Marcos 5

Supaykuna löcuyätsinqan runata kutikätsinqan

Mateo 8.28-34; Lucas 8.26-39

1Qochata tsimpaskirnam Gerasa#5.1 Wakin griego copiakunachömi Gadara niyan. Wakinnam Gergesa niyan. niyanqan partiman discïpulunkunawan Jesús chäyarqan. 2Büquipita Jesús bäjaskiptinmi supaykuna löcuyätsinqan runa panteonpita yarqamurqan. 3Tsay runam panteonllachö täkuq. Cadenawan watarpis manam watarätsiyta puëdiyaqtsu. 4Chakipita makipita watäyanqan cadenatam rachir ushaq. Tsaymi ni pï imanaytapis puëdiqtsu. 5Tsay runaqa paqaspapis junaqpapis panteonchö y jirkakunachömi qayaykachar rumikunawan takakur puriq.

6Paymi Jesústa rikaskir cörrilla aywarnin puntanman qonqurikuykur 7jinchi nirqan: <<¡Poderösu Diospa Tsurin Jesús! ¡Imatatan noqawan munanki! ¡Diospa shutinchömi rugaq! ¡Ama ñakatsillämaytsu!>>

8Tsaynö nirqan <<¡supay, kay runapita yarquy!>> Jesús nishqa kaptinmi.

9Tsaypitanam Jesús tapurqan: <<¿Imatan shutiki?>>

Niptinmi nirqan: <<Noqapa shutïqa Legiónmi.#5.9 Legión ninanqa atska waranqa ninanmi. Noqakunaqa maytsikaqmi kayä>>.

10Karuman mana qarqunanpaqmi supaykuna alläpa rugayarqan. 11Washalänin lömachömi maytsika kuchikunata mitsiykäyarqan. 12Tsaymi supaykuna Jesústa rugar niyarqan: <<Kuchikunallaman yaykuyänäpaq permïtiykullay>>.

13Rugayanqanta Jesús äniptinmi runapita yarquskir tsay kuchikunaman supaykuna yaykuskiyarqan. Tsaychö kuchikunam ishkay waranqanö (2,000) kayarqan. Tsaymi kuchikuna tunapa cörrir qochaman jeqarpur shinqaypa wañuyarqan.

14Tsayta rikaykurmi kuchi mitsiqkuna cörrilla aywar markachö täkuq y cercanchö täkuq runakunata willayarqan. Willakuyaptinmi runakuna ima päsanqantapis rikaq aywayarqan. 15Jesús kaqman chaykurmi tsay löcuyashqa runata llatapashqa juiciunchöna jamaykaqta tariyarqan. Tsayta rikarmi alläpa mantsakäyarqan.

16Jesús kutikätsinqanta rikaqkunam willayarqan tsay runa imanö kutikanqanta y kuchikuna shinqar wañuyanqanta. 17Tsaymi runakuna Jesústa rugayarqan tsaypita aywakunanpaq.

18 Büquiman Jesús lätarkuptinmi kutikaq runa Jesústa rugarqan paqtan aywakunanpaq. 19Rugaptin mana änirmi Jesús nirqan: <<Wajikipa kutir aylluykikunata willay Dios Yaya llakipar kutikätsishunqaykita>>.

20Tsaynam aywar patsan Decápolis provinciachö willakurqan Jesús kutikätsinqanta. Tsaynö willakunqanta wiyaqkunam kushikuyarqan.

Jairupa tsurinta kawatsimunqan y warmita kutikätsinqan

Mateo 9.18-26; Lucas 8.40-56

21Tsaypitanam qocha wak tsimpanman büquiwan Jesús yapay kutirqan. Qocha kuchunchö kaykaptinmi atskaq runakuna qorikäyarqan. 22Tsaymanmi sinagögachö mandakuq Jairo shutiyuq runa charqan. Paymi Jesúspa puntanman qonqurikuykur 23rugakur nirqan: <<Taytay, warmi tsurïmi wañuykanna. Aywaykulläshun. Yataykuptikillam kutikaskinqa>>.

24Tsaynö rugakuptinmi Jairuwan Jesús aywarqan. Aywaptinmi maytsikaq runakuna kichkinakurraq qatiyarqan. 25Tsay runakunawanmi chunka ishkay watana yawar apaywan qeshyaykaq warmipis aywarqan. 26Yawar apaywan alläpa sufrirmi mëdicukunata pägananpaq imaykantapis rantikur usharqan. Imaykawan jampiyaptinpis mas peormi antsarqan.

27Jesús poderösu kanqanta musyarmi atskaq runakuna kaykaptinpis tsay warmi qepallanpa witiykur Jesúspa llatapanta yataykurqan. 28Jesúspa llatapanllatapis yataykur kutikänanpaq kanqanta yarparmi tsaynö rurarqan. 29Yataykuptinmi jina höra yawar apaynin päraskirqan. Tsaymi kutikashqana kanqanta tantiyaskirqan.

30Poderninwan pipis kutikanqanta tantiyaskirmi tumaykur Jesús nirqan: <<¿Pitan llatapäta yatamushqa?>>

31Discïpulunkunanam niyarqan: <<Taytay, kayläya kichki aywaykarqa ¿imanöraq musyayäman mayqan yatashunqaykitapis?>>

32Tsaynö niyaptinmi Jesús rikachakurqan pï yatanqantapis musyananpaq. 33Tsaymi tsay warmi mantsakaywan karkaryarraq Jesúspa puntanman qonqurikuykurqan. Tsaypitam llatapanta yataykurlla kutikanqanta willarqan. 34Jesúsnam nirqan: <<Hïja, creyikamunqaykipitam kutikashkanki. Kananqa kushishqana aywakuy>>.

35Jesús tsaynö parlaykaptinmi Jairupa wajinpita willakuq chaykur Jairuta nirqan: <<Taytay, tsurikiqa wañushqanam. Amana Jesústa pushaynatsu>>.

36Tsaynö niqta wiyaykurmi Jesús nirqan: <<Ama llakikuytsu. Dios Yayaman creyikuy>>.

37Tsaynö nirmi Pedruta, Santiaguta y Santiagupa wawqin Juanta pusharkur Jairupa wajinman Jesús aywarqan. Wakinkuna aywayänantaqa manam munarqantsu. 38Chaykurmi runakuna alläpa llakikur waqaykäyaqta tarirqan. 39Tsaymi Jesús yaykuskir nirqan: <<¿Imanirtan tsayläya waqaykäyanki? Wamraqa manam wañushqatsu, sinöqa puñuykanllam>>.

40Tsaynö niptinmi asipäyarqan. Tsaypitanam llapan runakunata waqtaman qarquskir Jairuta, warminta y paywan kaykaq discïpulunkunata pusharkur wamra sutaraykanqanman Jesús yaykurqan. 41Tsaychömi makinpita aptarkur wamrata nirqan: <<Talita, cumi>>.

Tsay ninqanqa <<wamra, shäriy>> ninanmi.

42Tsaymi jina höra kawaskamur purir qallaykurqan. Tsay jipashqa chunka ishkay watayuqmi karqan. Kawamunqanta rikaykurmi runakuna alläpa kushikuyarqan. 43Peru kutikätsinqanta pitapis mana willayänanpaqmi Jesús nirqan. Tsaypitanam wamrata mikuyta qarayänanpaq nirqan.

Currently Selected:

Marcos 5: qxn

Highlight

Copy

Compare