Lua tosi ki le kau Kolinto 2

Ko fua o le fakasemala

1Koia na kau fakatotonu loa iate au ke aua na kau toe liliu atu kia koutou i le mamae, 2talie kapau e kau fakamamae koutou, ko ai leia e mafai ke fakafiafia ia loa au ? Pe leaise ko leia fai na mamae iate au ? 3Koia na kau tosi ai a nea ala na kau tosi, o tupu ke aua na kau maua ia, i laku tau atu, se mamae meia latou ala na tonu ke tuku ia mai kiate au le fiafia, o kau maua kia koutou fuli le amanaki malie leinei ko loku fiafia ko le fiafia foki a ia o koutou fuli. 4E kau fai tosi atu kia koutou i se loto mamae lasi ai, mo se loto tuania, ti mo ni loimata lasi ai, o leaise tupu ke kotou mamae ai, kae o tupu ke kotou iloa le alofa lasi leia e kau maua kia koutou.

Ko le tagata agasala kua fakamolemole

5Ti kapau kua liliu se tasi ko se nea fakatupu mamae, e leaise ko au leia na fakamamae e ia, kae ko koutou fuli, pe ko se koga o koutou, ke aua na fakalalasi se nea. 6Ti kua feauga ki le tagata lena le tua leia kua tuku kiate ia e le toka api. 7Koia e tonu ai ke kotou fakamolemole kiate ia, ti ke kotou fakafimalie a ia, talie ke aua na taomia a ia i se mamae lasi. 8Koia e kau kole atu ai kia koutou ke kotou fakasa le alofa kiate ia ; 9talie na kau fai tosi atu foki kia koutou ko laku fia iloa, i laku asiasii koutou, pe kotou fakalogo i nea fuli. 10Koia ko leia e kotou fakamolemole ki ai, e kau toe fakamolemole foki ki ai, ti ko le nea leia kua kau fakamolemole ki ai, mo kapau na kau fakamolemole ki se nea, na kau fai a ia o tupu ko koutou, i mua o Kilisito, 11o tupu ke aua na tuku ke maua e Satana se faigamalie ia tatou, talie e leaise tou fakapouli ki ana fakatuutuu.

12Koia i laku kaku atu ki Toloasi ke fakasa ai le Evaselio a Kilisito, o logo ai na fakamavaa e le Aliki se matapa kiate au i ai, kae na leaise kau maua ia se malolo i loku loto, talie na leaise kau maua ia a Tito, loku taina ; 13koia na kau poloaki ai loa kia latou ti na kau ano loa ki Masetonia.

Malo ia Kilisito

14Ke fakafetai ki le Atua, leia e tuku ia kia tatou le malo tuumau ia Kilisito, ti mo liligi ia kia tatou le manogi o lona iloa i ganea fuli ! 15Talie ko le kaloni tatou o Kilisito ki le Atua, ia latou ala kua fakamauli, ti mo latou ala e mamate : 16Ki ni iki, ko se sauga o le mate, leia e soli ia le mate ; ki ni iki ake, ko se sauga o le mauli leia e soli ia le mauli. Ti ko ai e feauga ki le gaoi lasi lena ? 17Talie e leaise motou fai kaka ki le folafola a le Atua, ofaipe le fai a se toka api ; kae motou masau i le maoki, i mua o le Atua, ofaipe ni tagata fakasausau a Kilisito.

Currently Selected:

Lua tosi ki le kau Kolinto 2: FB2000

Highlight

Copy

Compare