Marcos 7

Runakuna mana allikunata yarpar impüru tikrayanqan

Mateo 15.1-20

1Juk kutim fariseukunawan ley yachatsikuqkuna Jesús kaqman Jerusalénpita aywayarqan. 2Tsaychömi rikäyarqan Jesúspa discïpulunkuna makinkunata mana mayllakur mikuykäyaqta. 3Fariseukunawan Israel majinkunaqa unay ayllunkunapa costumbrinkunata cumplirmi mikuyänanpaq makinkunataraq imaypis mayllakuyan. Mana mayllakurqa manam mikuyantsu.#7.3 Manam makinkuna limpiu kayänanpaqtsu mayllakuyaq, sinöqa costumbrinta cumplir püru kayänanpaqmi. Püru kayänanpaqmi ichiklla yakuta makinman shututsiyaq. Tsaypaq masta musyanaykipaq liyinki Lev. 11.32; 15.4-12; Núm. 19.18. 4Tsay costumbrikunata cumplirmi täzakunatapis, järrakunatapis, mankakunatapis [y catrikunatapis] mayllayan. Tsaynömi rantipakuyanqanpita kutirpis mikuyänanpaq armakuyan. Tsaynöllam mas wakin costumbrinkunatapis cumpliyan. 5Tsaymi fariseukuna y ley yachatsikuqkuna Jesústa tapuyarqan: <<¿Imanirtan discïpuluykikuna unay aylluntsikkunapa costumbrinkunata mana cäsur impüru makinkunawan mikuyan?>>

6Jesúsnam nirqan: <<¡Allish tukuq runakuna! Rasun kaqtam Isaías qamkunapaq qellqarqan. Tsay qellqanqanchömi nin:

<< <Kay runakunaqa shimillankunawanmi <<cäsuqmi>> niyäman.

Peru shonqunkunachöqa juktam yarpaykäyan.

7Ninqäkunata yachatsikuyanqanpa rantinmi runakuna niyanqallanta yachatsikuyan.

Tsaymi adorayämanqanpis manakaqllapaq kaykan>.#Isa. 29.13.

8<<Isaías ninqannöllam qamkunapis Dios Yayapa mandamientunkunata cäsuyanqaykipa rantin kikikikunapa costumbrikikunallata cumpliykäyanki. [Tsaymi järrakunatapis täzakunatapis püru kayänanpaq mayllaykäyanki. Tsaynöllam wakin costumbrikunatapis ruraykäyanki]>>.

9Mastam Jesús nirqan: <<¡Ajä, alläpa allishmi costumbrikikunata cumplir Dios Yayapa mandamientunkunata cumpliykäyanki! 10Moisésmi nirqan: <Mamaykita y taytaykita respitanki>.#Éxo. 20.12; Deut. 5.16. Tsaynöllam nirqan: <Pipis mamanta o taytanta mana respitaq kaqqa wañutsishqa katsun>.#Éxo. 21.17; Lev. 20.9.

11<<Peru qamkunaqa yachatsirmi nikäyanki: <Mamaykita y taytaykita yanapayta mana munarqa ninki: <<Qamkunata yanapanäpaq kaqkunata Dios Yayata entreganäpaqmi änishkä>> >. 12Tsaynö nirmi runakunata yachaykätsiyanki mamanta y taytanta mana yanapayänanpaq. 13Costumbrikikunata tsaynö yachatsikurqa Dios Yayapa palabranta manakaqmanmi churaykäyanki. Tsaynöllam wakin costumbrikikunatapis yachatsikuykäyanki>>.

14Runakunata qayaskirnam Jesús nirqan: <<Kay niyanqaqkunata llapayki shumaq tantiyayay. 15Manam imatapis mikunqanpitatsu pipis impüru kaykan, sinöqa shonqunchö mana allita yarpanqanpitam. 16[Rinriyuq kaqkunaqa ninqäkunata wiyakuyätsun]>>.

17Tsaypitanam runakunata dëjaskir juk wajiman Jesús yaykurqan. Tsaychömi yachatsikunqankunata tantiyatsinanpaq discïpulunkuna rugayarqan. 18Jesúsnam nirqan: <<¿Qamkunapis manaku tantiyayanki runa imata mikurpis impüru mana kanqanta? 19Mikunqantsikqa manam shonquntsikmantsu yaykun, sinöqa pachantsikmanmi. Tsaypitanam päsan>>.

Tsaynö nirmi Jesús tantiyatsirqan llapan mikuykunapis mikunapaq alli kanqanta.

20Mastam nirqan: <<Shonqunchö mana alli yarpanqankunam runata impüruyätsin. 21Runakunaqa shonqunchö mana allikunata yarparmi fornicación jutsata rurayan, suwakuyan, wañutsinakuyan, 22majayuq kaykar jukwan kakuyan, ayrajashqa kayan, llullakuyan, umankuna achachashqa kaptin jutsata rurayan, envidiösu kayan, manakaqta tumpayan, yachaq tukuyan y llutankunata rurayan. 23Tsay llapan mana allikuna shonqunkunapita yarqamurmi runakunata impüruyätsin>>.

Mana Israel warmi Jesúsman confiakunqan

Mateo 15.21-28

24Tsaypitanam Jesús aywarqan Tiro [y Sidón] markakuna lädupa. Tsayman chanqanta runakuna musyayänanta mana munarmi pakayllapa juk wajiman patsakurqan. Tsaynö tsinkakuptinpis tsaychö kanqantam runakuna musyaskiyarqan.

25Tsay markachömi juk warmipa warmi wawanta supay alläpa ñakatsirqan. Jesús tsayman chanqanta musyaskirmi tsay warmi puntanman qonqurikuykur 26wawanpita supayta qarqunanpaq rugarqan. Tsay warmiqa manam Israel warmitsu karqan, sinöqa patsan Sirofeniciapitam karqan. 27Peru Jesúsnam nirqan: <<Puntataqa Israel majïkunataraqmi yanapashaq. Qamta yanaparqa wamrakunapa tantanta qechuskir allqukunata qaraqnömi käman>>.

28Warminam nirqan: <<Awmi, taytay. Tsaynö kaptinpis wamrakuna shikwapukuyanqantam allqukunapis mikuyan>>.

29Jesúsnam nirqan: <<Allitam nishkanki. Wawaykita ñakatsiq supay yarqushqanam. Wajikipa kutikuy>>.

30Wajinman kutirnam wawanta tarirqan kutikashqana cämanchö kaykaqta. Supay yarqushqana kaptinmi kutikashqana karqan.

Upa runata Jesús kutikätsinqan

31Tiro markapita Jesús aywakurmi Sidón marka kaqläpa tumamur Decápolis provinciaman charqan. Tsaypitanam Galilea qocha kuchunman charqan. 32Tsaychö kaykaptinmi upa runata payman pushayarqan. Chaykatsirmi Jesústa rugayarqan yataykur kutikätsinanpaq. 33Tsaymi kikillanta jukläman pushaykur upapa rinrinman dëdunta Jesús jatirkurqan. Toqayninwan dëdunta oqurkatsirmi upapa qalluntapis yataykurqan. 34Tsaynö ruraskirmi jamayninta kachaskir ciëluman rikarkur: <<¡Efata!>> nirqan. (Efata ninanqa kichakay ninanmi.) 35Tsaynö niptinmi jina höra rinrin wiyarqan y shiminpis pashtaskirqan.

36Tsaynö kutikaskatsirmi tsaychö runakunata Jesús nirqan kutikätsinqanta pitapis mana willayänanpaq. Yapay yapay tsaynö nikaptinpis pïmaytam willakuyarqan. 37Kutikätsinqanta rikarmi runakuna alläpa kushikurnin ninakuyarqan: <<¡Llapantam allita ruran! ¡Kutikätsiptinmi upakunapis wiyayan y mana parlaqkunapis parlayan!>>

Currently Selected:

Marcos 7: qxn

Highlight

Copy

Compare