Romanos 9

Israel majinkunapaq Pablo llakikunqan

1Alläpa llakikunqäta kanan willayäshayki. Llakikunqantam Jesucristo y Espíritu Santupis musyan. 2Israel majïkunapaqmi alläpa llakikü. Paykunapaq yarpaptïmi shonqüpis nanayparaq nanan. 3Israel majïkuna Jesucristuman creyikur salvakäyänantam munä. Salvakäyänan kaptinqa allich kanqa paykunapa rantin infiernuman qaykayämaptinpis.

4Israel runakunatam wamrankuna kayänanpaq Dios Yaya akrarqan.#Éxo. 4.22. Poderösu kanqantam paykunata musyatsirqan. Paykunawan pactuta rurarmi leyninkunatapis entregarqan. Tsaymi imanö adorayänanpaqpis yachatsirqan. Prometinqanpis paykunapaqmi kaykan. 5Paykunam Abrahampita, Isaacpita y Jacobpita miraqkuna kayan. Jesucristupis Israel castapitam yurirqan. ¡Paymi poderyuq Dios! ¡Payqa imayyaqpis alabashqa kaykullätsun! Amén.

Akranqan kaqkunallata Dios Yaya salvanqan

6Israel runakuna Jesucristuman mana creyiyaptin ama yarpäshuntsu Dios Yaya prometiskir mana cumplinqanta. Manam llapan Israel runakunatsu Dios Yaya prometinqankunata chaskiyanqa. 7Tsaynöllam Abrahampa castanpita llapan miraqkunatsu wamran kayan. Abrahamtam Dios Yaya nirqan: <<Qamta prometinqaqmi tsuriki Isaacpaq y paypita miraqkunapaq>>.#Gén. 21.12.

8Tsaymi Abrahampita llapan miraqkunatsu Dios Yayapa wamrankuna kayan, sinöqa prometinqanta chaskiyänanpaq Dios Yaya akranqan kaqkunallam.

9Abrahamta prometirmi Dios Yaya nirqan: <<Watan kutimuptï ollqu wamrayuqnam warmiki Sara kanqa>>.#Gén. 18.10, 14.

10Dios Yaya ninqannö yuriq wamram unay castantsik Isaac karqan. Isaacwan Rebeca churakäyaptinmi wamrankuna millïshu yuriyarqan. 11-12Manaraq yuriyaptinmi Rebecata Dios Yaya nirqan: <<Punta yuriqmi qepan yuriq kaqpa poderninchö kanqa>>.#Gén. 25.23.

Paytam tsaynö nirqan tsay millïshukuna allita y mana allita manaraq rurayaptin. Manam allita ruranqanpitatsu Dios Yaya pitapis akran, sinöqa kikin munanqan kaqtam. 13Dios Yayapa palabranmi nin: <<Jacobtam kuyarqä y Esaútanam chikirqä>>.#Mal. 1.2-3.

14Tsaynö karqa Dios Yaya ¿mana allitatsuraq rurarqan? ¡Manam! 15Moiséstam Dios Yaya tantiyatsirqan: <<Llakipanqä kaqtam llakipä. Perdonayta munanqä kaqtam perdonä>>.#Éxo. 33.19.

16Tsaymi kikin runa munanqanpitatsu o imatapis allita ruranqanpitatsu Dios Yaya akran, sinöqa llakipanqan kaqtam pitapis akran.

17Egiptupa mandakuqnin Faraónpaqmi Dios Yayapa palabran nin: <<Maytsaychö täkuq runakuna poderösu kanqäta musyayänanpaqmi mandakuq kanaykipaq churashkaq>>.#Éxo. 9.16.

18Tsaynömi Dios Yaya wakinta llakipar wakintana shonqunta chukruyätsin.

19Tsaynö niptï talvezchi niyämankiman: <<Runakunapa shonqunta kikin chukruyaykätsirqa ¿imanirtan jutsayuq kayanqanta Dios Yaya nin? Kikin tsaynö ruraptinqa ¿piraq amatsanman?>>

20Tsaynö nirqa qam ¿pitan kanki Dios Yaya imata ruranqantapis musyapänaykipaq? Mitu mankapis ruraqninta manam nintsu: <<¿Imanirtan tsaynöta ruramashkanki?>>#Isa. 29.16; 45.9.

21Manka ruraqqa munanqannömi mitupita ruran. Tsay mitupitam täzata ruran fiestachö üsananpaq y juk täzatana waran waran üsananpaq.#Jer. 18.4-6.

22Tsaynöllam Dios Yayapis wakin runakunata castigananpaq destinarqan. Jutsa rurayanqanpita rabyar castiganan kaptinpis manam sasllatsu castigan, sinöqa pacienciakurmi shuyan. 23Wakin kaq runakunatam gloriaman pushananpaq destinarqan. Tsaynö destinarqan llakipäkuq kanqanta musyanapaqmi. 24Tsay kuyanqan runankunam noqantsik kantsik. Paymi akramashkantsik Israel runa kashqa y mana Israel runa kashqapis.

25Profëta Oseas qellqanqanchömi nin: <<Juklä marka kayaptikipis wamräkuna kayanqaykitam niyäshayki. Mana kuyanqä runakuna kayaptikipis kananqa kuyayäshaykim>>.#Ose. 2.23.

26Mastam qellqashqachö nin: << <Qamkunaqa manam noqapatsu> niyäshunqaykichöpis runakunam niyanqa: <Paykunaqa imayyaqpis kawaq Dios Yayapa wamrankunam kaykäyan> >>.#Ose. 1.10.

27Wakin kaq Israel runakunalla salvashqa kayänanpaqmi Isaías qellqar nirqan: <<Lamar kuchunchö arenïllanöraq Israel runakuna maytsikaq kayaptinpis wallkaqllatam Dios Yaya salvanqa. 28Pöcu tiempullatanam llapan runakunata Dios Yaya juzganqa>>.#Isa. 10.22-23. 29Mastam Isaías qellqar nirqan: <<Llapanta mandaq Dios Yaya juk ishkayllatapis kawaykaqta mana dëjamashqaqa Sodomanö y Gomorranömi ushakashwan karqan>>.#Isa. 1.9.

Jesucristuta Israel runakuna mana chaskiyanqan

30Tantiyashun. Mana Israel runakunaqa Diospa leyninkunata cumpliyänanpaq mana yarpaykarpis Jesucristuman confiakurmi salvakäyan. 31Peru Israel runakunam sïqa Dios Yayapa leyninkunata cumplirnin salvakayta munarpis salvakäyantsu. 32¿Imanirtan tsaynö salvakäyantsu? Jesucristuman mana confiakurmi. Payman confiakuyanqanpa rantinmi tsay leykunata cumpliyanqanman confiakuyan. Tsaynöpam ishkitsikuq rumichö takakur ishkiyan. 33Dios Yayapa palabranmi nin:

<<Siónmanmi trompisatsikuq y ishkitsikuq rumita churä.

Tsaychö takakurmi atskaq runakuna ishkiyanqa.

Pipis payman creyikuq kaqqa manam manakaqllapaqtsu creyikunqa>>.#Isa. 28.16.

Currently Selected:

Romanos 9: qxn

Highlight

Compare

Copy