Maleko 14

Fakatuutuu ke tamate Sesu

1Koi toe ni aso e lua ki le aso o le Pasikate mo pane sala fakatupu. Na afa loa e le kau pule faisakilifisio mo le kau sekelipa, ni puleaki ke too ai Sesu, o tamate. 2Talie na lotou pati : Ke aua na soko i le aso lasi, o tupu ke aua na i ai se maveuveu i le kakai.

Le fagu kaloni a Malia i Petania

3Na nofo loa Sesu i Petania, i le fale o Simone ko le tagata kilia ; ti na ulu ake loa se fafine, kae na kai a ia i le laupapa. Na too e le fafine se ipu alapate, kua apele i se kaloni ko le nale mea leia na totogi veli ai ; ti na titi loa e ia le fagu, ti na liligi loa e ia le kaloni ki le ulu o Sesu. 4Na fakasa loa e ni iki lolatou ita, o pati : Kolea kua maumaui ai le kaloni lena ? 5Na feala noa ke fakatau a ia ke fakalaka i fa tenalio kau lelau tolu, o soli latou ki le kau mativa. Ti na lotou itaita ki le fafine lena. 6Kae na pati loa Sesu : Kotou tuku noa a ia. Kolea e kotou fakamamaei ai a ia ? Kua fai e ia se gaoi malie kiate au. 7Talie e kotou maua tuumau le kau mativa, ti e mafai ke kotou fai kia latou se nea malie mo ka kotou loto ki ai, kae e leaise kotou maua tuumau au. 8Kua fai e ia le nea leia na mafai e ia : kua fakamanogi fakatomua e ia loku tino ki loku aveifo. 9E kau pati maoki atu kia koutou, i potu fuli ala e fakamafola ai loa le logo malie i le malama nei katoa, e toe fakamatala loa i ai le nea leia na fai e le fafine leinei ke fakamanatu ai kiate ia.

Fakatuutuu a Sutasi ke fakatau Sesu

10Ko Sutasi Isekaliote, ko se tasi o le tino agafulu tupu lua, na ano loa ki le kau pule faisakilifisio, o tupu ke fakatau e ia Sesu kia latou. 11I le oki o lalatou logo kiate ia, na lotou fiafia lasi ai, ti na lotou fakapapau loa ke soli kiate ia se paaga. Ti na afa loa e Sutasi se faigamalie ke tuku ai Sesu kia latou.

Teuteu o le Pasikate

12I le uluaki aso o pane sala fakatupu, leia na tamate ai le akeno o le Pasikate, na pati loa a tisipulo a Sesu kiate ia : Ko le ganea fea leia e ke loto ke motou ano o teuteui ai le Pasikate kiate koe ? 13Ti na kakau loa e ia se toka lua o ana tisipulo, o pati kia laua : Kolua ano ki le kolo ; e kolua felavei loa mo se tagata leia e amo ia se fa fagu vai, kolua muli iate ia. 14I le ganea leia e ulu loa a ia ki ai, kolua pati loa ki le pule o le fale : E pati le pule : Kofea le ganea leia e kau kai ai loa le Pasikate mo aku tisipulo ? 15Ti e fakasa atu loa e ia kia koulua se kogafale lasi i aluga, kua teuteui ti kua tokamalie : Ko lena le ganea leia e kolua teuteui ai loa le Pasikate kia tatou. 16Na ano loa tisipulo, o kaku ki le kolo, ti na la maua loa a nea ofaipe lona fakasa ake kia laua ; ti na la teuteui loa le Pasikate.

Pasikate fakaoki

17I le afiafi, na kaku mai loa a ia mo le tino agafulu tupu lua. 18I le lolotoga o le kai, na pati loa Sesu : E kau pati maoki atu kia koutou, ko le tasi o koutou, leia e kai mo au, e fakatau ia loa au. 19Na lotou kamata mamae loa, mo pati taki toka tasi loa kiate ia : pe ko au ? 20Na tali loa Sesu kia latou : Ko le tasi o le tino agafulu tupu lua, leia e velo ia lona lima mo au ki le pa. 21E ano le Vosa o le tagata o mulimuli ki le nea leia kua tosi kiate ia. Kae malaia ki le tagata leia e fakatau ia le Vosa o le tagata ? Na malie ake ki le tagata lena ke aua na tupu a ia.

Le kai fakamanatu

22I le lolotoga o le kai, na too loa e Sesu se pane ; ti na fakafetai loa a ia, ti na tofitofi loa e ia a ia, ti na soli loa e ia a ia ki ana tisipulo, o pati : Kotou too, ko le nea leinei ko loku tino. 23Ti na too loa e ia se ipu ; ti na fakafetai loa a ia, ti na soli loa e ia a ia kia latou, ti na lotou inu fuli loa ki ai. 24Ti na pati loa Sesu kia latou : Ko le nea leinei ko loku toto, ko le toto o le sai foou, leia e liligi o tupu ko le toka api. 25E kau pati maoki atu kia koutou, e leaise kau toe inu loa ki le fua o le vite, o kaku ki le aso leia e kau toe inu ai loa se vino foou i le puleaga o le Atua.

Fakasa e Sesu le fakafiti a Petelo

26I le oki o le sua o ni katiko, na lotou ano loa ki le mauga o Oliveto.

27Na pati loa Sesu kia latou : E kotou siga fuli loa ; talie kua tosi : E kau taai loa le tausi ovi, ti e mavetevete loa a ovi. 28Kae i le sili ki laku toe tuuake, e kau muamua loa ia koutou ki Kalilea. 29Na pati loa Petelo kiate ia : E lotou siga fuli loa, kae ko au, e leaise kau siga loa. 30Ti na pati loa Sesu kiate ia : E kau pati maoki atu kiate koe, i le aso nei, i le po fai leinei, i mua o le koukoua tua lua o le moatoa, e ke fakafiti tua tolu loa kiate au. 31Kae na toe pati fakamakeke loa Petelo kiate ia : Kapau e tonu ke kau mate mo koe, e leaise kau fakafiti loa kiate koe. Ti na lotou pati fuli fenaaki.

I Setesemani

32Na lotou ano loa ki se ganea na igoa ko Setesemani, ti na pati loa Sesu ki ana tisipulo : Kotou nonofo i leinei, kae kau ano o faikole. 33Na too loa e ia Petelo, mo Sakopo, mo Soane, ti na kamata logoi loa e ia se i lasi mo ni mamae. 34Ti na pati loa a ia kia latou : E mamae loku laumalie o kaku ki le mate ; kotou nonofo i leinei, ti kotou alaala.

Uluaki kole a Sesu

35Ti na toe fakamamao fakaikiiki atu loa a ia, ti na punou loa a ia ki le kele, o faikole ke fakamamao atu le ola lena iate ia. 36Na pati loa a ia : Abba, Tamana, e feala a nea fuli kiate koe, fakamamao atu iate au le ipu leinei ! Kae ke aua na fai ki loku loto, kae ke fai fua ki lou finegalo. 37Ti na au loa a ia ki le kau tisipulo, o maua latou kua momoe, ti na pati loa a ia kia Petelo : Simone, e ke moe ! Na leaise ke mafai ia le alaala i se ga ola fua e tasi ! 38Kotou alaala, ti kotou faikole, ke aua na kotou siga ki le fakasala ; e makeke le laumalie, kae e gaegae le tino.

Lua kole a Sesu

39Na toe fakamamao loa a ia, o toe fai le kole lena. 40Ti na toe liliu mai loa a ia, o toe maua latou kua momoe ; talie kua mamafa ai olatou mata. Na leaise lotou iloa se nea leia ke tali kiate ia.

Tolu kole a Sesu

41Na toe liliu mai loa a ia i le tua tolu, o pati kia latou : Kotou momoe la i le temi nei mo kotou malolo ! Kua feauga ! Kua soko mai le ola ! Ko leinei, ka tuku loa le Vosa o le tagata ki lima o le kau agasala. 42Kotou tutuu ki aluga, o ano ! Ko leinei leia e fakatau ia au !

Too o Sesu

43Koi lolotoga masau Sesu, kae na kaku mai loa Sutasi, ko se tasi o le tino agafulu tupu lua, ti na au loa a ia mo se kakai kua sulusulu ki seleta mo laakau, ala na kakau mai e le kau pule faisakilifisio, mo le kau sekelipa ti mo le kau fakamatuatua o le kakai. 44Ko leia na fakatau ia loa a ia na tuku ia kia latou le fakamailoga leinei : Ko leia e kau sogi loa ki ai, ko ia ; kotou too a ia, o ave. 45I lana kaku mai fai, na fakafeofi loa a ia kia Sesu, o pati kiate ia : Pule ! Ti na sogi loa a ia kia Sesu. 46Ti na fafa loa a lima o kakai kia Sesu, ti na lotou too loa a ia.

47Ko se tasi o latou ala na nonofo i ai, na tosoi ia loa lana seleta, o taai le tagata fakasausau a le pule faisakilifisio, o motu ai lona taliga.

48Na masau loa Sesu, o pati kia latou : Kua kotou au ke too au ofaipe se tagata agaveli ki ni seleta, mo ni laakau. 49Na kau nofo i aso fuli mo koutou, o fai akonaki i le fale tapu, ti na leaise kotou too au ; kae kua soko le nea leinei o tupu ke fakasoko a nea ala e tuu i le Tosi.

50Ti na tiaki loa a ia e ana tisipulo fuli, kae lotou fesolaki loa.

51Kae na mulimuli se tama tupulaga iate ia, leia na lava ki se tupenu. Ti na too foki mo ia ; 52kae na tiaki loa e ia lona tupenu, kae sola telefua loa a ia.

Sesu i mua o Kaifa mo le fono lasi

53Na lotou ave loa Sesu ki le fale o le pule faisakilifisio, leia na fakatasi ai le kau pule faisakilifisio, mo le kau fakamatuatua ti mo le kau sekelipa. 54Na muli loa Petelo ia Sesu mei mamao o kaku ki le loto malae o le pule faisakilifisio ; ti na tonatona loa a ia mo le kau tagata fakasausau, o fakamafana i tafa o se afi.

55Na afa loa e le kau pule faisakilifisio mo le fono lasi katoa se fakamaoki kia Sesu, ke tamate ai a ia, ti na leaise lotou maua fua se nea ; 56talie na toka api latou ala na fai ia ni fakamaoki loi kiate ia, kae na leaise tatau alatou fakamaoki. 57Ti na tutuu ake loa ki aluga ni iki, o fai ni fakamaoki loi kiate ia, o pati : 58Na motou logo ki lana pati : E kau maumaui loa le fale tapu leinei leia na fau e lima o le tagata, ti e kau fakatuu loa i ni aso e tolu se tasi ake a fale tapu leia e leaise fau loa e se lima o le tagata. 59I le nea foki lena na leaise tatau lalatou fakamaoki. 60Ti na tuu loa ki aluga le pule faisakilifisio, i loto malie o le fakatasi, o fakavesilii Sesu, o pati : Pe leaise ke tali ki se nea ? Kolea e fakamaoki ai latou anei kiate koe ? 61Kae na fakalologo loa Sesu, ti na leaise tali loa a ia ki se nea. Na toe vesili loa le pule faisakilifisio kia Sesu, o pati : Pe ko koe ko le Kilisito, ko le Alo o le Atua manuia ? 62Na tali loa Sesu : Ko au ko le Kilisito. Ti e kotou tio loa ki le Vosa o le tagata e nofo i le lima atamai o le mafimafi o le Atua, ti mo saele mai i ao o le lagi. 63Na sae loa e le pule faisakilifisio ona kofu, o pati : Pe koi aoga mai aifai kia tatou ni tagata fakamaoki ? 64Kua kotou logo fuli ki le fatituu. Kolea lakoutou manatu kiate ia ? Na lotou loto tasi fuli ke fakatuaa a ia ki le mate. 65Ti na kamata anuanu loa ni iki kiate ia, ti na lotou sai loa ona mata, kae lotou soka loa a ia ki olatou kaito, o pati kiate ia : Fakasa mai kia matou pe ko ai leia na soka ia a koe ! Ti na fepataki loa a ia e le kau tagata fakasausau.

Fakafiti a Petelo

66Na nofo loa Petelo i lalo i le malae, ti na tau ake loa se tasi o le kau fafine fakasausau a le pule faisakilifisio. 67I lana tio ki le fakamafana a Petelo, na pati loa a ia kiate ia : Ko koe foki, na ke nofo mo Sesu mei Nasaleti. 68Ti na fakafiti loa Petelo ki ai, o pati : E leaise kau iloa a ia, e leaise kau matala ki le nea leia e ke pati ki ai. Ti na mavae loa a ia i le malae, o ano ki le matapa. Ti na koukoua loa se moatoa. 69Kae i le toe tio a le fafine fakasausau kiate ia, na toe pati loa a ia kia latou ala na nonofo i ai : Ko ia leinei e kau ki lana kakai. Ti na toe fakafiti loa Petelo ki le nea lena. 70Ti na leaise fualoa, na toe pati loa latou ala na nonofo i ai kia Petelo : E maoki, e ke kau ki lana kakai, talie e ke Kalilea. 71Na kamata fai loa e Petelo ni fakamaoki ti mo ni fakapapau, o pati : E leaise kau iloa le tagata lena e kotou masau ki ai. 72I le lakaga fai lena, na koukoua loa se moatoa, ko le tua lua loa a ia. Ti na manatui loa e Petelo le folafola leia na fai e Sesu kiate ia : I mua o le koukoua tua lua o le moatoa, kua ke fakafiti tua tolu loa kiate au. Ti i lana manatu ki ai, na tagi loa a ia.

Currently Selected:

Maleko 14: FB2000

Highlight

Copy

Compare