1 Pedro 2
2
1Jesucristupa willakuyninta chaskishqana kaykarqa mana alli ruraykunata dëjayay. Ama llullakuyaytsu, ama allish tukuq kayaytsu, ama chikinakuyaytsu, ni washarima kayaytsu. 2Llullu wamra mamanpa chuchunta ayrajar ashinqannö qamkunapis Dios Yayapa palabranta yachakuyay. Tsaynöpam wamra wiñar tantiyakunqannö Dios Yaya munanqannö kawayänaykipaq tantiyakuyanki. Tsaypaqmi Dios Yaya salvayäshushkanki. 3Tsaynö yachakuyänaykipaqmi Dios Yaya kuyakuq kanqanta musyayashkankina.#Sal. 34.8.
Cimientupaq maestru ruminö Jesucristo kanqan
4Jesucristuta runakuna manakaqtanö rikäyaptinpis cimientupaq maestru ruminö kananpaqmi Dios Yaya churashqa. Tsaynö kaykaptinqa Jesucristuman confiakuyay. 5Qamkunapis ruminö kayaptikim Dios Yaya churaykäyäshunki templun kayänaykipaq y payta serviq santu sacerdötikuna kayänaykipaq. Tsaymi altarman churashqa sacrificiunö kar llapan shonquykikunawan payta serviyänayki. Jesucristo rayku serviyanqaykim Dios Yaya munanqannö kanqa.
6Jesucristupaqmi Dios Yayapa palabran nin:
<<Siónmanmi cimientupaq alli kaq rumita churä.
Tsay rumim akrashqa kaykan.
Pipis payman creyikuq kaqqa manam manakaqllapaqtsu creyikunqa>>.#Isa. 28.16.
7Creyikuqkunapaqqa Jesucristo alläpa kushikuypaqmi kaykan. Peru mana creyikuqkunapaqmi sïqa Dios Yayapa palabranchö nin: <<Waji perqaqkuna <kay rumi manam allitsu> nir jitariyanqanmi maestru rumiman tikrashqa>>.#Sal. 118.22.
8Mastam nin: <<Trompisatsikuq y ishkitsikuq ruminömi kashaq>>.#Isa. 8.14-15.
Jesucristuman mana creyikuqkunaqa Dios Yayapa palabranta mana cäsurmi tsay rumichö trompisaqnö kayan. Tsaynö kayänanpaqmi destinashqana kayarqan.
9Peru qamkunam sïqa kaykäyanki Dios Yaya akranqan runakuna, payta serviq sacerdötikuna, kuyanqan santa nación runakuna#Éxo. 19.5-6; Deut. 7.6; Isa. 43.20. y paypa poderninchö kaykaq runankuna.#Isa. 43.21; Tito 2.14. Tutapäpukushqanö kayanqaykipitam aktsiman jipiyäshushkanki#Isa. 9.2. kuyakuq kanqanta pïmaytapis willakuyänaykipaq. 10Ñawpataqa manam Diospa wamrantsu kayarqayki. Peru kananmi sïqa wamranna kaykäyanki. Ñawpataqa manam llakipäyäshurqaykitsu. Peru kananmi sïqa llakipäyäshushkankina.#Ose. 1.6, 9; 2.23.
Dios Yaya munanqannö kawakunapaq ninqan
11Kuyashqa wawqikuna y panikuna, kay patsachö juklä runanö kayaptikim#Sal. 119.19. rugayaq mana alli yarpaynikikunata mana rurayänaykipaq. Tsay yarpaynikikunaqa contraykikunam kaykan. 12Jesucristuman mana creyikuqkunawan shumaq kawakuyay. Alli kawakuyanqaykita rikarmi contraykikuna kanan parlaykarpis Jesucristo kutimunqan junaqqa Dios Yayata alabayanqa.
Autoridäkunata cäsunapaq ninqan
13Señor Jesucristo rayku llapan mandayäshuqnikikunata cäsuyay nación mandakuq rey kaptinpis 14y autoridäkuna kayaptinpis. Autoridäkunatam rey churashqa mana alli ruraqkunata castigayänanpaq y alli ruraqkunapa favornin kayänanpaq. 15Dios Yayaqa allita rurar kawayänaykitam munan. Tsaynö kawayaptikiqa Diosta mana cäsuq runakuna qamkunapaq contraykikuna imatapis manam parlayanqanatsu.
16Munayanqaykinö kawayänaykipaq librim kaykäyanki. Librina karpis jutsata ama rurayankitsu, sinöqa Dios Yayata servirnin pay munanqannölla kawakuyanki. 17Llapan runakunata respitayanki. Creyikuq majikikunawan kuyanakuyanki. Dios Yayapita mantsakur kawayanki. Reyta respitayanki.
Servikuqkuna patronninkunata cäsuyänanpaq ninqan
18Servikuqkuna, patronnikikuna alli runa kaptinpis o mana alli runa kaptinpis respitar cäsuyanki. 19Dios Yaya munanqannö kawakuyanqayki rayku manakaqkunapita sufritsiyäshuptiki mana jaqayar awantakuyanki. Tsaynö awantakurqa allitam ruraykäyanki. 20Mana allikunata rurayanqaykipita sufrirqa ¿ima allitatan ruraykäyanki? Peru allikunata rurayanqaykipita sufrirmi sïqa Dios Yaya munanqannö kawaykäyanki.
21Tsaynö sufriyänaykipaqmi Dios Yaya qayayäshushkanki. Jesucristo noqantsik rayku ñakashqa kaptinmi musyantsik pay ñakanqannö noqantsikpis ñakanapaq kanqanta. 22Payqa manam ni ima jutsatapis rurarqantsu ni pitapis llullatsirqantsu.#Isa. 53.9. 23Imaykata ashayaptinpis manam imatapis nirqantsu. Ñakatsiyaptinpis manam jurapurqantsu, sinöqa jutsata rurayanqanmannö Dios Yaya juzgananpaqmi dëjarqan.#Isa. 53.7.
24Jesucristo cruzchö ñakarmi noqantsik rayku jutsantsikpita wañurqan. Tsaynö wañurqan noqantsikpis jutsa ruraypaq wañur Dios Yaya munanqannö kawanapaqmi. Yawarninta jicharmi kutikätsimashkantsik.#2.24 Manam qeshyayllapita kutikätsimänapaqtsu nin, sinöqa ñakaykunapita, llakikuykunapita y jutsa ruraykunapita salvamänapaqmi nin.#Isa. 53.5. 25Ñawpataqa oqrakashqa üshanömi karqantsik.#Isa. 53.6. Peru kananmi sïqa Jesucristupana kantsik. Paymi mitsimaqnintsik y alli cuidamaqnintsik.
Currently Selected:
1 Pedro 2: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
