Sɛlɛ 20
20
Anzosesebɛ nwo kakɛdualɛ
1Ɛdɛnkɛma zele Mosisi kɛ, 2“Ka kile Yizilayɛma kɛ: Yizilayɛnli biala anzɛɛ ɛyɛvolɛ biala mɔɔ de Yizilayɛma avinli, mɔɔ kɛva ɔ ra kɛbɔ azu kɛmaa bozonle Molɛke la, bɛhu ye. Bɛdabɛ mɔɔ bɛwɔ maanle ne anu la ɛzi ye awolɛ ɛhu ye. 3Medame mumua ne mebava me nye meawula sonla zɔhane anyunlu, na meaye ye meavi ɔdaye ye menli avinli. Mebayɛ ɛhye, ɔboalekɛ yeva ɔ ra yebɔ azu yemaa bozonle Molɛke, yegua me Ɛzonlenlɛ Ɛleka nwuanzanwuanza ne anwo evinli na yezɛkye me duma. 4Na saa bɛdabɛ mɔɔ bɛde maanle ne anu la ye bɛ nye kɛ asɛɛ bɛannwu kɛ yeva ɔ ra yebɔ azu yemaa bozonle Molɛke na bɛangu ye a, 5mebava me nye meazie ahenle nee ye mbusuafoɔ anyunlu, na meaye bɛ nee bɛdabɛ mɔɔ bɛdoale ye bɛhɔbɔle tuutuu ɛbɛla mgbane ne wɔ bozonle Molɛke abo la amuala meavi bɛ menli avinli.
6“Saa awie kɔbiza ɔ nwo wɔ sonla mɔɔ tendɛ nwomenle nloa azo la ɛkɛ, anzɛɛ ɔkɔ bayivolɛ bie ɛkɛ ɔkɔbiza ɔ nwo anzɛɛ ɔ nee bɛ kɔbɔ tuutuu ɛbɛla a, mebava me nye meazie ɔ nyunlu na meaye ye meavi ye menli ne avinli. 7Zɔhane ati bɛmaa bɛ nwo ɛde saanwu, ɔluakɛ medame a mele Ɛdɛnkɛma bɛ Nyamenle ne a. 8Bɛli me mɛla ne mɔ azo na bɛyɛ; medame a mele Ɛdɛnkɛma mɔɔ memaa bɛ nwo te a.
9 #
Ade 21.17
“Awie biala mɔɔ kɛwa ɔ ze anzɛɛ ɔ nli amonle la, bɛhu ye. Yewa ɔ ze nee ɔ nli amonle, yemɔti ye mogya gua ɔdaye ɔ ti zo.
10 #
Ade 20.14; Sɛlɛ 18.20; Mɛla 5.18 “Saa nrenya fa ɔ gɔnwo aye a, bɛhu nrenya ne nee raalɛ ne bɛ mu nwiɔ. 11#Sɛlɛ 18.8 Awie mɔɔ nee ɔ ze aye kɛla la ɛbɔ ɔ ze anyiemgba; bɛhu nrenya ne nee raalɛ ne bɛ mu nwiɔ. Bɛ mogya gua bɛ ti zo. 12#Sɛlɛ 18.15 Saa awie fa ɔ ra nrenya aye a, bɛhu nrenya ne nee raalɛ ne. Bɛbɔ munzule, bɛ mogya ne gua bɛ ti zo. 13#Sɛlɛ 18.22 Saa nrenya fa ɔ gɔnwo nrenya a, bɛdabɛ bɛ mu nwiɔ bɛbɔ munzule; bɛhu bɛ, yɛɛ bɛ mogya gua bɛdabɛ bɛ ti zo. 14#Sɛlɛ 18.17; Mɛla 27.23 Saa nrenya gya raalɛ na eza ɔfa ɔ ye ɔ nli a, ɔle amumuyɛ ɛbɛla. Bɛgua bɛ senle nu bɛyela bɛ, amaa zɛhae amumuyɛ ɛbɛla ne azi aze wɔ bɛ avinli. 15#Sɛlɛ 18.23 Saa nrenya nee nane da, ɔfa ye a, bɛhu ye, na bɛhu nane ne. 16Saa raalɛ twe bikye nane bie na ɔmaa ɔfa ye a, bɛhu raalɛ ne nee nane ne; bɛ mogya ne gua bɛ ti zo.
17 #
Sɛlɛ 18.9
“Saa nrenya fa ɔ diema raalɛ mɔɔ le ɔ ze ara anzɛɛ ɔ nli ara a, bɛ mu nwiɔ bɛgua bɛ nyunlu aze. Ɔle anyiemgba debie, yemɔti ɔwɔ kɛ bɛye bɛ bɛfi bɛ mediema ne mɔ anu. Nrenya ne ɛbɔ ɔ diema raalɛ ne anyiemgba, yemɔti ye amumuyɛ ne zo ye. 18#Sɛlɛ 15.24; 18.19 Saa nrenya nee raalɛ mɔɔ wɔ ɛwazɛne nu la da, ɔfa ye a, ɔwɔ kɛ bɛtu bɛdabɛ bɛ mu nwiɔ bɛfi menli ne avinli, ɔboalekɛ bɛgua bɛ nwo evinli.
19 #
Sɛlɛ 18.12-13
“Ɔnle kɛ nrenya fa ɔ nli adiema raalɛ anzɛɛ ɔ ze adiema raalɛ. Ɔyɛ ye zɔhane a, ɛnee yeva ɔ nwo sonla; bɛdabɛ bɛ mu nwiɔ bɛ munzule doa bɛ. 20#Sɛlɛ 18.14 Saa nrenya nee ɔ wuvuanyi aye da a, ɛnee yebɔ ɔ wuvuanyi ne anyiemgba. Ɔ nee raalɛ ne bɛ mu nwiɔ bɛ ɛtane zo bɛ; bɛnrɛwo ralɛ ɛlɛ na bɛawu. 21#Sɛlɛ 18.16 Saa awie fa ɔ diema nrenya aye a, ɔle evinli yɛɛ eza yegua ɔ diema nrenya ne anyunlu aze; bɛnrɛwo ɛlɛ na bɛawu.
22“Yemɔti bɛli me mɛla ne nee me ngyehyɛlɛ ne mɔ kɔsɔɔti azo na bɛyɛ, amaa azɛlɛ ne mɔɔ me nee bɛ ɛlɛkɔ zolɛ la anye bɛ. 23Eza bɛmmadi menli mɔɔ bɛmɛ bɛ ti melɛtu bɛ la maamɛla ne mɔ azo; ɔluakɛ bɛyɛle ɛhye mɔ amuala, yemɔti a mengyile bɛ a. 24Na bɛmɛ, meha mehile bɛ kɛ, ‘Bɛbava azɛlɛ ne, yɛɛ mebava meamaa bɛayɛ bɛ ɛdeɛ bɔkɔɔ. Ɔle azɛlɛ mɔɔ kye aleɛ a.’ Medame a mele Ɛdɛnkɛma bɛ Nyamenle ne mɔɔ mekpa nu meye bɛ mevi menli kɔsɔɔti anu a. 25Yemɔti, ɔwɔ kɛ bɛnwu ngakyile mɔɔ wɔ nane mɔɔ anwo te nee nane mɔɔ anwo ɛnde la, anzɛɛ nloma mɔɔ anwo te nee nloma mɔɔ anwo ɛnde la avinli la. Ɔnle kɛ bɛdi nane anzɛɛ anloma anzɛɛ debie biala mɔɔ azɛlɛ ne ye maa bɛ na meze bɛ kɛ nwolɛ ɛnde la bie na bɛgua bɛ nwo evinli. 26Ɔwɔ kɛ bɛmaa bɛ nwo te maa me, ɔluakɛ medame Ɛdɛnkɛma, mele nwuanzanwuanza, yɛɛ meye bɛ mevi menli kɔsɔɔti avinli mezie ahane, kɛ bɛle me ɛdeɛ mekɛ biala.
27“Nrenya anzɛɛ raalɛ biala mɔɔ tendɛ nwomenle nloa azo anzɛɛ le bayivolɛ la, ɔwɔ kɛ bɛku ye. Bɛzi bɛ awolɛ bɛhu bɛ, na bɛ mogya gua bɛdabɛ bɛ ti zo.”
Currently Selected:
Sɛlɛ 20: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
