Lua tosi ki le kau Kolinto 1
1
Fakaalofa
1Ko au Paulo, apositolo a Sesu-Kilisito i le finegalo o le Atua, mo le taina ko Timoteo, ki le Ekelesia o le Atua i Kolinito, ti mo le kau sagato fuli i le Akaia katoa ; 2Ke tuku atu kia koutou le kalasia mo le tokamalie e le Atua lotatou Tamana ti mo le Aliki ko Sesu-Kilisito !
Fakafetai a Paulo
3Ke fakafetai ki le Atua, le Tamana o lotatou Aliki ko Sesu-Kilisito, le Tamana o manavaalofa ti mo le Atua o fakafimalie fuli, 4leia e fakafimalie ia maua i oma mamae fuli, o tupu ke ma mafai ia le toe fakafimalie o latou ala e nonofo i mamae, ki le fakafimalie leia na fakafimalie ai maua e le Atua ! 5Talie kapau e lasi mamae o Kilisito ia maua, e toe lasi foki loma fakafimalie ia Kilisito. 6Ti kapau e ma mamae, e tupu ke kotou maua le fakafimalie mo le fakamauli ; ti kapau e ma maua le fakafimalie, e tupu ke kotou maua le fakafimalie, leia e fakaliliu ia koutou o makeke ki le tali mo le kataki o mamae ala e ma tali ia. 7Ti e tuu makeke lama amanaki malie kia koutou, talie e ma iloa, kapau e kotou kau i mamae, ti e kotou toe kau foki ki le fakafimalie.
8Talie e leaise ma loto, fetaina, ke tuku koutou i le fakapouli o uiga mo mamae ala na soko kia maua i Asia, talie na ma taomia lasi ai, o fakalaka foki i oma makeke, koia na leaise ma amanaki e ma toe mauuli. 9Kae na ma tio kua tuku maoki maua ki le mate, o tupu ke aua na ma fanaki kia maua totonu, kae ki le Atua leia e toe fakatuuake ia le kau mate. 10Ko ia leia na saofaki ia maua mei le mate lasi a ia, ti e toe saofaki loa e ia maua : io, e ma amanaki kiate ia e toe saofaki loa e ia maua ; 11ti e kotou tokoi mai foki kia maua ia koutou faikole, o tupu ke liliu le kalasia leia kua tuku mai kia maua ko se faigamalie ke fakafetai ai se toka api o tupu ko maua.
Le loto maoki o Paulo
12Talie ko le nea leia e ma fiafia ai, ko le fakamaoki leinei o ma loto, na ma mauli i le malama nei, kae tafito kia koutou, i le maokioki ti mo le mea i mua o le Atua, o leai i se poto fakatagata, kae i le kalasia o le Atua. 13Talie e leaise ma tosi atu kia koutou se nea kese i le nea leia e kotou lau ia, ti mo kotou matala ki ia. Ti e kau amanaki foki e kotou kaku loa o matala malie ki le nea leinei i le fakaoki : 14I le aso nei kua kotou kamata iloa ko lokoutou kololia ko maua, kae e kotou liliu loa ko loma kololia i le aso o le Aliki Sesu.
Le fai a Paulo i lana gaoi
15I le tui lena, na kau loto ke kau natu kia koutou i mua, o tupu ke kotou maua ni kalasia e lua ; 16na kau loto ke kau fakalaka atu ia koutou o ano ki Masetonia, ti ke kau toe liliu loa mei Masetonia kia koutou, ti ke kotou kau fanoga loa mo au ki Sutea. 17Pe i laku loto ki le nea lena, na kau fai loa se nea fakafuanoa ? Pe ko aku fakatuutuu ko ni fakatuutuu fakatagata, o sakinake e maua iate au le io mo le leai ? 18E kau fakamaoki atu i le Atua, leia e agatonu, ko le folafola leia na ma fakasa atu kia koutou na leaise io mo leai. 19Talie ko le Alo o le Atua, Sesu-Kilisito, leia na motou akonaki kia koutou, e au, mo Silivano, ti mo Timoteo, na leaise io mo leai, kae na io fai a ia ; 20talie ko fakapapau fuli a le Atua e io iate ia ; ti koia foki leia e tou puaki ai le Amene iate ia ki le kololia o le Atua. 21Ti ko leia e fakatuumakeke ia maua o fakatasi mo kotou ia Kilisito, ti na pani lolo ia tatou, ko le Atua, 22leia kua fakamailoga ia foki tatou, o soli mai kia tatou se fakamaoki, ko le Laumalie i otatou loto.
Mamae mo fiafia o Paulo
23Kae e kau too le Atua ko se fakamaoki ki loku laumalie, e tupu ko loku alofa kia koutou, leia na leaise kau toe natu ai ki Kolinito ; 24kae leaise tupu ke ma pulei ai lakoutou tui, kae tupu ke ma tokoi ki lokotou fiafia, talie kua kotou tuu makeke i le tui.
Currently Selected:
Lua tosi ki le kau Kolinto 1: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
