1 Pedro 3

Ollquyuqkunata y warmiyuqkunata yätsinqan

1Warmikuna, Jesucristupa willakuyninman mana creyiyaptinpis ollquykikunata cäsuyay.#Efe. 5.22; Col. 3.18. Tsaynö kawayaptikim mana yachaykätsiyaptikipis tantiyakurnin creyikuyanqa. 2Kuyayanqaykita y respitayanqaykita rikarmi tantiyakuyanqa.

3Kuyakuypaq kayanqaykiqa manam tukuyläyaman ñaqtsakuyanqaykitsu, qoripita adornukunata churakuyanqaykitsu ni alli kaq llatapakunata shukukuyanqaykitsu. Tsaykunaqa janaykikunallatam shumaqyätsin.#1Tim. 2.9. 4Tsaypa rantinqa qollmi shonqu kayanqayki y pïmaywanpis alli kawakuyanqaykim kuyakuypaq kaykan. Tsaynö kawakuyanqaykim Dios Yayapaqqa mas alli.

5Tsaynömi Dios Yayaman confiakuq unay santa warmikunapis adornakuyänanllapaqtsu yarpachakuyaq, sinöqa ollqunkunapa mandädunchö kawakuyänanpaqmi. 6Tsaynöllam Sarapis ollqun Abrahamta cäsur <<tayta>> nir respëtunwan rikarqan. Runakuna chikiyäshuptikipis allikunallata rurarqa Saranömi kaykäyanki.

7Tsaynölla ollqukuna, warmikikunata imanö kuyayänaykipaq tantiyakuyay.#Efe. 5.25; Col. 3.19. Dios Yaya kuyayäshurniki warmikikunata y qamkunatapis salvayäshushkanki. Warmikikunaqa imayka delicädu väsunö kayan. Tsaymi shumaq respëtuykikunawan cuidayänayki. Warmikikunawan mana alli kawayaptikiqa mañakuyanqaykitapis Dios Yaya manam wiyayäshunkitsu.

Kuyanakur kawakunapaq ninqan

8Llapayki juk shonqulla llakipänakur y juk castanölla kuyanakur pïmaywanpis shumaq kawakuyay. 9Pipis mana allita rurayäshuptiki ama mana alliwanqa kutitsiyankitsu. Ashayäshuptikipis ama ashayankitsu. Bendicionta chaskiyänaykipaq Dios Yaya akrayäshunqaykita musyaykarqa chikiyäshuqnikikunapis bendicionta chaskiyänanpaq Dios Yayata mañakuyanki. 10Diospa palabranchömi nin:

<<Alli kawayta munarqa

y kushishqa kawayta munarqa

mana allikunata ama parlayaynatsu.

Tsaynölla imaypis ama llullakuyaytsu.

11Mana allikunata rurayanqaykipa rantin alli kaqkunallatana rurayay.

Piñakuyanqaykipa rantin pïmaywanpis alli kawakuyay.

12Alli ruraqkunatam Dios Yaya imaypis cuidan.

Mañakuyanqantam wiyan.

Peru mana alli ruraqkunatam sïqa rikaytapis munantsu>>.#Sal. 34.12-16.

Ñakarpis mana llakikunapaq ninqan

13Allillata ruraykäyaptikiqa ¿piraq sufritsiyäshunkiman? 14Peru allikunata ruraykäyaptiki sufritsiyäshuptikiqa Dios Yayam yanapayäshunki.#Mat. 5.10. Tsaymi pipitapis mantsakuyankitsu ni chikiyäshuptikipis llakikuyankitsu. 15Tsaypa rantinqa Jesucristo#3.15 Wakin qepa kaq griego copiakunachömi Dios Yaya nin. mandashuqniki kanqanta tantiyar pay munanqannö kawayanki.#Isa. 8.12-13.

Tsaynölla Jesucristuman imanir creyikuyanqaykita pipis tapuyäshuptiki shumaq tantiyatsiyänaykipaq listu kayanki. 16Peru respëtuykikunawan y alli shimillaykikunapa tantiyatsiyanki. Tsaynölla runa majikikunawanpis shumaq kawakuyanki. Tsaynö kawayanqaykita rikarmi contraykikuna parlaqkunapis penqakuyanqa. 17Mana allita rurayanqaykipita sufriyanqaykipa rantin mas allim kanman Dios Yaya munaptinqa allita rurayanqaykipita sufriyaptiki.

18Jesucristupis jutsannaq kaykarmi jutsasapakuna rayku ñakarqan. Dios Yayaman pushamänapaqmi jutsantsikpita juk kutilla wañurqan. Wañuptinpis Espíritu Santum kawatsimurqan. 19Espíritu Santupa poderninwanmi prësunö qaykuraykaq espïritukunaman#3.19 Kay versïculuchö espíritu ninqan palabraqa abësis runakuna ninan y abësis supaykuna ninanmi. Tsaymi prësu qaykuraykäyanqanta nirqa wakin runakuna yarpäyan jutsa ruraychö prësunö kaykaq runakunapaq parlanqanta, wakin runakuna yarpäyan Hadeschö kaykaq runakunapaq parlanqanta y wakin runakuna yarpäyan Hadeschö kaykaq supaykunapaq parlanqanta. Jesucristo willaq aywanqanta nirqa wakin runakuna yarpäyan Jesucristo Hadesman aywar willakunqanta. Tsaynömi yarpäyan Satanásta y wañuyta vencinqanta tsaychö willakunqanta. Wakin runakunanam yarpäyan kay patsachö willakunanpaq Noéta Jesucristo yanapanqanta. willaq aywarqan. 20Tsay espïritukunaqa Noé kawanqan witsay Diosta mana cäsuqmi kayarqan. Tsay witsay runakuna jutsata rurayaptinpis Dios Yaya manam sasllatsu castigarqan, sinöqa arca rurayta Noé ushanqanyaqmi shuyararqan. Tsay arcaman pusaq runakunallam yaykuyarqan. Paykunallam yaku wampütsiptin diluviupita salvakäyarqan.#Gén. 6.1—7.24. 21Tsay yakuqa bautizakunqantsik yakunömi. Bautismuqa manam cuerpuntsik limpiu kananpaqtsu, sinöqa jutsantsikta dëjaskir Dios Yaya munanqannö kawakunapaqmi. Tsaymi Jesucristo kawamushqa kaptin salvakuntsik. 22Paymi ciëluman kutir Dios Yayapa derëchu kaq lädunchöna kaykan. Tsaymi angelkuna y mandakuqkunapis paypa poderninchö kaykäyan.

Currently Selected:

1 Pedro 3: qxn

Highlight

Copy

Compare