Waroma 5

Unogelo witilwe na iloho mmiyoyo yetu

1Vino sambi vitugolelwe ihoko kwa kumtamanila Yesu, tuziga kwinghigwa hongela kumwake Mulungu kilumbo cha Mndewa wetu Yesu Kristo. 2Heyo yuyo yatubabazulile nzila ya kudivikila golelo dino ditukalila, kileka tokitopela nyalizo ya iyenzi ija, Mulungu yonda yatwinghe.

3Si kino kiyeka, komu tokitopela na mgazo, kilumbo tuvimanya kamba mgazo wogala lwazaganyo. 4Na lwazaganyo lugalaga ungʼamu; na ungʼamu ugalaga kibetigwa. 5Na hicho kibetigwa kahi hakitukonga, kilumbo unogelo wa Mulungu witilwa mmiyoyo yetu na Loho Yangʼalile hugwelelwe. 6Kwa mzoko tweye tukala tuli bule ludabwa; komu iho kipigiti vikivikile, Kristo kadanganika kwa kilumbo chetu tweye, hatumdumbaga Mulungu.

7Vokuwa vigaga munhu kuvumila yakomwe kilumbo cha mwene ihoko; vyodahika munhu kuvumila yadanganike kilumbo cha munhu yanogile umoyo. 8Komu Mulungu kabanza kulavanya nogelo jake kumwetu chalinze aho, Kristo hayafile kwa kilumbo chetu tweye haja hatukalile na matozo. 9Avino mulopa wake vuutwinghile ugolofu, che, honda tu-banze kukomboligwa na heyo, lusango sukulutwandame? 10Kilumbo haja hatukalile tumwihila Mulungu, katuduganya nayo muna ikifo cha Mwanage; leka dija ja ukuduganywa, dibanzile nghani ijo dino ja ukukombolwa muna uugima wake! 11Kabili si higo gaiyeka gotwitopela, bali tokiimozamoza ha Mulungu kwa kilumbo cha Mndewa wetu Yesu Kristo, kwa kitando avino sambi tugolelwa nghomboka kulawa kumwake.

Adamu katugalila kifo; upile uvika na Yesu

12Mbuli iyo ino, matozo gengizwa mulumwengu na munhu yumwe; imala baho danganiko dingizwa na matozo, na kifo kiwavikila wanhu wose, kwa mzoko wose watoza.

13Matozo gakala mulumwengu, Inzuma viikalile hainalavigwa, bali matozo hagapetigwe kilumbo Inzuma haduhu. 14Komu kulawa Adamu kuvikila Mose kifo kigoga undewa kwa viumbigwe vyose, hata kwa waja walekile kutoza vigambile Adamu kwa kuibananga ndagizo.

Na heyo Adamu yuyo utango wa kumfambula yuja yondayeze kuchugu (Kristo). 15Bali kutoza vukuwaga, uja unozi wa Mulungu ubanza nghani; kilumbo waja wafile kwa mzoko wa tozo jake yuja yumwe, wahali bwando, avo golelo ja Mulungu tugolelwa kwa uholo wa yuja imonga Yesu Kristo, wobanza kwenela bwando.

16Kabili mhome haiduganye na yuja mbananzi yumwe; kilumbo nhaguso yake yuja yumwe igalile kwangamila, bali golelo ja uholo dosegeza matozo gawo bwando, diwapetela ihoko.

17Kabili ihawa tozo da imonga dijo digalile undewa wa kifo, che, honda wabanze nghani waja wabokele unozi bwando na ija inhogo ya ihoko, kwiza wagalamke wandewa muna uugima wa yuja imonga, Yesu Kristo?

18Avo ivo vino, tozo da yumwe diwagela wose mkwangamila; vivija yuja imonga viyamtegeleze Tataake, wanhu wose wopetigwa ihoko muna uugima. 19Kilumbo kwa kutoza munhu yumwe, wanhu bwando wengizwa hamwe muna gamatozo; avo vivo kwa kuvumila kwake imonga, wanhu bwando wengizwa muna ihoko.

20Na Inzuma ingila iho hagati, giladi matozo gongezeke; avo matozo vigawile bwando, baho uholo ubwagala. 21Na kamba vija matozo vigagogile undewa wa kukoma wanhu, vivo uholo nawo vondaugoge undewa wa kuwagolela wanhu ugima wa digunge na digunge, kwa mhiko za ihoko zitugolelwe na Mndewa wetu Yesu Kristo.

Currently Selected:

Waroma 5: ZAM75

Highlight

Copy