ETUNDILO 9
9
1Yehova yu wa popia la Mose hati, Kuende ku Fareo, ko sapuile huti, Ca popia Yehova, Suku ya va Heveru ceci, hati, A ece omanu vange oco va ka fendele. 2Momo nda wa va lamẽlẽla okuti ku tava oku va eca, 3tala! eka lia Yehova il veta ovinyama viove vi li vusenge, otuvalu, lovimbulu kuenda olongamelo loviunda violongombe levi violomeme lolohombo. Ku kala ociyefu ca kãla enene. 4Puãi Yehova o tepisa pokati kovinyama via va Isareli lovinyama via va Egito okuti kovinyama viosi via va Isareli ka pa fi cimue. 5Kuenje Yehova wa tukula eteke liaco, hati, Hẽla Yehova o linga ocina eci vofeka. 6Hẽla liaco oco Yehova wa ci linga. Oviunda viosi via va Egito via fa, puãi povinyama via va Isareli lacimue ca fapo. 7Fareo wa tuma oku kulĩhĩsa kuenje pokati kovinyama via va Isareli lacimue ca fapo. Puãi utima wa Fareo wa tĩla, kuenje ka tavele oku eca omanu.
8Yehova yu wa popia la Mose kuenda Arone, hati, Yoyi apupu etiko liovofolono, Mose a limbile vilu kovaso a Fareo. 9Li linga oneketela kofeka yosi ye Egito, li kokela omanu lovinyama ovipumbu layuya kofeka yosi ye Egito. 10Ovo va yoya etiko liovofolono, va talama kovaso a Fareo, kuenje Mose wa li imba vilu. Lia kokela omanu lovinyama ovipumbu layuya. 11Vakualumbu ka va tẽlele oku talama kovaso a Mose omo ovipumbu via lua, omo vakualumbu va velavo ovipumbu kumosi la va Egito vosi. 12Puãi Yehova wa tĩlĩsa utima wa Fareo kuenje ka va yevele. Ndomo Yehova a popia la Mose haimo ca pita.
13Yehova wa popia la Mose hati, Pasuka omẽle ociteketeke. Kuende, ha talame kovaso a Fareo. Popia laye huti, Ca popia Yehova, suku ya va Heveru, ceci, hati, Eca omanu vange oco va ka fendele. 14Cilo hu yambula layambulo ange osi. Njambulavo akuenje vove lomanu vove, oco o limbuka okuti kuosi kilu lieve ka kuli wa lisoka lame. 15Momo cilo nda ndoluĩle ale eka liange oku ku veta lefengi ove lomanu vove, okuti nda wa tetiwile kilu lieve. 16Puãi nda tava oku popela omuenyo wove okuti hu lekisa unene wange, onduko yange ha yi tukuiwa kilu lieve liosi. 17Lopo wa tilĩsila omanu vange utima wove kuenje ku tava oku va eca. 18Oco hẽla muẽle pekumbi ndopo, ndokisa ociwe ca kãla okuti ve Egito ka mua la kala ociwe ndoco tunde kefetikilo liayo toke ketali lilo. 19Oco cilo tuma lombili oku iñisa olongombe viove lovinyama viosi o kasi lavio vusenge. Momo ociwe ci lokila omanu vosi lovinyama viosi vi kasi vusenge okuti ka va vi nenele vimbo, kuenje vi fa. 20Oco pokati kakuenje va Fareo, wosi wa sumbila ondaka ya Yehova wa iñisa akuenje vaye lovinyama viaye volonjo. 21Puãi wosi ka sumbilile ondako ya Yehova wa sia akuenje vaye lovinyama viaye vusenge.
22Yehova wa popia la Mose hati, Oluĩla eka liove kilu cokuti ku kala ociwe kofeka yosi ye Egito, komunu, kocinyama lokovikũla viosi viovovapia, kofeka yosi ye Egito. 23Oco Mose woluĩla ombueti yaye kilu kuenje Yehova wa tuma ocilemĩlo lociwe. Ondalu layovo ya lokila posi. Yehova muẽle wa lola ociwe kofeka ye Egito. 24Oco kua kala ociwe, londalu ya liakoka ño pokati kociwe. Ociwe caco ca kãla enene. Ca soka laco ka kua la kala kofeka ye Egito tunde apa ya linga ofeka. 25Ociwe caco ca nyõla cosi ca kala vusenge vofeka yosi ye Egito, lomunu locinyama. Ociwe ca nyõlavo ovikũla viosi viovovapia, ca teya oviti viosi viovusenge. 26Kofeka ya Gosene, oko kua kala va Isareli, oko lika ka kua pitile ociwe.
27Oco Fareo wa tumĩla Mose la Arone, wa popia lavo hati, Cilo nda lueya muẽle, Yehova ukuesunga, ame lomanu vange tuakuahuku. 28Likutilili ku Yehova, momo okukanãla kuaco lociwe ku tẽla. Ndu weci ka vu kala vali kulo. 29Mose wa popia laye hati, Tuli nunda vimbo ngoluĩla ovaka ku Yehova. Ovilemĩlo vi ũha, ka ku kala vali ociwe, kuenje ove o limbuka okuti oluali luosi lua Yehova. 30Ove puãi lakuenje vove ndo kulĩhi okuti ka wa sumbili handi Yehova Suku. 31Elinyu losevata via nyolẽha, momo osevata ya pulũla ale lelinyu lia temũla ale. 32Puãi otiliku losendeyu ka via nyolẽhele omo ka via kolele handi. 33Oco Mose wa tunda ku Fareo, wa enda, woluĩla ovaka ku yehova, kuenje oku kanãla lociwe via imũha, ombela ka ya lokele vali. 34Puãi eci Fareo a mõla okuti ombela lociwe loku kanãla via imũha oco wa linga vali ekandu, wa tĩlĩsa utima waye, eye lakuenje vaye. 35Utima wa Fareo wa tila kuenje ka ecele va Isareli. Ndomo Yehova a popia la Mose haimo ca pita.
Currently Selected:
ETUNDILO 9: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
