Waroma 4

Kilaga cha Abrahamu Tata wa nhamanilo kina mhiko

1Avo tulongeze? Abrahamu tata wetu wa uhenga kwa kimunhu, kavyonaze? 2Kwa mzoko ihawa Abrahamu kapetigwa mwihoko kwa kilumbo cha sanghano zake, kanajo ja kwitopela, komu hameso ga Mulungu haduhu! 3Kumbe Jandiko jolongaze? Abrahamu kamtamanila Mulungu, kileka yapetigwe kamba mwene ihoko. 4Bali munhu msanghani hagolelwa kitumetume chake kamba mhome iyogwelelwa, komu icho kitumetume kimwandakane. 5Avino yahawa munhu si msanghani, bali yomtamanila Yuja yawenghaga mgoloko waja walekile kumdumba Mulungu, avo hiyo kogolelwa mgoloko kwa kumtamanila Mulungu. 6Vivo viyolonga na heyo Daudi, kammoteza munhu yuja, Mulungu iyampetile mwene mgoloko na igambe haivikiza Inzuma. Kalonga,

7Wene belabela iwo wawo wasegezelwe gehile,

wagubikilwe matozo.

8Mwene belabela yuyo imunhu yuja, Bwana yalekile kumpetela matozo gake.

9Avo wamotile hivo, iwo waja wengile dikumbi, hebu waja walekile kwingila?

Kwa mzoko tolonga, Abrahamu kagesigwa muna umgoloko kwa kumtamanila Mulungu, 10Ikala zuwaki viyagesigwe hivo? Haja hayengile dikumbi, hebu haja hayakalile tanhu hanakwingila? Nyagiza aho viyakalile tanhu hanakwingila, si haja hayamalile kwingila! 11Viyemela kengila dikumbi, giladi yenghigwe lagusilo digambe kamba utango wa mgoloko uja ulawile muna inhamanilo haja hayakalile tanhu hanakwingila; avo heyo kagalamka tata wawo wose wonda wamtamanile Mulungu naigambe hawengizwe kumbi; kilumbo na hewo wagesigwe kamba wamumo muna umgoloko. 12Avo vivo yuyo tata wawo wengile dikumbi; siwo waja wengile kunze yeka, bali vivo tata wawo wene kukola zinyayo za tata wetu Abrahamu za kumtamanila Mulungu haja hayakalile hanakwingila kumbi.

Wene kumtogola Mulungu wokwinghigwa ikilaga

13Kilumbo Nzuma si iyo imwinghile Abrahamu hebu waja wa ulelwa wake kilagano kija kamba “uhalali wako uwo ulumwengu wose”; hicho kagolelwa kwa mgoloko ulawile kwa Mulungu kilumbo cha kumtamanila. 14Kwa mzoko kamba wene kuigoga nzuma wabokele uhalali, kumtamanila Mulungu kuhawile yamba, kabili kija ikilagano nacho maza vino kihawile kimalile kutengulwa.

15Kilumbo Nzuma iyo igalile Lusango yeka, bali kamba haduhu Nzuma, maza na matozo gahawile kuduhu.

16Avo wene kumtamanila Mulungu wawo wonda wenghigwe kija ikilagano, chowenela hewo wose wagambile mlelwa wake, si kamba wene kuigoga inzuma iyeka, bali na hewo wene kuikoleleza nzila yake Abrahamu ija ya kumtamanila Mulungu; heyo yali tata wetu tweye chose. 17Kamba viyandikigwe, Nikwika ugalamke tata wa ngholo bwando. Kwa mzoko kamtamanila Mulungu yuja yowabweza wadanganike kuugima, Yovikema vili haduhu viwe baho. 18Bahaja hayakalile bule cha kubeta chochose, kabasiliza kukitamanila kiyobeta kamba, kogalamka tata wa ngholo bwando, kamba viyalongelwe, avo vivo wa ulelwa wako vondawawe bwando (kamba nhondo za kuulanga). 19Kabili hahungule kumtamanila Mulungu avija viyawene lukuli lwake vilulalile, kwa mzoko kakala na milongo kamba muzo umwe; hebu hagesile ulazi wa Sara mamo wetu. 20Bali kija kilagano cha Mulungu halemelwe kukitamanila, komu nhamanilo imgwelela mhiko za kumtuniza Mulungu. 21Kwa mzoko kagagoga mmoyo gayamanyile kamba, Heyo kana mhiko za kuduganya gaja gayalagane.

22Avo vivo yagelegezwe kamba mwene ihoko. 23Komu hijo hajandikigwe kwa mzoko wake yaliyeka, kamba kapetelwa mwihoko. 24Komu na kilumbo chetu tweye giladi tupetigwe vivo wene ihoko, tuhamtamanila Heyo yamzusile Mndewa wetu Yesu kulawa kwa wafile. 25Yuyo yahonzigwe kwa kilumbo cha ubananzi wetu, kazuswa giladi na tweye tupetigwe muli ihoko.

Currently Selected:

Waroma 4: ZAM75

Highlight

Copy