Uluaki tosi ki le kau Kolinto 16
16
Tanaki nea alofa
1O uiga mo le tanaki nea alofa ki le kau sagato, kotou fai, e koutou foki, ofaipe le nea leia kua kau fakatotonu ki Ekelesia o Kalatia. 2I le uluaki aso o le vasaa, kotou tasi tuku kese i okoutou kaiga, le nea leia e kotou tasi mafai ia, o mulimuli ki lona mou koloa, o tupu ke aua na talitali ki laku kaku atu ke tanaki ai a nea alofa. 3Ti ka kau kaku atu loa, e kau kakau ia loa mo ni tosi, ke ave ia okoutou nea alofa ki Selusalemi, latou ala e kotou loto loa ki ai. 4Kapau e malie ke kau ano totonu, e lotou folau loa mo au.
5E kau natu loa kia koutou mo ka kau fakalaka loa i Masetonia, talie e kau fakalaka loa i Masetonia. 6E lagi kau nofo loa mo koutou, i le temi momoko katoa, o tupu ke kotou kau fanoga loa mo au ki le ganea leia e kau ano loa ki ai. 7E leaise kau loto i le faiaga leinei ke kau fakalaka o tio fua kia koutou, kae e kau amanaki ke kau nofo fualoa mo koutou, mo kapau e fakataga a ia e le Aliki. 8Kae e kau nofo loa i Efeso o kaku ki le Penikosite ; 9talie kua fakamavaa mai kiate au se matapa lasi mo aoga, ti e toka api le kau fakafesagai.
10Kapau e kaku atu loa Timoteo, kotou faiga ke aua na nofo tuania a ia ia koutou, talie e gaoi a ia ofaipe au ki le gaoi a le Aliki. 11Ke aua na nukinuki se tasi kiate ia. Ke kotou tokoi kiate ia ke folau mai kiate au i le tokamalie, talie e kau talitali kiate ia mo fetaina.
12O uiga mo le taina ko Apolosio, na kau kole makeke kiate ia ke natu kia koutou mo fetaina, kae na leaise loto a ia ke natu i le temi nei ; koi natu loa a ia mo ka maua loa e ia se faigamalie.
13Kotou alaala, kotou tuu makeke i le tui, kotou faipe ni tagata, kotou makeke. 14Kotou fai nea fuli i le alofa.
15Ti ko leinei se tasi a kole leia e kau toe fai kia koutou, fetaina : E kotou iloa ko le famili o Setefanasi ko uluaki fua a ia o Akaia, ti na tokaga ai a ia ki le tausi o le kau sagato. 16Ke kotou fakaapaapa foki ki le tau tagata fenaaki, ti mo latou fuli ala e gaoi i le gaoi lena.
17E kau fiafia i le kaku mai a Setefanasi, mo Folotunatusi, ti mo Akaikusi ; e lotou fetogi koutou ala e nonofo mamao,
18talie kua lotou fakafimalie loku loto ti mo lokoutou foki. Koia ke kotou iloa ai le alofa ki le tau tagata fenaaki.
19E fakaalofa atu kia koutou a Ekelesia o Asia. E fakaalofa lasi atu kia koutou i le Aliki a Akilasi mo Pelesila, ti mo le Ekelesia leia e nofo i lola fale. 20E fakaalofa atu kia koutou a fetaina fuli. Ke kotou fefakaalofaaki ia koutou i se sogi maokioki.
21E kau fakaalofa atu kia koutou, a au Paulo, i loku lima totonu.
22Kapau e leaise alofa se tasi ki le Aliki ko Sesu-Kilisito, ke anateme a ia ! Malanata, au la Aliki. 23Ke nofo le kalasia o le Aliki Sesu mo koutou !
24E nofo loku alofa mo koutou fuli ia Sesu-Kilisito.
Currently Selected:
Uluaki tosi ki le kau Kolinto 16: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
