tisipulo, o pati kia latou : E kau pati maoki atu kia koutou, kua soli e le fafine lokonui mativa leinei, o lasi ake ia latou fuli ala na tuku paaga ki le fa pusa tanaki koloa ; 44talie na lotou soli fuli le nea leia e leaise aoga kia latou, kae ko le fafine lokonui, i lona mativa, na soli ia le nea katoa leia na maua e ia, le nea katoa leia na tonu ke mauli ai.
Masau i le mauga o Oliveto : Maumaui o Selusalemi mo le toe liliu
Currently Selected:
Maleko 12: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
