Ade 21
21
Kɛ bɛsi bɛyɛ ahanra la
(Mɛla 15.12-18)
1“Fa mɛla ɛhye mɔ maa Yizilayɛma: 2#Sɛlɛ 25.39-46 Saa bɛtɔ Hibulunli kanra a, ɔwɔ kɛ ɔsonle ɛvolɛ nsia. Ɛvolɛ nsuu ne azo ɔwɔ kɛ ɔnyia fanwodi na ɔkɔ, mɔɔ ɔndua ɛhwee a. 3Saa ɔba la ɔrale ye baholɛ a, ɔwɔ kɛ ɔkɔ ye baholɛ; saa ɔ nee ɔ ye a, ɔwɔ kɛ ɔ nee ɔ ye kɔ. 4Saa ɔ menle ne gya raalɛ maa ye na ɔ nee ye wo mralɛ mrenya anzɛɛ mralɛ mraalɛ na saa ɔnyia ye fanwodi, na ɔlɛkɔ a, raalɛ ne nee mralɛ ne mɔ le ɔ menle ne ɛdeɛ. Ɔ ngomekye a ɔwɔ kɛ ɔkɔ a. 5Na saa kanranli ne ka ye wienyi kɛ, ‘Mekulo me menle ne, me ye nee me mra ne; menrɛhɔ’ a, 6ɛnee ɔ menle ne ɛva ye ɛhɔ Nyamenle ɛzonlenlɛ ɛleka ne anlenkɛ ne anwo anzɛɛ anlenkɛ ne felɛmo ne anwo na ɔ menle ne ɛva ketera#21.6 Ketera: Agbuyia mɔɔ bɛfa bɛkpomgba bɛle anzɛɛ bigyim la. ɛfiti ɔ nzo na akee ɔzonle ɔ menle ne toonwo ɔwu.
7“Saa nrenya tɔne ɔ ra raalɛ kɛ kanranli a, ɔnle kɛ ɔnyia fanwodi kɛ mrenya ne mɔ la. 8Saa ɔ menle ne mɔɔ dɔle ye kɛ ɔfa ye yeayɛ ɔ ye la anye ɛnlie ɔ nwo a, ɔmaa bɛkpɔne ye; ɔnlɛ adenle ɔndɔne ye ɔmmaa maanle gyɛne nu sonla, ɔluakɛ yeanyɛ ye boɛ yeammaa ye. 9Saa ɔfa ye ɔmaa ɔ ra nrenya gya ye a, ɔwɔ kɛ ɔfa ye ɔyɛ ɔ ra raalɛ. 10Saa ɔgya raalɛ bieko ɔboka ɔ nwo a, ɔnlɛ adenle ɔnde ye aleɛ, ndanlɛ nee agyalɛ gyinlabelɛ biala mɔɔ ɔlɛ la azo. 11Saa yeanyɛ ninyɛne nsa ɛhye mɔ yeammaa ye a, raalɛ ne lɛ adenle fa ɔ nwo di, mɔɔ ɔndua ɛhwee a.
Kpukpokpukpo nyɛleɛ nwo mɛla
12 #
Sɛlɛ 24.17
“Awie biala mɔɔ kɛbɔ ɔ gɔnwo kɛhu ye la, ɔwɔ kɛ bɛku ye. 13#Ɛdi 35.10-34; Mɛla 19.1-13; Dwɔ 20.1-9 Na saa yeandwenle nwolɛ yeanzie dɛba, na Nyamenle a ɛmaa yedɔ ɔ sa nu a, ahenle kola nriandi kɔ ɛleka mɔɔ menwɔhile la, amaa yeanyia ɔ ti. 14Na saa sonla anye fuu teta ɔ gɔnwo ku ye a, bɛhɔhwe ye bɛvi me azukponle ne anwo bɛhu ye.
15“Awie biala mɔɔ kɛbɔ ɔ ze anzɛɛ ɔ nli la, bɛhu ye.
16 #
Mɛla 24.7
“Awie biala mɔɔ kɛwua sonla kɛ ɔtɔne ye anzɛɛ bɛkɛnwu kɛ yeva ye yevea la, bɛhu ye.
17 #
Sɛlɛ 20.9; Mat 15.4; Mak 7.10 “Awie biala mɔɔ kɛwa ɔ ze anzɛɛ ɔ nli amonle la, bɛhu ye.
18-19“Saa menli nwiɔ ko na ko fa bolɛ anzɛɛ sua kutuku bɔ ɔ gɔnwo ne to aze, na yeanwu na ɔbɔ ye anwonyane ala a, ɔnle kɛ bɛtua ye nwolɛ kakɛ. Saa ahenle dwazo na ɔkola ɔtia kpɔma nwo a, ɔwɔ kɛ nuhua ne mɔɔ bɔle ɔ gɔnwo ne la tua ye adondohonle kakɛ ne nee mekɛ dodo mɔɔ yeanva yeanyɛ gyima la kakɛ.
20“Saa awie bɔ ye kanranli, nrenya anzɛɛ raalɛ maa ɔka ɔ sa nu a, ɔwɔ kɛ bɛtea ye. 21Na saa kanranli ne di kenle ko anzɛɛ kenle nwiɔ na yeawu a, ɔnle kɛ bɛtea ye, ɔluakɛ kanranli ne le ye ezukoa. 22Saa mrenya nwiɔ ɛlɛko na bɛsi raalɛ nrenzɛvolɛ, na ɔ ko ne kpɔne, na nrenzɛvolɛ mumua ne amboda a, ɔwɔ kɛ bɛtwe ahenle mɔɔ zile ye la anzo. Ezukoa bolɛ biala mɔɔ nrenzɛvolɛ ne ɔ hu kɛbɔ la, saa ndɛnebuavolɛma die to nu a, ɔwɔ kɛ ahenle ne tua. 23Na saa nrenzɛvolɛ ne anwo bu ɛbonle a, ɛnee yemɔ, ɔbayɛ mɔɔ ɛku ɛ gɔnwo a bɛku wɔ, 24ɛbɔ ɛ gɔnwo anye a bɛbɔ ɛ nye, ɛtu ɛ gɔnwo agye a bɛtu ɛ gye, ɛpɛ ɛ gɔnwo asa a bɛpɛ ɛ sa, ɛpɛ ɛ gɔnwo agyakɛ a bɛpɛ ɛ gyakɛ, 25ɛyela ɛ gɔnwo a bɛyela wɔ bie, ɛboda ɛ gɔnwo a bɛboda ɛdawɔ, yɛɛ ɛbɔ ɛ gɔnwo ɛkpolokpolo ɔ nwo a bɛbɔ ɛdawɔ bɛmaa ɛ nwo kpolokpolo.
26“Saa awie kpakye ye kanranli nrenya anzɛɛ raalɛ anye zo maa ɔ nye bɔ a, ɔ nye ne ati, kanranli ne fa ɔ nwo di. 27Saa ɔbɔ ye kanranli nrenya anzɛɛ raalɛ ne ɔmaa ɔ gye tu a, ɔ gye ne ati, ɔwɔ kɛ ɔfa ɔ nwo ɔdi.
Menlenlɛma gyima
28“Saa ɛnlankɛ nyinli fa ye mɛne wɔ awie, nrenya anzɛɛ raalɛ ku ye a, ɔwɔ kɛ bɛsi ye awolɛ bɛku ye, ɔnle kɛ bɛdi ye nane; ɔnle kɛ bɛyɛ ɔ menle ne ɛhwee. 29Na saa ɔle ɛnlankɛ nyinli ne gyima mɔɔ ɔdi ye dɛba, na bɛbɔ ɔ menle kɔkɔ, na yeanva ye yeanzie, na ɔku sonla nrenya anzɛɛ raalɛ a, ɔwɔ kɛ bɛsi ɛnlankɛ ne awolɛ bɛku ye na bɛku ɔ menle ne ɔdaye. 30Na saa bɛse ye kɛ ɔdua ezukoa ɔdɔ ye ngoane a, yemɔ bolɛ biala mɔɔ bɛkɛbɔ la, ɔwɔ kɛ ɔtua. 31Saa ɛnlankɛ ne ku awie ara nrenya anzɛɛ raalɛ a, mɛla ko ne ala azo yɛɛ ɔwɔ kɛ bɛgyinla bɛ nee ye di a. 32Saa ɛnlankɛ nyinli ne ku kanranli, nrenya anzɛɛ raalɛ a, ɔwɔ kɛ ɔ menle ne tua dwɛtɛ fufule abulasa maa kanranli ne amenle na bɛsi ɛnlankɛ ne awolɛ bɛku ye.
33“Saa awie angeda ye kuma mɔɔ yevu la azo, anzɛɛ ɔfu kuma na yeandua ye na ɛnlankɛ nyinli anzɛɛ asoaso tɔ nu a, 34ɔwɔ kɛ ahenle mɔɔ vunle kuma ne la tua ɛnlankɛ ne kakɛ maa ɔ menle na ɔfa nane funli ne. 35Saa awie ɛnlankɛ nyinli ku awie ɛnlankɛ a, ɔwɔ kɛ bɛtɔne ɛnlankɛ nyinli anyewɔzo ne na bɛkyɛ ezukoa ne, na eza bɛkyɛ nane ne mɔɔ ɛwu la nane ne.
36“Na saa bɛnwu kɛ ɔle ɛnlankɛ nyinli ne gyima kɛ ɔsisi awie mɔ nlankɛ yɛɛ ɔ menle ne anva ye anzie ɛdeɛ a, ɔbava ɛnlankɛ ne bie yeazie mɔɔ ɛwu la abo zo na yeava ɛnlankɛ funli ne.
Currently Selected:
Ade 21: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
