Isaías 19

Egipto nación imanö kananpaq ninqan

1Kaychömi qellqashqa kaykan Egipto nación imanö kananpaq Dios Yaya revelanqan.#Jer. 46.2-26; Eze. 29.1—32.32.

Sas aywaq pukutay jananchömi Egiptuman Dios Yaya shamuykan.

Egiptuchö ïdulukunam paypa puntanchö tsuktsukyäyan.

Alläpa mantsakaywanmi Egipto runakunapa shonqunkunapis ushakaykanna.

2Dios Yayam nin:

<<Noqam permïtishaq Egipto runakuna kikinkunapura chikinakuyänanpaq.

Chikinakurmi wawqinkunawan y runa majinwanpis piñanakuyanqa.

Juk markachö täkuqkunam jukaq markachö täkuqkunawan piñanakuyanqa.

Juk nación runakunam jukaq nación runakunawan guërrachö kayanqa.

3Egipto runakunam mantsakashqa kayanqa.

Imata rurayänanpaq yarpäyanqantapis manam rurayanqatsu.

Tsaymi imata rurayänanpaqpis ïdulukunata, brüjukunata, wañuqkunapa almankunata y adivïnukunata tapukuyanqa.

4Egipto runakunatam juk reypa poderninman churashaq.

Tsay reymi alläpa mana alli runa kanqa>>.

Llapanta mandaq Dios Yayam tsaynö nin.

5Nilo mayu tsakiptinmi raqrapis yakunnaq tikranqa.

6Sekyakunachö qocharaq yakum asyanqa.

Raqrakunapa aywaq yakum tsakinqa.

Shoqushkuna y ututukunam tsakinqa.

7Nilo mayu kuchunkunam tsakinqa.

Lädunkunachö qewakunam jankat qashyanqa.

Imayka muruyanqanpis jankatmi tsakinqa.

8Anzuëluwan Nilo mayuchö pescaqkunapis llakikurmi waqayanqa.

Atarräyawan pescaqkunapis alläpam llakikuyanqa.

9Lïnuta putskaqkunapis lïnu manana kaptinmi ni imanayta puëdiyanqatsu.

10Tëla awaqkunapis lïnu ushakaptinmi alläpa llakikuyanqa.

Arupukuqkunapis alläpam mantsakäyanqa.

11¡Zoán markapa autoridäninkunam yarpayninnaq upa runakuna kayan!

¡Rey Faraónta yätsiqkunapis upilakashqam kayan!

¡Imanirtan Faraónta niyanki tantiyaq runakuna casta kayanqaykita!

¡Imanirtan payta niyanki unay reykuna casta kayanqaykita!

12Faraón, ¿maytan musyapakuqnikikuna? Rasunpa yachayyuq karqa mä musyatsiyäshuy llapanta mandaq Dios Yaya Egiptuta imanö rurananpaq yarpanqanta. 13Zoán markapa autoridäninkunam upilakäyashqa. Menfis markapa autoridäninkunam llutanta creyiyan. Provinciakunapa mandaqninkunam Egipto runakunata llutanta creyitsiyashqa. 14Egipto runakunatam Dios Yaya pantatsishqa. Tsaymi lanzayanqanyaq machashqa tashtapaykachaqnö imata rurayänanpaqpis tantiyayantsu. 15Egipto nación ushakänan junaq chämuptinqa manam ni mandaqninkuna rey ni patsan runakunapis ni rïcukunapis ni waktsakunapis salvanqatsu.

Egipto runakuna Dios Yayata serviyänanpaq ninqan

16Llapanta mandaq Dios Yaya castiganan junaqmi Egipto runakuna warminö manchallïshu kayanqa. Paykunata castigananpaq makin alistashqa kanqanta musyarmi alläpa mantsakar tsuktsukyäyanqa. 17Judá runakunapitam alläpa mantsakuyanqa. Judá runakunapaq parlayaptillanmi yarpäyanqa llapanta mandaq Dios Yaya castigananpaq kanqanta. Tsayta yarparmi alläpa mantsakäyanqa.

18Tsay junaqmi Egiptuchö pitsqa markachö hebreo idiömata parlayanqa. Tsaychö täkuqkunam llapanta mandaq Dios Yayallata serviyänanpaq prometiyanqa. Tsay pitsqa markakunapita jukaqpam shutin kanqa Herez.

19Tsay junaqmi patsan Egiptuchö Dios Yayapaq juk altarta perqayanqa. Mujunninchömi Dios Yayata yarpäyänanpaq juk shuytu rumita ichïtsiyanqa. 20Tsaynö rurayanqa llapanta mandaq Dios Yayata Egiptuchö serviyanqanta pïmaypis musyayänanpaqmi.

Pipis sufritsiptinmi Dios Yayata mañakuyanqa. Tsaymi juk salvakuqta kachamunqa ñakaypita jipinanpaq. 21Tsaynöpam Egipto runakunata Dios Yaya musyatsinqa poderösu kanqanta. Tsayta musyarmi Egipto runakuna sacrificiukunata y tsaki mikuy ofrendakunata prometiyanqannölla templuman apayämunqa.

22Mana cäsukuq kayanqanpita Egipto runakunata castigarpis Dios Yayam yanapanqana. Tsaynömi yanapanqa paykunapis Dios Yaya ninqanta cäsuyaptin.

23Tsay witsaymi jatun näni kanqa Egiptupita Asiriayaq. Tsaymi Asiria runakuna Egiptuman aywayaptin Egipto runakunapis Asiriaman aywayanqa. Egipto runakunawan Asiria runakuna tallukaskirmi Dios Yayata serviyanqa.

24Israel runakunam Egipto runakunawan y Asiria runakunawan tallukäyanqa. Tsaynöpam maytsaychö täkuqkunapaq bendición kanqa.#Gén. 12.3. 25Llapanta mandaq Dios Yayam bendicionninta churar ninqa: <<Kuyanqä Egipto runakuna, kamanqä Asiria runakuna y herenciä Israel runakunam bendicionnïta chaskiyanqa>>.#19.25 Runakunapa herencianmi chakra, waji, yuraq qellay o wätakuna. Peru Dios Yayapa herencianmi sïqa payta cäsuqkuna.

Currently Selected:

Isaías 19: qxn

Highlight

Copy

Compare