Ade 20
20
Nyamenle Mɛla Bulu ne
(Mɛla 5.1-21)
1Na Nyamenle dendɛle zele kɛ, 2“Mame a mele Ɛdɛnkɛma bɛ Nyamenle ne, mɔɔ yele bɛ vile Yigyibiti azɛlɛ zo, vile akɛlɛzonlenlɛ nu la.
3“Bɛmmasonle nyamenle gyɛne biala kɛ me ngome ala.
4 #
Ade 34.17; Sɛlɛ 19.4; 26.1; Mɛla 4.15-18; 27.15 “Bɛmmayɛ ananze, anzɛɛ debie biala mɔɔ wɔ anwuma anzɛɛ aze anzɛɛ nzule nu wɔ azɛlɛ bo la sɔhovolɛ. 5#Ade 34.6-7; Ɛdi 14.18; Mɛla 7.9-10 Bɛmmabɔ bɛ ti aze bɛmaa bɛ anzɛɛ bɛmmasonle bɛ. Ɔluakɛ medame Ɛdɛnkɛma bɛ Nyamenle ne, mele nungule Nyamenle. Mefa bɛ ze mɔ ɛtane ne mɔ anwo ndeanlɛ metea bɛdabɛ mɔɔ bɛkpɔ me la toonwo ɔkɔdwu awolɛndoazo nsa ne nee nna ne azo, 6na mekile me ɛhulolɛ kpundii ne memaa awolɛndoazo apenle apenle#20.6 Awolɛndoazo apenle apenle: anzɛɛ menli apenle apenle mɔɔ kulo me na bɛdi me mɛla zo la.
7 #
Sɛlɛ 19.12
“Bɛmmabɔ medame Ɛdɛnkɛma bɛ Nyamenle ne duma mgbane mgbane, ɔluakɛ medame Ɛdɛnkɛma, menrɛmaa mɔɔ bɔ me duma mgbane mgbane la ɛnrɛva ɔ nwo dwɔɔ.
8“Bɛhakye kɛ bɛkɛzie Ɛnwomenlelielɛ Kenle ne nwuanzanwuanza. 9Bɛva kenle nsia bɛyɛ gyima, bɛyɛ bɛ gyima muala, 10na kenle nsuu ne le Ɛdɛnkɛma bɛ Nyamenle ne Ɛnwomenlelielɛ Kenle; bɛmmayɛ gyima biala, bɛdabɛ anzɛɛ bɛ mra mrenya, anzɛɛ bɛ mra mraalɛ, bɛ sonvolɛ mrenya, anzɛɛ bɛ sonvolɛ mraalɛ, anzɛɛ bɛ nlankɛ, anzɛɛ nyɛvolɛ mɔɔ wɔ bɛ azua ne mɔ azo la. 11Ɔluakɛ medame Ɛdɛnkɛma, menvale kenle nsia a membɔle anwuma nee aze a, nyevile nee nuhua ninyɛne muala, na menliele me ɛnwomenle wɔ kenle nsuu ne azo. Yemɔti medame Ɛdɛnkɛma, menyilale Ɛnwomenlelielɛ Kenle ne na menyɛle ye nwuanzanwuanza.
12 #
Mɛla 27.16; Mat 15.4; 19.19; Mak 7.10; 10.19; Ɛfɛ 6.2,3 “Bɛli bɛ ze mɔ nee bɛ nli mɔ eni, amaa bɛ mekɛ awa wɔ azɛlɛ ne mɔɔ medame Ɛdɛnkɛma bɛ Nyamenle ne melɛfa meamaa bɛ la azo.
13 #
Mɔl 9.6; Sɛlɛ 24.17; Mat 5.21; Gye 2.11 “Bɛmmaku sonla.
14 #
Sɛlɛ 20.10; Mat 5.27 “Bɛmmafa awuvolɛ.
15 #
Sɛlɛ 19.11
“Bɛmmawua.
16 #
Ade 23.1
“Bɛmmadi daselɛ adalɛ bɛtia bɛ gɔnwo.
17 #
Wulo 13.9
“Bɛmmamaa bɛ nye bolo bɛ gɔnwo sua nu; bɛmmamaa bɛ nye bolo bɛ gɔnwo aye, anzɛɛ ye sonvolɛ nrenya, anzɛɛ ye sonvolɛ raalɛ, anzɛɛ ye ɛnlankɛ nyinli, anzɛɛ ye asoaso, anzɛɛ bɛ gɔnwo debie biala.”
Menli ne ɛzulolɛ
(Mɛla 5.22-33)
18Mɔɔ menli ne kɔsɔɔti dele ɛhululɛ nee ye ɛvedevedelɛ ne nee aweɛne tendenle ne ane, na bɛnwunle boka ne azo esike ne la, ɛzulolɛ hanle bɛ na bɛ nwo wozole bɛ. 19Bɛgyinlanle moa moa na bɛhanle bɛhilele Mosisi kɛ, “Wɔmɔ tendɛ kile yɛ na yɛbade. Mmamaa Nyamenle tendɛ kile yɛ, anrɛɛ yɛkɛwu.”
20Na Mosisi hanle hilele menli ne kɛ, “Bɛmmasulo, ɔluakɛ Nyamenle ɛra kɛ ɔbazɔ bɛ yeanlea, amaa bɛazulo ye dahuu na bɛanyɛ ɛtane.” 21Menli ne gyinlanle moa moa na Mosisi bikyele awozinli kabikabi ne, ɛleka mɔɔ Nyamenle wɔ la.
Azukponle nwo mɛla
22Na Ɛdɛnkɛma zele Mosisi kɛ, “Ɛhye yɛɛ ɛbaha wɔahile Yizilayɛma a: Bɛdabɛ bɛnwu ye bɛ nye zo kɛ mevi anwuma me nee wɔ ɛdendɛ. 23Bɛmmafa dwɛtɛ fufule bɛyɛ awozonle bɛboka me nwo, anzɛɛ bɛmmafa ezukoa nvutuke bɛyɛ awozonle bɛmaa bɛ nwo. 24Bɛzi ndɛtɛlɛ azukponle bɛmaa me na bɛva bɛ mboane nee nlankɛ azubɔdeɛ ne mɔ bɛbɔ ɛyelalɛ azu nee anzonudwolɛ azu wɔ zolɛ bɛmaa me. Ɛleka biala mɔɔ menwɔze bɛ kɛ bɛzonle me la, mebara mearayila bɛ. 25#Mɛla 27.5-7 Saa bɛfa awolɛ a bɛazi azukponle bɛamaa me a, anrɛɛ bɛmmafa bulalɛ bɛkyekyɛ nwolɛ, ɔluakɛ saa bɛfa bulalɛ bɛkyekyɛ nwolɛ a, ɛnee bɛgua nwolɛ evinli. 26Bɛmmasi azukponle mɔɔ kpolike wɔ ɔ nyunlu mɔɔ bɛtietia zo na bɛahɔ zolɛ la bɛmaa me; saa bɛyɛ ye zɔhane na awie se kɛ ɔfo a, awie kɛnwu kɛ ɔ nwo la zolɛ.
Currently Selected:
Ade 20: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
