Ade 19
19
Yizilayɛma wɔ Saenae Boka
1-2Mɔɔ Yizilayɛma vile Yigyibiti la, ye siane nsa ne na ye kenle ne mɔɔ lumua la bɛdwule Saenae fienemgbole ne anu. Akee mɔɔ bɛvi Relɛfedem bɛrale Saenae fienemgbole ne anu la, bɛrazokoɛle Boka Saenae abo ɛkɛ. 3Na Mosisi vole boka ne kɛ ɔkayia Nyamenle.
Ɛdɛnkɛma vɛlɛle ye boka ne azo zele ye kɛ, “Ɛhye yɛɛ ɛbaha wɔahile Gyekɔbo abo zo amra ne a: Ka kile Yizilayɛma ne kɛ, 4‘Bɛnwunle mɔɔ medame Ɛdɛnkɛma menvale menyɛle Yigyibitima, na menvale bɛ wɔ kɔleɛ ndɛbalɛ zo membale me nwo ɛke la. 5#Mɛla 7.6; 14.2; 26.18; Tae 2.14 Yemɔti saa bɛtie me ne na bɛdi me ngyekyeleɛ ne azo a, bɛbayɛ me ɛdeɛ wɔ maanle maanle kɔsɔɔti avinli, ɔluakɛ azɛlɛ ne kɔsɔɔti le me ɛdeɛ. 6Bɛbayɛ me maanle nwuanzanwuanza na bɛazonle me kɛ bɛle me sɛlɛvolɛma. Ɛhye a le edwɛkɛ mɔɔ ɛbaha wɔahile Yizilayɛma a.’ ” 7Yemɔti Mosisi ziale rale; ɔvɛlɛle Yizilayɛ mgbanyima ne mɔ na ɔvale mɔɔ Ɛdɛnkɛma ɛha ɛhile ye la ɔdole bɛ nyunlu. 8Na menli ne kɔsɔɔti anloa hɔle ko hanle kɛ, “Debie biala mɔɔ Ɛdɛnkɛma ɛha la, yɛbayɛ.” Na Mosisi hanle mɔɔ menli ne hanle la hilele Ɛdɛnkɛma.
9Na Ɛdɛnkɛma zele Mosisi kɛ, “Nea, mebalua amungu kumɔɔnwo bie anu meara, amaa saa me nee wɔ ɛlɛtendɛ a, menli ne ade me ne na bɛalie wɔ bɛali dahuu.”
Akee Mosisi hanle mɔɔ menli ne hanle la hilele Ɛdɛnkɛma. 10Na Ɛdɛnkɛma zele Mosisi kɛ, “Kɔ na kɔnlua menli ne ɛnɛ nee ɛhyema, bɛkpo bɛ nwo ninyɛne, 11na maa bɛboɔboa bɛ nwo ɛhyema anzi, ɔluakɛ ye kenle nsa ne azo medame Ɛdɛnkɛma, mebadwu aze wɔ Boka Saenae azo, wɔ menli ne kɔsɔɔti anye zo. 12#Hib 12.18-20 Gya anyiane, amaa menli ne ambɔ andɛla, na ka kile bɛ kɛ, ‘Bɛnlea boɛ na bɛ biala anvo boka ne azo anzɛɛ ambikye nwolɛ bɔbɔ. Awie biala mɔɔ kɛzie ɔ ti boka ne anwo la, bɛkɛhu ye. 13Bɛbazi ye awolɛ anzɛɛ bɛbado ye ɛda na awie biala ɛnrɛzɔ ye, saa sonla anzɛɛ nane o, ɔwɔ kɛ ɔwu.’ Na saa bɛbɔ aweɛne tendenle ne anu tendenle ko a, bɛvo boka ne azo.”
14Yemɔti Mosisi vi boka ne azo dwule rale menli ne anwo ɛkɛ na ɔranluanle bɛ, na bɛkpole bɛ nwo ninyɛne. 15Ɔzele menli ne kɛ, “Bɛboɔboa bɛ nwo toonwo ɛhyema anzi; awie biala mmakɔ raalɛ nwo.”
16Kenle nsa ne azo nwonlomɔ ne, ezule hulule na maanle nu vedevedele. Amungu kumɔɔnwo hedale boka ne azo, bɛwule aweɛne tendenle ne anu tendenle bie, na menli ne mɔɔ wɔ azokoɛleɛ ɛkɛ ne la amuala anwo wozole bɛ. 17Akee Mosisi vale menli ne kɔsɔɔti vile azokoɛleɛ ɛkɛ ne hɔle kɛ bɛkayia Nyamenle. Awie biala kpondɛle ɛleka gyinlanle wɔ boka ne abo. 18Na esike hedale Boka Saenae azo, ɔboalekɛ Ɛdɛnkɛma dwule zo kɛ senle la, na esike ne hɔle anwuma kɛ fonlomo esike la, na boka mumua ne kpusule kpole bie. 19Mekɛ mɔɔ ɛnee aweɛne tendenle ne ane ɛlɛkɔ anwuma kpalɛ la, Mosisi dendɛle, na Nyamenle vale ɛhululɛ liele ye zo. 20Na Ɛdɛnkɛma dwule Boka Saenae azo. Ɔvɛlɛle Mosisi na Mosisi hɔle boka ne azo. 21Ɛdɛnkɛma zele Mosisi kɛ, “Sia kɔ aze na bɔ menli ne kɔkɔ, anrɛɛ bɛkɛtele zolɛ kɛ bɛbanlea Ɛdɛnkɛma na bɛ dɔɔnwo awu. 22Eza maa sɛlɛvolɛma ne mɔ mɔɔ bikye Ɛdɛnkɛma la ɛnlua bɛ nwo na anrɛɛ Ɛdɛnkɛma kɛdua bɛ kakɛ.”
23Na Mosisi hanle hilele Ɛdɛnkɛma kɛ, “Menli ne mɔ ba Boka Saenae azo a ɔnyɛ boɛ, ɔluakɛ ɛdawɔ mumua ne ɛzele yɛ kɛ, ‘Bɛgya boka ne anyiane na bɛdu bɛmaa me.’ ”
24Na Ɛdɛnkɛma zele yɛ kɛ, “Dwu aze na ɛ nee Aalɔn bɛrɛla. Mmamaa sɛlɛvolɛma nee menli ne tɛla anyiane ne ba medame Ɛdɛnkɛma me nwo ɛke, anrɛɛ menwɔdua bɛ kakɛ.” 25Yemɔti Mosisi dwule aze hɔhanle edwɛkɛ mɔɔ Ɛdɛnkɛma hanle la hilele menli ne.
Currently Selected:
Ade 19: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
