Sɛlɛ 18
18
Raalɛ nee nrenya ɛyɛlɛ mɔɔ Nyamenle tua la
1Ɛdɛnkɛma zele Mosisi kɛ, 2“Ka kile Yizilayɛma kɛ: Mame a mele Ɛdɛnkɛma bɛ Nyamenle ne a. 3Ɔnle kɛ bɛyɛ nyɛleɛ ne mɔɔ Yigyibitima mɔɔ ɛnee bɛde bɛ avinli la yɛ la bie. Eza ɔnle kɛ bɛyɛ nyɛleɛ mɔɔ Keenama mɔɔ melɛfa bɛ meara bɛ avinli la yɛ la bie. Ɔnle kɛ bɛdi menli zɔhane amaamuo zo. 4Ɔwɔ kɛ bɛdi me mɛla ne mɔ azo, na bɛsie me ngyehyɛlɛ ne mɔ, bɛdi zolɛ. Medame a mele Ɛdɛnkɛma bɛ Nyamenle ne a. 5#Luk 10.28; Wulo 10.5; Gal 3.12 Yemɔti ɔwɔ kɛ bɛdi me mɛla nee me ngyehyɛlɛ ne mɔ azo Yemɔ yɛɛ saa bɛyɛ a, bɛkɛnyia ngoane a: Medame a mele Ɛdɛnkɛma a.
6“Ɔnle kɛ bɛ nuhua biala nee ɔ nwo amra ne bie yɛ raalɛ nee nrenya. Medame a mele Ɛdɛnkɛma a. 7Ɔnle kɛ awie fa ɔ nli na ɔgua ɔ ze anyunlu aze. Ɛ nli mɔɔ wole wɔ ɔ, ɔnle kɛ ɛgua ɔ nyunlu aze. 8Ɔnle kɛ ɛfa ɛ ze aye biala. Ɛyɛ ye zɔhane a, wɔgua ɛ ze anyunlu aze. 9#Sɛlɛ 20.17; Mɛla 27.22 Ɔnle kɛ ɛfa ɛ diema raalɛ mɔɔ ɛ nee ye bɛ ze nee bɛ nli ko, anzɛɛ asolo ɔ ze anzɛɛ ɔ nli la. 10Ɔnle kɛ ɛfa ɛ ra nrenya ara raalɛ anzɛɛ ɛ ra raalɛ ara raalɛ. Ɔluakɛ bɛ anyiemgba le wɔ anyiemgba. 11Ɔnle kɛ ɛfa ɛ ze aye ara raalɛ, mɔɔ ɛ ze a ɛwo ye la; ɔle ɛ diema raalɛ. 12#Sɛlɛ 20.19-20 Ɔnle kɛ ɛfa ɛ ze adiema raalɛ; ɔle ɛ ze anwo sonla mɔɔ bikye ye a. 13Ɔnle kɛ ɛfa ɛ nli adiema raalɛ; ɔle ɛ nli anwo sonla mɔɔ bikye ye a. 14Ɔnle kɛ ɛfa ɛ ze adiema nrenya aye. Ɔle ɛ nli. 15#Sɛlɛ 20.12 Ɔnle kɛ ɛfa ɛ ra nrenya aye; ɔle ɛ ra nrenya aye, ɔnle kɛ ɛbɔ ye anyiemgba. 16#Sɛlɛ 20.21 Ɔnle kɛ ɛfa ɛ diema nrenya aye, ɛbɔ ɛ diema nrenya ne anyiemgba. 17#Sɛlɛ 20.14 Ɔnle kɛ ɛfa raalɛ na eza ɛfa ɔ ra raalɛ; mmafa ɔ ra nrenya ara raalɛ anzɛɛ ɔ ra raalɛ ara raalɛ. Ɛyɛ ye zɔhane a, ɛnee wɔgua raalɛ ne anyunlu aze. Bɛ muala bɛle mraalɛ mɔɔ bikye wɔ a, ɛ nwo amra ɔ. Nyɛleɛ zɛhae le amumuyɛ ɛbɛla. 18Eza ɔnle kɛ ɛfa ɛ ye adiema raalɛ ɛyɛ ɛ ye ahola wɔ mekɛ mɔɔ ɛ ye de ngoane nu la.
19 #
Sɛlɛ 20.18
“Ɔnle kɛ ɛfa raalɛ mɔɔ wɔ ɛwazɛne nu la. 20Eza ɔnle kɛ ɛfa ɛ gɔnwo aye na ɛgua ɛ nwo evinli. 21#Sɛlɛ 20.1-5 Ɔnle kɛ bɛtu bɛ mra ne mɔ anu biala bɛsie ahane bɛmaa kɛ bɛyela ye bɛbɔ azu bɛmaa bozonle Molɛke. Bɛyɛ ɛhye a, ɛnee bɛbɔ bɛ Nyamenle ne anyiemgba. Medame a mele Ɛdɛnkɛma a. 22#Sɛlɛ 20.13 Ɔnle kɛ nrenya fa ɔ gɔnwo nrenya; ɔle munzule debie. 23#Ade 22.19; Sɛlɛ 20.15-16; Mɛla 27.21 Eza ɔnle kɛ bɛ nee nane biala da, bɛfa ye na bɛgua bɛ nwo evinli, yɛɛ ɔnle kɛ raalɛ biala maa adenle maa nane fa ye; ɔle ɛtane kpole.
24“Bɛmmayɛ ɛhye mɔ anu biala bie na bɛgua bɛ nwo evinli, ɔluakɛ zɔhane ninyɛne yɛɛ maanle maanle mɔɔ melɛtu bɛ wɔ azɛlɛ ne azo meava meamaa bɛ la yɛle vale zɛkyele bɛ nwo a. 25Bɛyɛle zɔhane bɛvale bɛzɛkyele azɛlɛ ne, amaa ɔlua zo mendeanle azɛlɛ ne, yɛɛ azɛlɛ ne ɛlɛtu menli mɔɔ de zolɛ la a. 26Na bɛmɛ, bɛli me mɛla ne nee me ngyehyɛlɛ ne mɔ azo, bɛdabɛ anzɛɛ bɛ nyɛvolɛ mɔɔ bɛ nee bɛ de la o, bɛ biala mmabɔ munzule ɛbɛla ɛhye mɔ bie. 27Ɔluakɛ zɛhae munzule ninyɛne yɛɛ menli mɔɔ de azɛlɛ ne azo la yɛle vale zɛkyele azɛlɛ ne a. 28Saa bɛyɛ bie a azɛlɛ ne bakpo bɛ, kɛmɔ ɔkpole maanle maanle mɔɔ lumuale dɛnlanle zolɛ la. 29Ɔluakɛ awie biala mɔɔ kɛbɔ munzule ɛbɛla ɛhye mɔ bie la, bɛkɛye ye bɛkɛvi Nyamenle menli ne avinli. 30Yemɔti bɛli me edwɛkɛ zo, na bɛmmayɛ nyɛleɛ ɛtane ne mɔ bie, na bɛbu munzule amaamuo ne mɔɔ menli mɔɔ lumuale azɛlɛ ne azo la bule la bie. Bɛmmayɛ ye zɔhane bɛgua bɛ nwo evinli. Medame a mele Ɛdɛnkɛma bɛ Nyamenle ne a.”
Currently Selected:
Sɛlɛ 18: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
