Jeremías 3
3
Juknin jukninwan kakuq warminö Jerusalén runakuna kayanqan
1 Dios Yayam nin: <<Pï runapis warminwan rakikaskiptin tsay warmi juk ollquwanna täkuykaptin ¿punta kaq ollqun yapay qorinmantsuraq?#Deut. 24.1-4. ¡Manam! ¡Tsaynö qoriptinqa llapan nacionmi penqakuychö kanqa! Jerusalén runakuna, qamkunapis juknin jukninwan kakuq warminö karmi juk dioskunata adorar kayashkanki. ¿Tsaynö kaskirku manana penqakur noqaman kutimuyta yarpaykäyanki?
2<<Maski jirkakunapa rikachakuyay. Mayqan jirkapa rikachakurpis tsaykunachömi juk dioskunata adorayashkanki.#Deut. 12.2-3. Qamkunam desiertuchö mañösa warminö kayanki. Nänipa päsaq pï jövinwanpis kakunanpaq tsay warmi listu kanqannömi qamkunapis listu kayanki mayqan diostapis adorayänaykipaq. Juk dioskunata adorar tukuyläya jutsakunata rurarmi nacionnikikunatapis taqräyashkanki. 3Tsaynö kayanqaykipitam tamya tiempu witsay ni jachakuna tuktunqan witsaypis tamyamushqanatsu.
<<Manana penqakur pïmaywanpis kakuq warminömi qamkunapis mana penqakuq kayanki. 4Tsaynö kaykarmi mana penqakur niyämanki: <Qamqa taytäkunam kanki. Wamrallaraq kayaptïmi yanapayämarqayki. 5Noqakunawan amana rabyakuynatsu. Tsaypa rantin perdonaykayämay>. Tsaynö nir mañakaykäyämarpis mana alli ruraykunataqa manam dëjayashkankitsu>>.
Israel nación runakuna kayanqannö Judá nación runakunapis kayanqan
6Josías mandakuq rey kanqan witsaymi#2Rey. 22.1—23.30; 2Crón. 34.1—35.27. Dios Yaya nimarqan: <<¿Rikashkankiku mana cäsukuq Israel nación imata ruranqanta?#3.6 Kay versïculupita hasta versïculu 11-yaqmi Israel nación runakunatawan Judá nación runakunata jipashman iwalatsin. Noqata dëjaskayämarmi llapan lömakunachö y rämasapa jachakuna chakinchö juk dioskunata adorashqa. Tsaynö karmi ollqunta mana respitaq warminö kaykan.
7<<Tsaynö ruraptinpis jutsata rurashqa karpis noqaman kutimunanpaq kanqantam yarparqä. Peru manam kutimushqatsu. Tsaytam rikashqa mana wiyakuq ñañan Judápis.
8<<Noqawan kaykar juknin jukninwan imaypis kakunqanpitam Israelwan rakikar qarqushkä.#3.8 Tsaynö päsashqa pachak (100) wata Jeremías manaraq kaptinmi. Tsaypaq masta musyanaykipaq liyinki 2Rey. 17.1-23. Tsaytam Israelpa mana cäsukuq ñañan Judá rikashqa. Peru rikaykarpis Judáqa penqakunqanpa rantinmi paypis mañösa warminö juknin jukninwan kakushqa. 9Tsaymi rumipita y qerupita rurashqa ïdulukunata mana penqakur adorashqa. Tsaynö ruranqanpitam Judá nacionpis alläpa taqrashqa kaykan. 10Noqaman kutimurpis janan shonqullam adoraq tukaman. Noqa Dios Yayam nï>>.
Israel nación runakuna Dios Yayaman kutiyänanpaq willakunqan
11 Dios Yayam nimarqan: <<Mana cäsukuq Israel runakunapitapis mas peormi Judá runakuna engañayämashqa. 12Norti kaqläpa rikar Israel nación runakunata niy:
<<Dios Yayam nin:
<¡Mana cäsukuq Israel runakuna, noqaman kutiyämuy!
Kutiyämuptikim kushishqa chaskishayki.
Llakipäkuq karmi mayjina piñashqa kaykarpis perdonashayki.
13Peru mana cäsukuq kaynikikunawan jutsayuq kayanqaykita reconöcikuyay.
Qamkunam juk warmi adulteriuchö kanqannö rämasapa jachakunapa chakinchö juk dioskunata adorayanki.
Noqa Dios Yayam nï> >>.#Eze. 23; Ose. 2.2-20.
14 Dios Yayam nin: <<Mana cäsukuq wamralläkuna, noqaman kutikayämuy. Qamkunam noqapa kayanki. Kutikayämuptikim cada markapita jukta y cada castapita ishkayta Siónchö täkuyänaykipaq churayäshayki. 15Tsaychömi rey kananpaq munanqänö kawakuqkunata churayäshayki. Paykunam tantiyakuq y yachayyuq kar alli rikäyäshunki>>.
16 Dios Yayam nin: <<Tsaychö täkuyaptikim tsurikikunapis atskaman mirayanqa. Tsaychö Pactu Babul mana kaptinpis tsay babulpaq manam ni pipis parlanqanatsu ni watukanqanatsu. Ni juk babulta rurayänanpaqpis manam yarpäyanqanatsu.#Éxo. 25.10-22. 17Tsay witsaymi Jerusalénpaq niyanqa Dios Yayapa trönun kanqanta.#3.17 Pactu Babul tsapanan jananchö Dios Yayapa trönun kananpa rantinqa (Éxo. 25.22; 1Sam. 4.4) Jerusalénchönam trönun kanqa. Tsaynö kaptinmi runakuna kushikur Pactu Babulta watukäyanqatsu.
<<Jerusalénmanmi maytsay nacionpitapis runakuna shayämunqa adorayämänanpaq. Mananam shonqunkuna munanqannö jutsata rurar puriyanqanatsu.
18<<Tsay witsaymi Israel runakuna y Judá runakuna norti kaqlä nacionchö täkuyanqanpita kutiyämunqa. Llapan qorikaskirmi unay castankunata entreganqä nacionchö täkuyanqa.#Gén. 13.14-15.
19<<Israel runakuna, qamkunatam tsurïtanö imaypis rikayta munarqä.
Maytsay nacionpita mas alli nacionnikikuna kanantam munarqä.
<¡Taytay!> niyämänaykipaq kaqtam yarparqä.
Imaypis mana dëjayämänaykipaq kanqantam yarparqä.
20Peru tsaynö kuyaykäyaptiqmi dëjayämashkanki.
Ollqunta jaqiskir juk ollquwan aywakuq warminömi juk dioskunata adorayashkanki.
Noqa Dios Yayam nï.
21<<¡Desiertukunachö qayaraykachäyanqanmi wiyakämun!
Tsaychömi Israel runakuna waqarnin pillapis llakipaykunanpaq mañakuykäyan.
Paykunam tsaynö kaykäyan Diosninkuna kaykaptï mana cäsuyämar jutsata rurayanqanpita.
22<<Mana cäsukuq tsurïkuna, ¡noqaman kutikayämuy!
Kutikayämuptikim mana cäsukuq kayanqaykipita perdonayäshayki.
<<Tsay witsaymi Israel runakuna niyämanqa:
<Tayta, noqakunaqa qammanmi kutikayämü.
Noqakunapaqa qammi Diosnïkuna kanki.
23Mana serviqllapaqmi lömakunachö altarkunaman juk dioskunata mañakuq aywayashkä.
Mana serviqllapaqmi jirkakunachöpis tsay dioskunapaq fiestakunata rurayashkä.
Dios Yayallä, qamllam salvayämanki.
24Mana väliq ïdulukunata penqakuypaq adorayanqäpitam imaykäkunapis ushakashqa.
Tsaymi wamrallaraq kaykäyaptï mamäkuna y taytäkuna miratsiyanqan üshankuna, wäkankuna warmi y ollqu tsurinkunapis ushakäyashqa.
25Unay castäkuna y kikïkunam jöven kayanqäpita jutsata rurar rabyatsiyashkaq.
Tsaynö jutsasapa kayanqäpitam alläpa penqakur umpuräkuyä> >>.
Currently Selected:
Jeremías 3: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
