Isaías 41
41
Israel runakunata yanapananpaq ninqan
1Dios Yayam nirqan:
<<Costachö nación runakuna, wiyayämay.
Maytsay nacionkunachö täkuq runakunapis, valorakuyay.
Defendikuyänaykipaq shayämuy.
Qamkunata juzgayänaqpaq qorikäyämuy.
2<<Rupay yarqamunan kaqläpita llapanta venciq reyta yuritsimunqäta ¿manaku tantiyayanki?#41.2 Tsay reyqa Persia nacionpa mandakuqnin Cirum karqan. Paytam Dios Yaya akrarqan Babilonia nacionta vencinanpaq (Isa. 45.1-4).
¿Manaku tantiyayanki poderyuq kananpaq tsay reyta churanqäta?
Paymi wakin nacionkunata y reykunatapis poderninchö katsin.
Espädanwanmi runakunata jankat ushakätsin.
Flëchaptinmi runakuna wakpa kaypa päjanöpis witsikäyan.
3Contrankunatam päriyparaq qatikachäyan.
Qatikacharmi imaypis mana puriyanqan nänipa mana mantsakur aywayan.
4<<Tsaynö kananpaq pï permïtinqanta ¿manaku tantiyayanki?
¿Manaku tantiyayanki qallananpita pï permïtinqanta?
Noqa Dios Yayam qallanan y ushanan kä.#Isa. 43.10; 44.6; Apoc. 1.8, 17; 22.13.
5<<Imayka ruranqäta musyarmi costachö kaq nación runakunapis alläpa mantsakäyan.
Maytsay nacionkunachö täkuqkunam tsuktsukyäyan.
Pelyayänanpaqmi qorikäyan.
6Mana mantsakäyänanpaqmi kikinkunapura animatsinakuyan.
7Ïduluta ruraq runapis qellaywan enchapaq runatam animatsin.
Martïlluwan takaqpis yunkichö takaqtam animatsir nin: <¡Allitam rurashkanki!>
Rurayta ushaskirmi ïdulu mana kuyunanpaq clävuswan segurayan.
8<<Jacobpita miraq Israel runakuna, qamkunam servimaqnï kayanki.
Qamkunatam noqa akrayashkaq.
Qamkunam amïgü Abrahampita miraq kayanki.#2Crón. 20.7; Stg. 2.23.
9Tsayläya karupitam qamkunata qoriyämushkaq.
Maytsaychö kaykaqtam qayayämushkaq.
Qamkunatam niyarqaq: <Servimaqnïmi kayanki.
Akranqä kayaptikim dëjayäshaykitsu>.
10Qamkunawan kaykaptïqa ama mantsakuyaytsu.
Diosnikikuna kaykaptïqa ama llakikuyaytsu.
Kallpaykikuna kananpaqmi imaypis yanapayäshayki.
Derëcha kaq makïwanmi imaypis jancharäyäshayki.
11<<Contrayki shäriqkunam llapan penqakur ni imanakayta puëdiyanqatsu.
Achäqui ashipaqnikikunam jankat ushakäyanqa.
12Guërrachö atacayäshuqnikikunata manam ni pipis yarpanqatsu.
Paykunata ashirpis mananam tariyankinatsu.
13 Diosnikikuna karmi makipita jancharaykäyaq.
Tsaymi niyaq: <Ama mantsakäyaytsu. Yanapayäshaykim>.
14<<Jacobpita miraq Israel runakuna, manakaqnölla karpis ama mantsakäyaytsu.
Wallkaqlla karpis ama llakikuyaytsu.
Noqam yanapayäshayki.
Israel runakunapa santu Diosnin karmi salvayäshayki.
15Alli afilashqa atska kiruyuq trilladöranö kayänaykipaqmi churayashkaq.
Jirkakunata trïllarmi allpallatana dëjayanki.
Lömakunatapis trïllarmi päjallatana dëjayanki.#41.15 Kay versïculuchö ninqanqa qamkunapaq manam imapis ajatsu ninanmi.
16Jurquïtawan jitayaptikim tsay päjata wayra apanqa.
Shukukuy shamurmi wakpa kaypa witsinqa.
Tsaynö yanapayaptiqmi alläpa kushikuyanki.
Israel runakunapa santu Diosnin kaptï kushishqam alabayämanki.
17<<Waktsakuna yakuta mana tarir shiminkuna tsakiskiptin noqata mañakayämätsun.
Noqa Diosnin karmi mañakayämaptin yanapashaq.
Israel runakunapa Diosnin karmi dëjashaqtsu.
18Yaku mana kanqan jirkakunachömi mayukunata pashtatsimushaq.
Qechwa pampakunachöpis pashtaq yakukunatam pashtatsimushaq.
Desiertukunatapis pätsimanmi tikratsishaq.
Yaku mana kanqanpam mayunöraq yaku aywanqa.#Isa. 35.6-8; 43.19-20; 44.3-4.
19Desiertumanmi cedru, acacia, arrayán y olïvu jachakunata plantashaq.
Tsaki jirkakunachömi ciprés, pïnu y abëtu jachakunata wiñätsimushaq.
20Tsayta rikarmi pïmaypis noqa ruranqäta tantiyayanqa.
Tsaynöllam tantiyayanqa Israel runakunapa santu Diosnin kanqäta>>.
Dios Yaya rasunpa kaq Dios kanqan
21Jacobpita miraqkunapa mandakuqnin rey Dios Yayam nin:
<<Ïdulukuna kawaq kayaptinqa defendikuyänanpaq mä apayämuy.
Imata kamayanqantapis mä niyämätsun.
22Shamuq watakunachö ima kananpaq kaqtapis mä willayämätsun.
Unay kaq watakunachö ima päsanqantapis qallananpita willayämätsun.
23Rasunpa Dios kayanqan musyakänanpaq waray warantinkuna ima päsananpaq kanqanta mä willayämätsun.
Imallatapis allita o mana allitapis mantsakaypaq kaqkunata mä rurayätsun.
24Ïdulukunaqa manam ni ima rurayta puëdiyantsu.#Jer. 10.5.
Manam ni imapaqpis väliyantsu.
Ïdulukunaman confiakuqkunam noqapaq alläpa melanaypaq kayan.
25<<Rupay yarqamunan kaqlächö juk runatam shutinpa qayashkä.
Paymi norti kaqläpa shamunqa.
Manka ruraq runa mituta jaruqnömi reykunatapis jankat ushakätsinqa.
26Tsay runa shamunanpaq kanqanta manam mayqan ïdulupis willakushqatsu.
Tsay ïdulu unaypitana willakushqa kaptinqa rasunpa musyanqantam tantiyashwan karqan.
Peru manam ni imaypis willakuyashqatsu.
Manam ni mayqanpis musyatsikuyashqatsu.
27<<Sión runakunata yanapanäpaqmi mas puntatana willakatsirqä.
Tsay willakuytam Jerusalénman willakatsirqä.
28Mayjina ashirpis manam mayqan ïdulu noqanö willakatsinqanta tarïtsu.
Ïdulukunaqa tapuptïpis manam contestayämantsu.
29Ïdulukunaqa manam Diostsu kayan.
Ni imanakayta manam puëdiyantsu.
Ïdulukunaqa manam ni imapaq väliyantsu>>.
Currently Selected:
Isaías 41: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
