1 Pedro 4

Jutsata mana ruranapaq ninqan

1Jesucristo noqantsik rayku kay patsachö ñakashqa kaykaptinqa qamkunapis ñakayänaykipaq listu kaykäyay. Jesucristuman creyikuyanqaykipita sufrirmi jutsa ruraypaqqa yarpäyankinatsu. 2Tsaynö kawarmi mana alli ruraykunata rurayankinatsu, sinöqa kay patsachö kawayanqaykiyaq Dios Yaya munanqannö kawakuyanki. 3Puntataqa wakin runakunanölla jutsata rurarmi warmipis ollqupis juknin jukninwan purikuyarqayki, tukuyläya mana allikunata rurayarqayki, machäyarqayki y ïdulukunatapis adorayarqayki. Kananqa amana tsaynö kawayaynatsu.

4Puntata kawayanqaykinö manana kawayaptikim amïguykikuna mana tantiyakurnin contraykikuna parlayan. 5Peru paykunataqa kawaqkunata y wañushqakunata juzgaq Dios Yayam cuentata mañanqa. 6Llapan runakunata juzgananpaq kaptinmi Jesucristupa alli willakuyninta willakuyarqan. Tsaymi creyikuqkuna wañushqana karpis Dios Yayapa puntanchöna kawaykäyan.

Yanapanakunapaq ninqan

7Kay patsa ushakänanpaq ichikllanam faltan. Tsaynö kaykaptinqa shumaq kawakuyänaykipaq yarpachakur imay hörapis Dios Yayata mañakuyay. 8Imanö karpis llapan shonquykikunawan kuyanakuyay. Rasunpa kuyakuq runaqa llutankunata rurayaptinpis perdonanmi.#Prov. 10.12; 1Cor. 13.7. 9Pipis wajikikunaman chämuptin mana piñaykacharlla patsatsiyanki.#Rom. 12.13.

10Dios Yayam llakipäyäshurniki tukuyläya habilidäta qarayäshushkanki. Tsaymi habilidäta chaskiyanqaykimannö juknin jukninwanpis yanapanakuyanki. Tsaynö yanapanakurqa Dios Yaya munanqannömi kawaykäyanki. 11Willakuyänaykipaq habilidäta chaskishqa kaykarqa Dios Yayapa willakuyninta willakuyay. Jukkunata yanapayänaykipaq habilidäta chaskishqa kaykarqa Dios Yaya yanapayäshunqaykinö yanapayay. Tsaynöpam imaykachöpis Jesucristo rayku Dios Yayata alabayanqa. ¡Dios Yayaqa imayyaqpis poderyuqmi! ¡Payqa imayyaqpis alabashqa kaykullätsun! Amén.

Ñakarpis kushishqa kawakunapaq ninqan

12Kuyashqa wawqikuna y panikuna, imayka pruëbakunata päsarpis ama llakikur niyaytsu: <<¿Imanirnaraq alläpa ñakä?>> 13Tsaypa rantinqa Jesucristo ñakanqannö ñakarpis kushikuyay. Tsaynö ñakarpis kay patsaman chipakyarraq kutimunqan junaqmi alläpa kushikuyanki.#Rom. 8.17; 1Ped. 4.1. 14Dios Yayapa poderösu Espïritun qamkunawan kaykaptinqa Jesucristuman creyikuyanqaykipita ashayäshuptikipis kushikuyay. [Ashayäshurnikim Jesucristuta manakaqman churaykäyan. Peru qamkunam sïqa payta alabaykäyanki.]

15Runa majikikunata wañutsiyanqaykipita, suwakuyanqaykipita imaykamanpis llutalla mëtikuyanqaykipita o imatapis mana allikunata rurayanqaykipita sufrirmi penqakuypaq kayanki. 16Peru Jesucristuman creyikuyanqayki rayku sufrirqa ama penqakuyaytsu. Tsaypa rantin salvayäshunqaykipita Dios Yayata kushishqa alabayay.

17Jesucristuman creyikuqkuna ñakayänanpaq tiempu chämushqanam. Noqantsikchö ñakaykuna qallaykaptinqa Dios Yayapa alli willakuyninta mana cäsuq runakuna ¡imanöraq ñakayanqa! 18Dios Yayata cäsur kawaqkunapis ñakarraq salvakaykäyaptinqa Diosta mana cäsukuqkunaqa ¡imanöraq kayanqa!

19Dios Yaya munanqannö kawayanqaykipita sufrirpis kamakuq Dios Yayaman confiakur alli kaqkunallata rurar sïguiyanki. Payqa ima päsayäshuptikipis manam qonqayäshunkitsu.

Currently Selected:

1 Pedro 4: qxn

Highlight

Copy

Compare