Marcos 6

Nazaret markachö Jesús willakunqan

Mateo 13.53-58; Lucas 4.16-30

1Tsaypitanam Nazaret markanman discïpulunkunawan Jesús aywayarqan. 2Jamay junaq kaptinmi sinagögachö yachatsikuptin runakuna mantsakashqa niyarqan: <<Tsaynö yachatsikunanpaq ¿maychöraq yachakamushqa? Tsaynölla ¿imanöparaq milagrukunata ruran? 3¿Manaku payqa carpintëru? Mamanpis ¿manaku María? Wawqinkunapis ¿manaku Santiago, José, Judas y Simón? Paninkunapis ¿manaku kay markachö täkuyan?>>

Tsaynö nirmi Jesús yachatsikunqankunata creyiyarqantsu.

4Jesúsnam nirqan: <<Wakin markakunachö profëtata chaskiyaptinpis ayllunkuna y marka majinkunaqa manam chaskiyantsu>>.#Juan 4.44.

5Tsaynö mana chaskiyaptinmi ima milagrutapis tsay markachö rurarqantsu. Tsaypa rantinmi juk ishkay qeshyaqyashakunallata yataykur kutikätsirqan. 6Marka majinkuna payman mana creyiyaptinmi Jesús alläpa llakikurqan.

Willakuyänanpaq apostolninkunata Jesús kachanqan

Mateo 10.1, 5-15; Lucas 9.1-6

Tsaypitanam markakunapa, jallqakunapa runakunata yachatsikur Jesús purirqan. 7Tsaynö purirmi chunka ishkay discïpulunkunata qayaskir poderninta qararqan runakunapita supaykunata qarquyänanpaq. Tsaypitam alli willakuyninta willakuyänanpaq ishkaq ishkaqta kacharqan. 8Tsaymi nirqan: <<Tukrullata apayanki. Qepita, millkapata ni qellaytapis ama apayankitsu.#Luc. 10.4-11. 9Shukuräyanqayki llanqillawan aywayanki. Trukakuyänaykipaq llatapatapis ama apayankitsu.

10<<Pipa wajinman patsakurpis juk markaman päsayanqaykiyaq tsayllachö quëdakuyanki. 11Willakuyanqaykita mana chaskiyäshuptikiqa chakikikunachö polvuta tapsikuskir aywakuyanki. Tsaynö rurayanki paykunata Dios Yaya castigananpaq kaqta musyayänanpaq.#Hech. 13.51. [Rasun kaqtam niyaq: Día del juiciuchöqa Sodomachö y Gomorrachö täkuq runakunata castiganqanpitapis mas peormi tsay runakunata Dios Yaya castiganqa]>>.

12Tsaynö niptin aywarmi discïpulunkuna willakuyarqan jutsankunapita arrepentikur Dios Yaya munanqannöna kawakuyänanpaq. 13Tsaynöllam supaykunatapis runakunapita qarquyarqan. Atskaq qeshyaykaqkunatam aceitita wiñar#Stg. 5.14. kutikätsiyarqan.

Bautizaq Juanta Herodes wañutsinqan

Mateo 14.1-12; Lucas 9.7-9

14Jesús ruranqankunata maytsaychö parlayaptinmi rey Herodespis musyarqan. Wakin runakunam Jesúspaq niyarqan: <<Tsay runaqa Bautizaq Juanmi kawamushqa kanqa. Tsaymi milagrukunata rurananpaq poderyuq kaykan>>.

15Wakinmi <<profëta Elíasmi>> niyarqan. Wakin kaqnam <<unay profëtakunanö profëtam>> niyarqan.#Mat. 16.14; Mar. 8.28; Luc. 9.19. 16Tsaynö parlayanqanta wiyarmi rey Herodes nirqan: <<Umanta roqutsinqä Juanmi kawamushqa kanqa>>.

17Ñawpatam Juanta Herodes prësu achkuskatsir cadenawan watarkur carcelman qaykatsishqa karqan. Tsaynö rurarqan Herodías shutiyuq warmi mañakuptinmi. Herodíasqa Herodespa wawqin Felipipa warminmi karqan. Herodes warmintanö Herodíasta katsiptinmi 18Juan nirqan: <<Wawqikipa warminwan täkurmi alläpa jutsata ruraykanki>>.#Luc. 3.19-20.

19Tsaynö ninqanpitam Herodías chikir Juanta wañutsiyta munarqan. Peru wañutsiyta munarpis Juanta Herodes respitaptinmi puëdirqantsu. 20Juantam tsaynö respitarqan Dios munanqannö kawar santu runa kanqanta musyar. Diospa willakuyninta Juan willakuptinmi kushishqa wiyarpis ima ruraytapis puëdirqantsu.

21Tsaypita Herodespa santunchö fiestata rurarmi qayatsirqan autoridäkunata, soldädukunapa mas mandaqninkunata y Galileachö täkuq reqishqa runakunatapis. 22Tsaychö kaykäyaptinmi Herodíaspa jipash wamran yaykuskir tushurqan. Tushuqta rikarmi Herodes y qayatsinqan runakunapis alläpa kushikuyarqan. Tsaymi jipashta rey Herodes nirqan: <<Ima munanqaykitapis mañamay. Nimanqaykitam qarashayki>>.

23Tsaypitanam jurar nirqan: <<Mandakunqä nacionta <pullanninta rakipämay> nimaptikipis rakipushaykim>>.

24Tsaymi maman kaqman tsay jipash aywaykur tapurqan: <<Mamay, ¿imatatan mañäman?>>

Mamannam nirqan: <<Bautizaq Juanpa umanta qarashunaykipaq niy>>.

25Maman tsaynö yätsiptinmi rey kaqman kutiykur nirqan: <<Noqam munä jina höra Bautizaq Juanpa umanta plätuchö qaramänaykita>>.

26Tsayta mañaptinmi rey Herodes alläpa llakikurqan. Peru qayatsinqankunapa puntanchö jurashqa karmi nëgayta puëdirqantsu. 27Tsaymi jina höra wardiata kacharqan Juanpa umanta apamunanpaq. Ninqannöllam carcelman aywaykur Juanpa umanta roquskir 28jipashta plätuchö entregarqan. Jipash chaskiskirmi mamanta entregarqan. 29Tsaynö rurayanqanta musyaskirnam Juanpa discïpulunkuna ayanta qoriskir pampayarqan.

Pitsqa waranqa runakuna mikuyänanpaq milagruta Jesús ruranqan

Mateo 14.13-21; Lucas 9.10-17; Juan 6.1-14

30Willakuyanqanpita apostolkuna kutiykurmi llapan rurayanqanta y yachatsiyanqanta Jesústa willayarqan. 31Tsaychö atskaq runakuna kayaptinmi mikuyänanpaqpis tiempun karqantsu. Tsaymi apostolninkunata Jesús nirqan: <<Aku aywashun tsunyaman tsaychö jamaykunapaq>>.

32Tsaynö nirmi büquiman lätarkur apostolninkunawan tsunyaman aywayarqan. 33Maypa aywayanqantapis runakuna rikarmi markakunapita sas aywar Jesúspita mas puntata chäyarqan. 34Büquipita yarpuskirnam atskaq runakuna shuyaraykäyaqta Jesús tarirqan. Mitsiqninnaq üshakunanö kaykaqta rikarmi llakiparnin imaykata yachatsirqan.#Núm. 27.17; 1Rey. 22.17; 2Crón. 18.16; Jer. 50.6-7; Eze. 34.5; Zac. 10.2; Mat. 9.36.

35Patsa qoyaykaptinnam#6.35 Wakin runakunaqa patsa tsakaykaptinnam niyan. discïpulunkuna Jesúsman witiykur niyarqan: <<Desiertuchömi kaykantsik. Patsapis qoyaykannam. 36Markakunapa aywar mikuyninkuna rantiyämunanpaq runakunata niy. [Kaychöqa manam mikuyänanpaq imapis kantsu]>>.

37Jesúsnam nirqan: <<Qamkuna mikuyninkuna qarayay>>.

Tsaynö niptinmi niyarqan: <<¿Noqakuna tanta rantiq aywayänätaku munanki? Kaytsikaqpaqqa ishkay pachak (200) jornalpa chaninraqchi paqtanman>>.

38Jesúsnam nirqan: <<¿Ayka tantatan kayäpushunki? Mä rikäyämuy>>.

Rikaykamurnam niyarqan: <<Pitsqa tantawan ishkay pescädullam kayäpaman>>.

39Tsaypitam discïpulunkunata Jesús nirqan runakunata grüpu grüpu pampaman jamatsiyänanpaq. 40Tsaynö niptinmi pachakpa (100) y pitsqa chunkapa (50) jamatsiyarqan. 41Tsaypitanam pitsqa tantatawan ishkay pescäduta aptarkur ciëluman rikarkur Dios Yayata Jesús agradëcikurqan. Tantata pakiskirnam discïpulunkunata makyarqan runakunata aypuyänanpaq. Tsaynöllam llapan mikuyänanpaq ishkay pescädutapis makyarqan. 42Pacha junta mikuskiyaptinnam 43sobraq tantakunata y pescädukunata chunka ishkay canasta juntata qoriyarqan. 44Tsaychö mikuqkunam pitsqa waranqa (5,000) kayarqan.

Yaku jananpa Jesús aywanqan

Mateo 14.22-33; Juan 6.15-21

45Tsaypitanam discïpulunkunata Jesús nirqan büquiman lätarkur Betsaida markaman puntayänanpaq. Aywaskiyaptinnam tsaychö runakunata despidiskir 46Dios Yayata mañakunanpaq jirkaman witsarqan.

47Patsa qoyaykaptinnam#6.47 Wakin runakunaqa patsa tsakaykaptinnam niyan. discïpulunkuna büquiwan karutana aywaykäyarqan. Tsayyaqmi jirkallachöraq Jesús japallan kaykarqan. 48Tsaypitam rikarqan wayra kutitsimuptin büquiwan discïpulunkuna ñakaykäyaqta. Patsa waraykaptinnam discïpulunkuna kaqman yaku jananpa Jesús aywaykarqan. Büquipa lädunpa päsaykaqtanö 49rikaskirmi discïpulunkuna alma kanqanta yarpar alläpa mantsakar qayaykachäyarqan. 50Tsaymi Jesús nirqan: <<¡Noqam kä! ¡Ama mantsakäyaytsu!>>

51Tsaynö nir büquiman lätarkuptinmi wayrapis sas päraskirqan. Tsaykunata rikarmi discïpulunkuna alläpa mantsakashqa yarpachakuyarqan. 52Maytsikaq runakunata qarananpaq milagruta ruranqanta rikarpis shonqunkuna chukruyashqa kaptinmi tantiyayarqantsu Jesús poderyuq kanqanta.

Genesaretchö qeshyaykaqkunata Jesús kutikätsinqan

Mateo 14.34-36

53Qochata tsimpaskirnam Genesaret pampaman chaykur büquita watäyarqan. 54Büquipita bäjaskiptin runakuna Jesústa reqiskirmi 55maytsaypapis cörrilla aywar Jesús tsaychö kaykanqanta willakuyarqan. Tsayta musyaskirmi maytsaypitapis qeshyaykaqkunata tsakrankawan apayämurqan. 56Tsaypita markakunapa y jallqakunapa Jesús puriptinmi nänikunachöpis qeshyaykaqkunata shuyätsiyarqan. Tsaypa päsaptinmi rugayarqan llatapanpa kuchunllatapis qeshyaykaqkuna yataykuyänanpaq. Tsaychömi llapan yataq kaqkunaqa kutikäyarqan.

Currently Selected:

Marcos 6: qxn

Highlight

Copy

Compare