Sɛlɛ 19
19
Bɔkɔbɔkɔyɛlɛ nee pɛlepɛlelilɛ nwo mɛla
1Ɛdɛnkɛma zele Mosisi kɛ, 2#Sɛlɛ 11.44-45; 1 Pit 1.16 “Ka kile Yizilayɛma amuala kɛ: Ɔwɔ kɛ bɛmaa bɛ nwo te, ɔluakɛ Medame, Ɛdɛnkɛma bɛ Nyamenle, mele nwuanzanwuanza. 3#Ade 20.8,12; Mɛla 5.12,16 Ɔwɔ kɛ bɛ nuhua biala di ɔ ze nee ɔ nli eni, na bɛsie me Ɛnwomenlelielɛ Kenle ne mɔ. Medame a mele Ɛdɛnkɛma bɛ Nyamenle ne a.
4 #
Ade 20.23; Sɛlɛ 26.1; Mɛla 27.15 “Bɛmmagyakyi me bɛkɔsonle awozonle na bɛyɛ ananze mmonle biala bɛmaa bɛ nwo. Medame a mele Ɛdɛnkɛma bɛ Nyamenle ne a.
5“Saa bɛfa anzonudwolɛ azubɔdeɛ bɛabɔ azu bɛamaa medame Ɛdɛnkɛma a, bɛmaa ɔvi bɛ ahonle nu, amaa mealie bɛ meado nu. 6Ɔwɔ kɛ bɛdi azubɔdeɛ ne amuala kenle ko ne ala, anzɛɛ bɛwie ye di wɔ ye alehyenlɛ nu. Mɔɔ kɛha na ɔkɛli kenle nsa la, bɛgua ye senle nu bɛyela ye. 7Saa ɔdi kenle nsa na bie tɛbɔ ɛkɛ ne na bɛdi a, ɔle munzule; menrɛlie menrɛdo nu. 8Ahenle noko mɔɔ lile la, ye munzule zo ye, ɔboalekɛ yegua debie nwuanzanwuanza mɔɔ le Ɛdɛnkɛma ɛdeɛ la anwo evinli. Sonla zɔhane, ɔwɔ kɛ bɛye ye bɛfi Nyamenle menli ne anu.
9 #
Sɛlɛ 23.22; Mɛla 24.19-22 “Saa bɛbu bɛ ɛya nu bɛyɔba ne a, bɛmmabu toonwo bɛkɔ ɛya ne anloa kpalɛ, yɛɛ bɛbu a, ɔ bo zo ɔ bo zo ne mɔ, bɛmmasia bɛ nzi bɛkɔsesa. 10Bɛtete bɛ vanye ma a, bɛmmatete dedee bɛmaa ɔka mbaka mgbane ne ala, yɛɛ mɔɔ kɛtete kɛgua la, bɛmmasesa. Ɔwɔ kɛ bɛgyakyi bie zolɛ bɛmaa ehyianvolɛma nee nyɛvolɛ. Medame a mele Ɛdɛnkɛma bɛ Nyamenle ne a.
11 #
Ade 20.15,16; Mɛla 5.19,20 “Bɛmmawua, bɛmmadi ndunlumi, yɛɛ bɛmmabɔ adalɛ bɛkile bɛ nwo ngoko. 12#Ade 20.7; Mɛla 5.11; Mat 5.33 Eza bɛmmafa me duma bɛka adalɛ ndane bɛgua bɛ Nyamenle ne duma ne anwo evinli. Medame a mele Ɛdɛnkɛma a.
13 #
Mɛla 24.14-15
“Bɛmmasisi bɛ gɔnwo mɔ yɛɛ bɛmmawua bɛ. Bɛbɔ awie ɛkpa a ɔnle kɛ ye ɛkpabɔdeɛ ne anzɛɛ ye ahatualɛ ne ka bɛ nwo ɛkɛ ne toonwo aleɛ kye zolɛ. 14#Mɛla 27.18 Ɔnle kɛ bɛwa mɔɔ anzo ɛdi la amonle, anzɛɛ bɛfa koti bɛto mɔɔ anye ɛzi la adenle nu. Ɔwɔ kɛ bɛsulo bɛ Nyamenle ne; medame a mele Ɛdɛnkɛma a.
15 #
Ade 23.6-8; Mɛla 16.19 “Ɔnle kɛ bɛbua mgbɔvodɛne. Ɔnle kɛ bɛbua bɛtia ehyianli na bɛbua bɛmaa sonlakpole. Bɛbua bɛ gɔnwo mɔ ndɛne wɔ adenle kpalɛ nu. 16Ɔnle kɛ bɛduolua bɛ gɔnwo mɔ akɔme nu bɛkeha awie mɔ anwo edwɛkɛ mɔɔ ɛnle nɔhalɛ la, yɛɛ bɛmmadi daselɛ adalɛ bɛtia bɛ gɔnwo bɛmaa ɔminli ye ngoane. Medame a mele Ɛdɛnkɛma a.
17“Bɛmmafa bɛ gɔnwo anwo edwɛkɛ bɛsie bɛ kunlu; bɛ nee ye ɛha, anrɛɛ bɛkɛli ɔ nwo ɛzonle. 18#Mat 5.43; 19.19; 22.39; Mak 12.31; Luk 10.27; Wulo 13.9; Gal 5.14; Gye 2.8 Bɛmmadi nzenralɛ anzɛɛ bɛmmafa bɛdabɛ bɛ menli ne mɔ amra mrenya anwo edwɛkɛ bɛsie bɛ kunlu. Bɛhulo bɛ gɔnwo mɔ kɛ bɛdabɛ bɛ nwo; medame a mele Ɛdɛnkɛma a.
19 #
Mɛla 22.9-11
“Ɔwɔ kɛ bɛdi me mɛla ne mɔ azo. Ɔnle kɛ bɛmaa nyɛmoa gyɛne fola bɛ nyɛmoa. Ɔnle kɛ bɛdua ma ngakyile nwiɔ wɔ ɛya ko ne ala anu, yɛɛ ɔnle kɛ bɛfa ninyɛne ngakyile nwiɔ bɛnwo tɛladeɛ bɛwula.
20“Saa nrenya nee kanranli raalɛ mɔɔ awie ɛyia ye na bɛtɛkpɔnenle ye anzɛɛ bɛtɛmanle ye fanwodi la da a, ɔwɔ kɛ bɛtu menli bɛmaa bɛneɛnlea nu kpalɛ. Ɔnle kɛ bɛku bɛ, ɔboalekɛ raalɛ ne ɛnli ɔ ti anwo. 21Ɔwɔ kɛ nrenya ne fa boane nyinli yɛ fɔlɛlilɛ azubɔdeɛ maa Ɛdɛnkɛma wɔ Ɛdɛnkɛma Ndanlɛ Sua ne anuhɔlɛ ne, 22na sɛlɛvolɛ ne yɛ mgbɔdalɛ nzɛlɛlɛ maa ye wɔ Ɛdɛnkɛma anyunlu, wɔ ye ɛtane ne mɔɔ yeyɛ la anwo; na bɛkɛva ye ɛtane ne mɔɔ yeyɛ la bɛkɛhyɛ ye.
23“Saa bɛdwu Keena azɛlɛ zo, na bɛdua bɛ mbakama ngakyile ne mɔ na ɔso a, bɛbu nzoleɛ ne kɛ ɔle kyibadeɛ, bɛmmadi zolɛ aleɛ toonwo ɛvolɛ nsa. 24Ɛvolɛ nna ne azo, mbaka ne mɔ azo ma ne amuala anwo bade saanwu; bɛva bɛbɔ ayɛlɛyelɛ azu bɛmaa Ɛdɛnkɛma. 25Na ye ɛvolɛ nnu ne azo bɛkola bɛdi nzoleɛ ne bie. Ɛhye bamaa mbaka ne mɔ azo dɔɔnwo amaa bɛ; medame a mele Ɛdɛnkɛma bɛ Nyamenle ne a.
26 #
Sɛlɛ 7.26-27; 17.10-14; Mɛla 12.16,23; 15.23; 18.10 “Bɛmmadi nane biala mɔɔ mogya ne gyi nu la. Ɔnle kɛ bɛye ngonyia anzɛɛ bɛbɔ ayɛne ɛbɛla biala. 27#Sɛlɛ 2.5; Mɛla 14.1 Ɔnle kɛ bɛkpa bɛ nzo tɛbanu enrinli anzɛɛ bɛkpa bɛ kɛsa. 28Ɔnle kɛ bɛbodɛboda bɛ nwo bɛkile bɛ nyanelilɛ wɔ awie mɔɔ ɛwu la ati anzɛɛ bɛbobɔ ngonlɛ biala; medame a mele Ɛdɛnkɛma a.
29 #
Mɛla 23.17
“Bɛmmamaa bɛ mra mraalɛ bɔ tuutuu#19.29 Tuutuu ɛbɛla: anzɛɛ di tuutuu wɔ ɛzonlenlɛ sua nu. ɛbɛla bɛgua bɛ nyunlu aze, anrɛɛ tuutuulilɛ kɛva azɛlɛ ne na amumuyɛ kɛyi ye tɛkɛɛ. 30#Sɛlɛ 26.2 Ɔwɔ kɛ bɛsie me Ɛnwomenlelielɛ Kenle ne mɔ na bɛdi me ɛleka nwuanzanwuanza ne eni; medame a mele Ɛdɛnkɛma a.
31“Bɛmmabiza bɛ nwo wɔ menli mɔɔ tendɛ nwomenle nloa azo la anzɛɛ nyɛnema ɛkɛ. Bɛmmakpondɛ bɛ bo zo bɔbɔ na evinli aha bɛ; medame a mele Ɛdɛnkɛma bɛ Nyamenle ne a.
32“Bɛnwu kpanyinli a bɛli ye eni, bɛdwazo enililɛ nu bɛmaa mɔɔ ati zo ɛdu la na bɛzulo bɛ Nyamenle ne; medame a mele Ɛdɛnkɛma a.
33 #
Ade 22.21; Mɛla 24.17-18; 27.19 “Saa ɛyɛvolɛ bie batɛnla bɛ azɛlɛ ne azo a, bɛmmayɛ ye ɛtane. 34Ɛyɛvolɛ mɔɔ bɛ nee ye a lua la bɛyɛ ye kɛmɔ bɛkɛyɛ bɛdabɛ bɛ nuhua bie ala la. Eza bɛhulo ye kɛ bɛdabɛ bɛ nwo la. Ɔluakɛ ɛnee bɛdabɛ bɛle nyɛvolɛ wɔ Yigyibiti azɛlɛ zo; medame a mele Ɛdɛnkɛma bɛ Nyamenle ne a.
35“Ɔnle kɛ bɛdi ndunlumi wɔ debie ɛzuzulɛ nu. 36Bɛmaa bɛ tone ne mɔ ɛgyinla sɛsɛ. Bɛmmawua debie ɛzuzulɛ nu; medame a mele Ɛdɛnkɛma bɛ Nyamenle ne mɔɔ yele bɛ vile Yigyibiti la. 37Ɔwɔ kɛ bɛsie me mɛla ne nee me ngyehyɛlɛ ne mɔ boɛ na bɛdi zolɛ; medame a mele Ɛdɛnkɛma a.”
Currently Selected:
Sɛlɛ 19: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
