ETUNDILO 8
8
1Oco Yehova wa popia la Mose hati, Kuende ku Fareo, ka popie laye huti, Ca popia Yehova ceci, hati, Eca omanu vange okuti va fendela. 2Puãi nda ku tava oku va eca njambula ovikanjo viove viosi lovinonga. 3Olui Nilu lu yuka to lovinonga. Vi lamana, viñila vonjo yove lovohondo yove yoku pekela, lopula wove, lovolonjo viakuenje vove lomanu vove, lovolofolono viove, lovovimanda violombolo. 4Ovinonga vi ku lombokaila ove, vi lombokailavo komanu vove lokovakuenje vove vosi. 5Yehova wa popia la Mose hati, Popia la Arone huti, Oluĩla eka liove lombueti yove kolondui, kuenda kololekua lokoviva, lamanisila ovinonga kofeka ye Egito. 6Oco Arone woluĩla eka liaye kovava a Egito kuenje ovinonga via lamana, via sikĩlĩla ofeka ye Egito. 7Vakualumbu lavovo haico va linga latutu avo, kuenje va lamanisila ovinonga kofeka ye Egito.
8Fareo wa kovonga Mose la Arone, wa linga hati, Likutilili ku Yehova okuti upa ovinonga kokuange lokomanu vange; kuenje ame ngeca omanu ha va lumbila Yehova ovilumba. 9Oco Mose wa popia la Fareo hati, Va ndinge ohenda, va sapuile otembo hu likutililila ove lakuenje vove lomanu vove, okuti ovinonga viaco vi tunda kokuove lokolonjo viove ha vi siala lika volui. 10Eye hati, Hẽla. Mose hati, Ondaka yove yi lingiwe, oco o limbuke okuti ka kuli u wa soka la Yehova Suku yetu. 11Ovinonga vi tunda kokuove lokolonjo viove lokovakuenje vove lokomanu vove, vi siala lika volui Nilu. 12Kuenje Mose la Arone va tunda ku Fareo. Mose wa vilikiya ku Yehova omo ovinonga vialua, ndeci a likuminya la Fareo. 13Yehova yu wa linga ndondaka ya Mose, kuenje ovinonga via fila volonjo lovovitali lovovapia. 14Kuenje va vi ongolola olondunda, ofeka ye lẽha. 15Fareo puãi, eci a mõla okuti ca pita wa tĩlĩsa utima waye, ka va yevele. Ndomo Yehova a popia haimo ca pita.
16Yehova wa popia la Mose hati, Popia la Arone huti, Olõla ombueti yove, veta oneketela yoposi ha yi lingi olona vofeka yosi ye Egito. 17Haico va linga. Arone wolõla eka lombueti yaye, wa veta oneketela yoposi kuenje komanu lokovinyama kueya olona. Oneketela yosi yoposi ya linga olona vofeka yosi ye Egito. 18Vakualumbu va setekavo latutu avo oku nena olona puãi ka va ci tẽlẽle. Kuenje komanu lokovinyama kua kala olona. 19Vakualumbu va popia la Fareo vati, Eci ca tunda peka lia Suku. Puãi utima wa Fareo wa tĩla, ka va yevele. Ndomo Yehova a popia haimo ca pita.
20Oco Yehova wa popia la Mose, hati, Pasuka omẽle ociteketeke, talamẽla Fareo eci a tunda oku enda kovava. Popia laye huti, Ca popia Yehova ceci, hati, Eca omanu vange okuti va fendela. 21Nda ku tava oku eca omanu vange, numa asunga olonyi kokuove lokovakuenje vove lokomanu vove lovolonjo viove kuenje olonjo via va Egito vi yuka asunga olonyi, ndaño osi apa olonjo vi kasi haico. 22Puãi eteke liaco ndinga okuti ofeka ya Gosene, oko kua tunga omanu vange, yi likalela, ka ku kala asunga olonyi. Oco ove o limbuka okuti kilu lieve liosi ame ndi Yehova. 23Nepisa pokati komanu vange lomanu vove. Hẽla oco ku kala ondimbukiso yaco. 24Kuenje Yehova wa ci linga. Konjo ya Fareo kuenda kolonjo viakuenje vaye kueya asunga olonyi. Vofeka yosi ye Egito mua nyolẽha calua lasunga olonyi.
25Fareo wa kovonga Mose la Arone, wa linga hati, Kuendi, ka lumbili Suku yene ovilumba mũlo vofeka. 26Mose hati, Ka ca sungulukile oku ci linga, omo tu lumbila Yehova Suku yetu eci ci kokela va Egito onyanya. Nda tu lumbila kovaso a va Egito eci ci va kokela onyanya ka va tu sosola hẽ lovawe? 27Te tu enda atulo atatu vekalasoko oco tu lumbila Yehova Suku yetu ovilumba ndeci a tu sapuila. 28Oco Fareo wa linga hati, Ndu weci okuti vu lumbila Yehova Suku yene ovilumba vekalasoko. Puãi ko ka endi enene kupãla, liñutilili. 29Mose wa popia hati, Cilo, kulo kokuove nundako, ngenda ha likutilila ku Yehova okuti hẽla muẽle asunga olonyi a tunda ku Fareo, lokovakuenje vaye lokomanu vaye. Puãi Fareo ka ka linga vali esanda liokuti ka eci omanu ha va endi loku lumbila Yehova ovilumba. 30Kuenje Mose wa tunda ku Fareo, wa enda, wa likutilila ku Yehova. 31Yehova wa linga ndeci Mose a pinga, wopa ku Fareo lokovakuenje vaye, lokomanu vaye asunga aco olonyi, ka kua siale vali limue. 32Puãi onjanja yilo layovo, fareo wa tĩlĩsa utima waye, ka ecele omanu.
Currently Selected:
ETUNDILO 8: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
