ETUNDILO 10
10
1Yehova yu wa popia la Mose hati, Kuende ku Fareo momo nda tĩlĩsa utima waye lovitima via kuenje vaye okuti ndekisa olondimbukiso evi viange pokati kavo. 2Nda ci lingilavo okuti ove o sapula komõlove kuenda konekulu yove ndomo nda yola epembe va Egito. O sapulavo olondimbukiso nda linga pokati kavo, ene ho limbuki okuti ame ndi Yehova.
3Oco Mose la Arone va enda ku Fareo, va popia laye vati, Ca popia Yehova, Suku ya va Heveru, ceci, hati, Okulikala kuove oku sambela kokuange ku sulila eteke lipi? eca omanu vange ha va fendela. 4Momo nda ku tava oku eca omanu vange, hẽla nena olohuma kofeka yove. 5Vi vumba osi yosi cokuti umue oku mõla osi ka ci tava. Vi lia ocisupe ca ku supila kociwe. Vi lia oviti viove viosi viovusenge. 6Vi yukisa olonjo viove lolonjo viakuenje vove vosi, lolonjo via va Egito vosi, ndaño vaso, ndaño vaisiavo ka va la ci mõla tunde kokucitiwa kuavo toke ketaili lilo. Oco wa ñualapo kuenje wa tunda ku Fareo.
7Akuenje va Fareo va popia laye vati, Omunu u, oku tu yokokisa kuaye ku sulila pi? Eca omanu vaco ha va fendela Yehova Suku yavo. Kua limbukile handi okuti Egito ya nyolẽha? 8Oco va nena vali Mose la Arone ku Fareo, yu Fareo wa popia lavo hati, Kuendi. Ka fendeli Yehova suku yene. Puãi ava va enda velie? 9Mose wa linga hati, Tu enda lamalẽhe lakongo, lomãla vetu valume lomãla vetu vakãi. Loviunda vietu violomeme lolohombo, loviunda vietu violongombe, viosi tu enda lavio, momo tu lingila Yehova ofesta. 10Oco wa popia lavo hati, yehova a kale lene, nda ndu weci ene lomãla vene. Ahĩ! Uvi waco sio limbukile nga! Wa seleki okanyoha vombenje. 11Si kuatako. Alume ci tava. Va ende. Va ka fendele Yehova, momo oco wa yongoli. Kuenje va va tundisa ku Fareo.
12Oco yehova wa popia la Mose, hati, Oluĩla eka liove kofeka ye Egito oco olohuma viye kofeka ye Egito ha vi li ovikũla viosi viofeka, viosi via supa kociwe. 13Mose yu woluĩla ombueti yaye kofeka ye Egito kuenje utanya waco wosi luteke waco wosi Yehova wa sikisila ofeka ofela yokutundilo. Eci kua ca omẽle ofela yokutundilo ya nena olohuma. 14Olohuma viaco vieya kofeka yosi ye Egito, via wila vovikanjo viosi vie Egito. Via kãla cimue. Konyima yavio ka kua la kala olohuma via soka lavio, lokovaso ka ku kala vali ndovio. 15Momo via vumba osi yosi, ofeka yosi ya tekãva. Via lia ovikũla viosi viovofeka, lapako osi oviti a supa kociwe. Ka kua siale cimue ci talala kofeka ye Egito, ndaño uti ndaño ocikũla covepia. 16Oco Fareo wa yayulako oku kovonga Mose la Arone. Wa popia lavo hati, Nda linga ekandu ku Yehova, Suku yene, kuenda kokuene. 17Oco ngeceli handi ekandu liange onjanja yilo lika. Likutilili ku Yehova Suku yene ha njupi ño okufa oku. 18Oco Mose wa tunda ku Fareo, wa likutilila ku Yehova. 19Yehova wa ñualisapo ofela yokutakelo, ya yelula olohuma, ya vimba vo Kalunga Kakusuka. Lalumue olohuma lua siala kovikanjo viosi vie Egito. 20Yehova puãi wa tĩlĩsa utima wa fareo, kuenje Fareo ka tavele oku eca va Isareli.
21Yehova yu wa popia la Mose hati, Oluĩla eka liove kilu, oco ku kale owelema kofeka ye Egito kuenje omanu va papatela vowelema. 22Oco Mose woluĩla eka liaye kilu kuenje kua kala owelema wowi vofeka yosi ye Egito oloneke vitatu. 23Ka va limuile. Oloneke vitatu lomue wa votoka, puãi va Isareli vosi va kala locinyi volonjo viavo. 24Fareo yu wa vilikiya Mose hati, Kuendi. Ka fendeli Yehova. Omãla vene va endevo lene. Loviunda viene violomeme lolohombo, loviunda violongombe vi siale. 25Kuenje Mose wa linga hati, Te o tuihavo evi viovilumba levi viokupia elisi ha tu vi lumbila Yehova suku yetu. 26Oco ovinyama vietu te tu enda lavio muẽle, lalimue ekonjo li siala konyima omo opo tu upa vioku fendela lavio Yehova suku yetu. Kuenje ka tua kũlĩhile evi tu fendela lavio Yehova te tu pitila oko. 27Puãi Yehova wa tĩlĩsa utima wa Fareo kuenje ka tavele oku va eca. 28Oco Fareo wa popia laye hati, Ove nunde! Lunguka! Ku ka mbanje vali kocipala, omo eteke o mõla kocipala haico o fa. 29Eye Mose hati, Ci lingiwe mũele ndeci wa popia. Si mõli vali ocipala cove.
Currently Selected:
ETUNDILO 10: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
