Isaías 42
42
Serviqninpaq Dios Yaya ninqan
1Dios Yayam nin:
<<Servimaqnï imanö kanqanta tantiyayay.
Paytam noqa yanapä.
Paytam noqa akrashkä.
Paypitam kushishqa kaykä.#Mat. 3.17; 17.5; Mar. 1.11; Luc. 3.22; 9.35.
Espïritütam payman kachamushkä.
Paymi maytsay nación runakuna alli kawakuyänanpaq shumaq rikanqa.
2<<Payqa manam piñapanqatsu ni qayapanqatsu.
Cällikunachöpis manam qayaykachar purinqatsu.
3Tsillishqa shoqushtapis manam pakinqatsu.
Wañunaykaq aktsitapis manam wañutsinqatsu.#42.3 Kay textuchömi llakikuqkunata iwalatsin llaktishqa shoqushman y upinaykaq aktsiman.
Payqa llapanpaqpis alli justiciatam ruranqa.
4<<Kay patsachö alli kawakuyänanpaqmi shumaq yachatsikunqa.
Tsayta manaraq yachatsikurqa manam jamaytapis tarinqatsu.
Karu nacionchö täkuqkunapis pay yachatsikunqantam wiyayta munayanqa>>.#Mat. 12.18-21.
5Dios Yayam ciëluta kamar qoyllurkunata entërupa mashtamurqan.
Paymi kay patsata y kay patsachö wayuqkunatapis kamarqan.
Paymi runakunatapis kawaynin qaran.#Gén. 1—2; Hech. 17.24-25.
Paymi serviqninta nin:
6<<Noqa Dios Yayam qamta qayashkaq munanqäta ruranaykipaq.
Makipita janchashqa puritsirnikim llapan imaykachöpis yanapashayki.
Qamtam churashayki Israel runakunawan pactu ruranqäta cumplinaykipaq.
Tsaynöllam churashayki maytsay nacionkunapaq aktsi kanaykipaq,#Isa. 49.6; 60.1-3; Luc. 2.31-32; Juan 8.12; Hech. 13.47; 26.23.
7qaprakunata kutikätsinaykipaq,
prësukunata jipimunaykipaq
y tutapäpukushqanö kawaqkunata aktsiman jipinaykipaq.
8<<Noqapam shutï Yahweh.
Noqallata runakuna adorayämänantam munä.#Isa. 48.11.
Manam ima ïdulutapis adorayänanta munätsu.
9Ñawpata willakatsinqänöllam llapan kashqa.
Kananmi yapay imapis kananpaq kaqta willakatsiyaq.
Pipis manaraq musyaptinmi qamkunata musyatsiyaq>>.
Salvakuq kanqanpita Dios Yayata alabanqan
10Mushuq cantuwan Dios Yayata alabayay.
Mayjina karuchö täkuqkunapis payta alabayätsun.
Lamar jananpa büquiwan päsaqkunapis alabayätsun.
Lamar rurinchö kawaqkunapis alabayätsun.
Costachö täkuqkunapis alabayätsun.#Sal. 96.1; 149.1.
11Desiertuchö kaykaq markakunapis alabayätsun.
Cedar runakunapis alabayätsun.
Sela markachö täkuq runakunapis alabayätsun.
Jirka puntanman witsarkur maytsayman wiyakänanpaq alabayätsun.
Kushikur alabayätsun.
12Costa markakunachöpis Dios Yayata alabayätsun.
13 Dios Yayaqa valienti soldädunömi guërrata rurananpaq shamunqa.
Qayaykacharnin atacarmi contrankunata ushakätsinqa.
14Dios Yayam nin:
<<Atska watam upälla kakur kuyanqä runakunata salvashkätsu.
Chikiqninkuna sufritsiyaptinpis mañakayämaptin manam ni ima nishkätsu.
Peru kananmi sïqa kuyanqä runakunata contrankunapita salvashaq.
Qeshyakuq warmi qayaraykachanqannömi qayaräshaq.
15Paykunata salvar nacionninkunaman kutitsinäpaqmi jirkakunatapis lömakunatapis ushakätsishaq.
Tsaychö wiñaq jachakunatapis ushakänanpaqmi tsakitsishaq.
Mayukunatapis desiertumanmi tikraskatsishaq.
Qochakunatapis tsaki allpamanmi tikraskatsishaq.
16<<Qaprakunatam#42.16 Kay textuchömi kuyanqan runankunata iwalatsin qaprakunaman. Tsaymi nin kuyanqan runankuna qapranö kayaptinpis Dios Yaya yanapaptin paykunapaq imapis mana aja kananpaq. mana reqiyanqan nänipa pushashaq.
Imaypis mana puriyanqan nänipam puritsishaq.
Paykuna aywayänanpaqmi paqastapis atsikyaqman tikratsishaq.
Mana alli nänitapis shumaqmi allitsashaq.
Tsaykunatam rasunpa rurashaq.
17<<Tsayta musyarmi ïdulukunaman confiakuqkuna penqakuyanqa.
Ïdulukuna diosninkuna kanqanta yarparpis alläpa penqakurmi aywakuyanqa.#Isa. 45.16, 20.
Israel runakuna mana yachayyuq kayanqan
18<<Israel runakuna, qamkunam upanö y qapranö kayanki.
Upanö karpis niyanqaqta cäsukuyay.
Qapranö karpis shumaq rikäyay.
19Servimaqnï karpis qamkunaqa qaprapitapis mas qapram kayanki.
Willakuqnï karpis qamkunam upapitapis mas upa kayanki.
20Ima päsanqanta rikarpis manam yarpachakuyankitsu.
Ima ninqäta wiyaykarpis manam tantiyakuyankitsu>>.
21Salvakuq karmi Dios Yaya munan kuyanqan runankuna leyninkunata shumaq yachakur cäsuyänanta.
22Peru manam cäsuyashqatsu.
Tsaymi Dios Yaya castigar chikiqnin runakunata kacharqan paykunata suwapuyänanpaq.
Kananqa contrankunata mantsarmi machaykunaman tsinkakuyan.
Wakinnam calabösuchö wichqaräyan.
Prësu apayaptinpis manam ni pï kashqatsu washänanpaq.
Llapan imaykankunata apayaptinpis manam ni pï qechüsinanpaq kashqatsu.
23Peru tsaynö kaykaptinpis ¿mayqallaykiqa imapita sufriyanqaykita tantiyakuyankitsuraq?
Waray warantinkuna ima päsananpaq kanqanta tantiyakur ¿mayqallaykiqa cäsukuyankitsuraq?
24¿Pitan permïtishqa chikimaqnintsikkuna venciskamarnintsik imaykantsikkunatapis apayänanpaq?
Tsaynö päsamänapaqmi Dios Yaya permïtishqa.
Paytam rabyatsishkantsik jutsata rurar.
Yätsikuyninkunata y mandamientunkunata mana cäsurmi kawashkantsik.
25Tsaymi Dios Yaya alläpa rabyar soldädukunata kachamushqa atacamänapaq.
Tsay soldädukuna ninata tsariskatsiyaptinmi imaykatapis rupar ushashqa.
Tsaynö kaptinpis manam tantiyakushkantsiktsu.
Nina ushamashqapis manam cäsukushkantsiktsu.
Currently Selected:
Isaías 42: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
