Waroma 3
3
Habali wanhu wose wafungigwa na matozo
1Avo muyuda kabanza choni; na kwingila kumbi kotaza choni? 2Kotaza nghani kwa nzila zose; haichanduso wenghigwa malonga ga Mulungu. 3Viyemela wayagwe walema kugatamanila; che, kulema kwawo kogwisa kilaga cha Mulungu? 4Aka sivivo; bali Mulungu yatangike kamba yuyo Mwene ihoko, na munhu yatangike kumbe mwene utungulu, kamba viyandikigwe,
Giladi upetigwe kamba Mwene ihoko muulonzi wako,
ukahume vonda wingile mkitala.
5Avo ubananzi wetu uhasindila unovu wa Mulungu, tulongeze; che, Mulungu kalutozela kamba yahatugalila lusango? (nolonga higo kamba vigambile munhu!) 6Aka sivivo; kilumbo Mulungu yuyo Mtagusi wa ulumwengu wose. 7Komu ihawa uvwizi wangu wolavanya ihoko ya Mulungu giladi ibanze kulawilila yene nhogolwa, avo notaguswa vilihi kamba niye na mbananzi? 8Habali wayagwe wotuvwizila kamba tulonga, Natutende gehile giladi ganogile galawilile? vivo chandakane kitala chawo! 9Avo vilihi; tweye Waisraeli towabanza Wamhazi? aka nobela, kilumbo nimala kuwalongela kamba wose, Wayuda na Wagriki watendaga matozo. 10Vivo viyandikigwe,
Haduhu yagoloke hata yumwe.
11Haduhu mwene nzewele;
haduhu yomzahila Mulungu.
12Wose hamonga waga mnzila, wahohotoka wose;
haduhu yotenda ganogile, haduhu hata yumwe.
13Mimelo yawo igalamka mikabuli igubuke;
milimi yawo yogesa utungulu yeka,
na sungu ya nyoka yamumo mmilomo yawo.
14Mimelezelo yawo imema maligo na midumilizo.
15Migulu yawo icholaga mbwisa kwita mulopa.
16Ubananzi na yakiyaki yamumo mnzila zawo.
17Na nzila ya tindiwalo hawaimanyile.
18Viyemela kumdumba Mulungu mduhu mmeso gawo.
19Komu tweye tuvitanga Inzuma yose viilonga, iwalongela waja wene kuigoga Inzuma, giladi mulomo wa munhu wowose unyamale, na ulumwengu wose wandamwe na kitala cha Mulungu. 20Kwa mzoko haduhu mwene lukuli lwa kimunhu yonda yapetigwe ihoko, kamba kagatenda ga Inzuma, kilumbo Inzuma iyo ilagusilaga matozo.
Topetigwa ihoko yamba tuhamgoga Kristo
21Komu vino sambi ihoko ya Mulungu igubuligwa taya hali bule Nzuma; ihoko hiyo isindilwa muinzuma hamonga na Walaguzi. 22Nolonga mgoloko wa Mulungu uwo usongaga kumtogola Yesu Kristo, kabili wose wene kumtamanila wogwelelwa ihoko; kilumbo haduhu yobanza miyage. 23Kwa mzoko wose wabananga, wagilwa na fufula jawo ja iyenzi ya Mulungu. 24Kileka wenghigwe uholo wa kugoloka yamba kwa nzila ya ugombozi wa Yesu Kristo.
25Heyo Mulungu kamwika kiguo cha mpaka kwa nzila ya kuutamanila mulopa wake, giladi yalagusile ihoko yake viili, kwa kuwasegezela matozo gose galongole. 26Ago Mulungu gayazaganye, komu kipigiti kino kolagila ihoko, kilumbo Mwenyecho yuyo Mwene Ihoko, yampetele ihoko yuja yonda yamtamanile Yesu.
27Avo tokitopela choni? che, kwa mzoko wa kusanghana? Aka, haduhu kinhu; Kwa kilumbo cha inzuma ilihi? kwa mzoko wa inzuma ya sambi ilondaga nhamanilo! 28Avo todigoga dino kamba, Munhu kopetigwa ihoko kwa kumtamanila Mulungu, viyemela na yaleke kuvikiza Inzuma.
29Che, hebu Mulungu yuyo Mulungu wa Waisraeli waiyeka? heyo si Mulungu wa wanhu wose? Avo vivo yuyo Mulungu wa wanhu wose! 30Kilumbo Mulungu iyo Yumwe yonda yawapetele waja wengile kumbi wene ihoko muna inhamanilo, na waja walekile kwingila kumbi kowapetela ihoko kwa nzila iija ya nhamanilo.
31Che, toinengula Inzuma kwa nhamanilo hiyo? Aka sivivo, bali toigangamiza Inzuma.
Currently Selected:
Waroma 3: ZAM75
Highlight
Share
Copy
Want to have your highlights saved across all your devices? Sign up or sign in
New Testament in Zaramo © United Bible Societies, 1975.
