Romanos 10

1Wawqikuna y panikuna, Israel majïkuna salvakäyänanpaqmi llapan shonqüwan Dios Yayata mañakuykä. 2Paykunaqa Dios Yayata cäsuyta munarpis manam tantiyayantsu 3imanö perdonamanqantsikta. Tsaymi yarpäyan Diospa leyninkunata cumplirraq perdonashqa kayänanpaq kanqanta. Perdonashqa kayta munarpis manam Jesucristuman creyikuyantsu. 4Jesucristo shamushqana kaptinmi Diospa leyninkunata cumplirtsu perdonashqa kaykantsik, sinöqa Jesucristuman creyikurmi. Payman creyikuq kaqkunatam llapanta Dios Yaya perdonan.

5Leykunata cumplirraq Dios Yaya munanqannö kawayta munaqkunapaqmi Moisés qellqar nirqan: <<Leynïkunata cumpliq kaq runaqa llapantam cumplinman>>.#Lev. 18.5.

6Jesucristuman confiakur perdonashqa kanqantsikta tantiyarmi nintsik: <<Shonquntsikchö ama yarpar nishuntsu:#Deut. 9.4. <¿Piraq ciëluman lätanman?> >>

(Tsay ninqannömi Jesucristuta kay patsaman pushamunanpaq pipis ciëlumanraqtsu aywanman.)

7<<Tsaynölla ama yarpar nishuntsu: <¿Piraq patsa rurinman yaykunman?> >>

(Tsay ninqannöllam pipis willakuyninta musyayta munar Jesucristuta kawatsimunanpaq patsa rurinmanraqtsu yaykunman.)

8Masbienmi nintsik: <<Dios Yayapa willakuyninmi shimikikunachö y shonquykikunachö kaykan>>.#Deut. 30.12-14.

Tsaymi willakuyninta willakur nintsik: 9Señornintsik Jesucristo mandashuqniki kanqanta nirqa y wañunqanpita Dios Yaya kawatsimunqanta llapan shonquykikunawan creyirqa salvashqam kayanki. 10Llapan shonquykiwan creyiyaptikiqa Dios Yayam perdonayäshunki. <<Señor Jesucristuqa mandamaqnïmi>> niyaptikim Dios Yaya salvayäshunki. 11Dios Yayapa palabranmi nin: <<Pipis payman creyikuq kaqqa manam manakaqllapaqtsu creyikunqa>>.#Isa. 28.16.

12Tsaymi Israel runa y mana Israel runa creyikuptinpis Dios Yaya perdonan. Llapantsikpapis japallan Diosnintsik karmi mañakuq kaqtaqa pïmaytapis salvan. 13Dios Yayam palabranchö nin: <<Noqaman mañakamuq kaqtam pïmaytapis salvashaq>>.#Joel 2.32.

14¿Imanöraq salvananpaq mañakuyanqa Jesucristo salvamaqnintsik kanqanta manaraq creyirqa? ¿Imanöraq creyiyanqa willakuyninta manaraq wiyarqa? ¿Imanöraq wiyayanqa pipis mana willaykuptinqa? 15¿Imanöraq willakuyanqa willakunanpaq pipis mana kachaptinqa? Dios Yayapa palabranmi nin: <<Alli willakuyta apamuqkunam alläpa kushikuypaq kaykäyan>>.#Isa. 52.7.

16Peru willakuyaptinpis manam llapan runakunatsu Jesucristupa alli willakuyninta cäsuyan. Isaías qellqanqanchömi nin: <<Dios Yaya, willakuyanqäta ¿piraq creyishqa?>>#Isa. 53.1.

17Imanö kaptinpis Jesucristupa alli willakuyninta#10.17 Wakin griego copiakunachömi Diospa alli willakuyninta niyan. wiyarraqmi payman pipis confiakun.

18Peru ¿manatsuraq willakuyninta Israel runakuna wiyayashqa? Paykunaqa unaynam wiyayashqa. Dios Yayapa palabranmi nin:

<<Willakuyninqa maytsaychömi musyakan.

Palabrankunaqa patsa kuchunyaqmi chan>>.#Sal. 19.4.

19Tsay willakunqankunata musyaykarpis ¿manatsuraq Israel runakuna tantiyayashqa? Paykunam tantiyayarqan#10.19 Israel runakunam tantiyayarqan mana Israel runakunatapis Dios Yaya salvananpaq kanqanta.. Moiséspis qellqarmi nirqan: <<Juklä marka runakunatana yanaparmi qamkunata piñatsiyäshayki. Mana tantiyakuq runakunata chaskirmi qamkunata llakikatsiyäshayki>>.#Deut. 32.21.

20Tsaynöllam Isaíaspis qellqar nirqan: <<Mana ashimaqkunatam parlapashkä. Mana rugakamaqkunatam yanapashkä>>.#Isa. 65.1.

21Peru Israel runakunapaqmi sïqa qellqar nirqan: <<Mana cäsumaq runakunamanmi waran waran rikräta makyarashkä>>.#Isa. 65.2.

Currently Selected:

Romanos 10: qxn

Highlight

Compare

Copy