Romanos 11
11
Wakin kaq Israel runakunalla salvakäyanqan
1Israel runakunata ¿Dios Yaya dëjashqatsuraq? ¡Manam! Noqapis Abraham casta karmi Benjamín trïbupita Israel runa kä.#Fil. 3.5. 2Israel runakunata Dios Yaya manam dëjashqatsu. Paykunatam kuyanqan runakuna kayänanpaq unaypitana akrarqan. ¿Manaku musyayanki Dios Yayapa palabran Elíaspaq imata ninqanta? Israel majinkunata acusarmi Dios Yayata mañakurnin Elías nirqan: 3<<Dios Yaya, llapan profëtaykikunatam wañutsiyashqa. Altarnikikunatapis jankatmi juchutsiyashqa. Japallänam quëdashkä. Noqatapis wañutsiyämänanpaqmi ashiykäyäman>>.#1Rey. 19.10, 14.
4Peru Elíastam Dios Yaya nirqan: <<Manam yarpanqaykinötsu. Qanchis waranqa (7,000) runakunatam Baalta imaypis mana adorayänanpaq akrashkä>>.#1Rey. 19.18.
5Elías kawanqan witsaynöllam kananpis wakin Israel runakuna Dios Yayata serviykäyan. Paykunam serviyan Dios Yaya llakiparninkuna akranqanpita. 6Manam imatapis allita rurayanqanpitatsu akrarqan, sinöqa jutsasapa kayaptinpis llakipäkuq karmi akrarqan. Imatapis allillata rurayanqanpita akrarqa manam llakipäkuq kartsu akranman karqan.
7Tsaymi akranqan kaq Israel runakunalla salvacionta tariyan. Wakin Israel runakunaqa salvacionta ashirpis manam tariyantsu. Paykunapa shonqunkunatam Dios Yaya chukruyätsishqa willakuyninta mana cäsuyänanpaq. 8Dios Yayapa palabranmi nin:
<<Alläpa mana tantiyakuq kayänanpaqmi Dios Yaya upayätsishqa.
Tsaymi kananyaqpis paykunaqa rikaykarpis mana rikaqnö kayan
y wiyaykarpis mana wiyaqnö kayan>>.#Deut. 29.4; Isa. 29.10.
9Tsaynö kaqkunapaqmi rey Davidpis Dios Yayata mañakur nirqan:
<<Banquëtita mikuyanqanpis paykunapaq trampanö kaykullätsun.
Bendicionnikita churanqaykipa rantin castigaykullay.
10Paykunapa ñawinkunapis qaprayätsun.
Imaypis mana derechakäyänanpaq waqtankunapis kurmuyätsun>>.#Sal. 69.22-23.
Mana Israel runakunapis salvakäyanqan
11Peru Israel runakunaqa ¿manatsuraq imaypis Jesucristuman creyikuyanqa? ¡Awmi, creyikuyanqam! Mana Israel runakunata Dios Yaya salvaqta rikarmi Israel runakunapis Jesucristuman creyikuyänanpaq tantiyayanqa. 12Tsaymi Jesucristuman mana creyikuyaptin mana Israel runakunana Jesucristuman creyikur salvakäyan. Paykuna salvakäyanqan kushikuypaq kaptinpis Israel runakuna salvakuyaptinqa masraqmi kushikuypaq kanqa.
13Mana Israel runakuna, shumaq tantiyakuyay. Dios Yayam churamashqa apostolnin kar mana Israel runakunaman imaykanöpapis alli willakuyninta apanäpaq. 14Tsaynömi willakü mana Israel runakuna salvakaqta rikar Israel majïkuna wakillanpis Jesucristuman creyikur salvakäyänanpaq. 15Israel runakuna Jesucristuman mana creyikuyaptinpis mana Israel runakunam sïqa maytsaychöpis creyikuykäyan. Paykunapis salvashqana karmi wañushqanö kayanqanpita kawamushqanöna kayan.
Mana Israel runakuna mana aläbakuyänanpaq yätsinqan
16Mäsapita rakiykur primiciata Dios Yayapaq apaptinmi llapan mäsapis sagrädu. Tsaynöllam jachapa jawan sagrädu kaptin rämankunapis sagrädu. 17Israel runakunapis sagrädu kaykarmi Jesucristuman mana creyikurnin olïvu jachapita wallushqanö kayan. Peru qamkunam sïqa olïvu jachaman injertashqanöna kayanki. Tsaymi lluta olïvu jachapa rämankunanö kaykarpis tsay alli olïvu jachapa jawanpita salvacionta chaskiyanki.#11.17 Jachapa jawannömi kayan Abraham, Isaac y Jacob. Paykunata prometinqanta cumplirmi Jesucristuta Dios Yaya kachamurqan runakunata salvananpaq.
18Olïvu jachaman injertashqanö kaykarqa ama aläbakuyaytsu Israel runakunapita mas väliq kayanqaykita. Manam rämatsu jachata kawaynin qaran, sinöqa jawanmi. 19Talvezchi niyanki: <<Israel runakunaqa wallushqa rämakunanömi kayan. Paykunata salvanqanpa rantinmi noqakunata Dios Yaya salvayäman>>.
20Awmi, tsayqa niyanqaykinöllam. Jesucristuman mana creyiyanqanpitam wallushqa rämanö kayan. Peru qamkunam sïqa Jesucristuman confiakuyanqaykipita injertashqanö kayanki. Qamkunapis Dios Yayata mana cäsurqa cuidädutaq wallushqa rämanö kayankiman. 21Legïtimu olïvupa rämannö kayaptinpis mana cäsukuq Israel runakunataqa manam Dios Yaya salvantsu. Paykunatapis mana salvaykarqa qamkunatapis mana cäsuyaptikiqa manam salvayäshunkitsu.
22Dios Yaya llakipäkuq y castigakuq kanqanta tantiyakuyay. Mana cäsukuqkunatam mana llakipaypa castigan. Peru cäsukuqkunatam sïqa llakiparnin salvan. Llakipaykäyäshurnikipis mana cäsuyaptikiqa qamkunatapis mana alli rämatanömi walluskiyäshunki. 23Tsaynöllam Israel runakuna Jesucristuman creyikuyaptinqa jachaman injertashqa rämanö kayänanpaq Dios Yaya llakipar salvanqa. Payqa jachaman yapay injertananpaqpis poderösum.
24Mana Israel runa karmi qamkunaqa lluta olïvupa rämannö kaykäyanki. Tsaynö kayaptikipis Jesucristuman creyikuyanqaykipitam Dios Yaya salvayäshushkanki. Israel runakuna legïtimu olïvupa rämannö kaykäyaptinqa Jesucristuman creyikuyaptinmi paykunatapis salvanqa.
Israel runakunapis salvakuyänanpaq ninqan
25Wawqikuna y panikuna, mana aläbakuyänaykipaqmi runakuna mana musyayanqanta kanan willayäshayki. Wakin kaq Israel runakuna kanan chukru shonqu karpis manam tsaynöllatsu kayanqa. Paykunam tsaynö kayanqa mana Israel runakunapita Dios Yaya akranqankunata salvanqanyaqlla. 26Tsaypitam llapan Israel runakunapis salvakäyanqa. Dios Yayapa palabranmi nin:
<<Salvakuqmi Siónpita shamunqa.
Jacobpita miraqkunatam jutsankunata dëjayänanpaq tantiyatsinqa.#Isa. 59.20.
27Jutsankunata perdonarmi paykunawan pactuta rurashaq>>.#Jer. 31.33-34.
28Tsaynö kaptinpis Israel runakuna Jesucristupa alli willakuyninta manam chaskiyta munayantsu. Dios Yayapa contran kayaptinmi paykunapa rantin qamkunatana salvayäshunki. Dios Yayapa contran kayaptinpis Abrahamta, Isaacta y Jacobta prometinqanta cumplirmi Israel runakunata imaypis llakipan. 29Dios Yayaqa imatapis prometinqantam cumplin. Pitapis salvananpaq akrarqa imaypis salvanmi.
30Unayqa manam Dios Yayata cäsuyarqaykitsu. Kananqa Israel runakunanam cäsukuyantsu. Tsaymi paykunapa rantin Dios Yaya qamkunatana llakipäyäshunki. 31Tsaynöllam llakipäyäshunki Israel runakunapis tantiyakuyaptin Dios Yaya llakipar salvananpaq. 32Tsaymi juk tiempuchö Israel runakuna mana cäsukuq kayänanpaq yarpayninkunata Dios Yaya pantatsirqan y juk tiempuchönam mana Israel runakunapis mana cäsukuq kayänanpaq yarpayninkunata pantatsirqan. Tsaymi Israel runakunatapis y mana Israel runakunatapis llakipäkuq kayninwanraq salvan.
33¡Dios Yayaqa alläpa yachayyuq y tantiyaqmi!
¡Pay yarpanqanta y ruranqanta manam pipis tantiyayta puëdintsu!#Isa. 55.8-9.
34Dios Yaya yarpanqanta ¿pillaqa musyantsuraq?
Yachayyuq kananpaq ¿pillaqa yachatsintsuraq?#Isa. 40.13; 1Cor. 2.16.
35Diosta mandananpaq ¿piraq poderyuq kanman?#Job 41.11.
36Dios Yayam llapanta kamashqa.
Pay munaptinmi llapan imaykapis kaykan.
Payllapam llapan imaykapis.#1Cor. 8.6; Efe. 4.6; Col. 1.16.
¡Dios Yaya imayyaqpis alabashqa kaykullätsun!
Amén.
Currently Selected:
Romanos 11: qxn
Highlight
Share
Compare
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
