KULAVA 16
16
Kulikanga caKola
1Jino #Yuta 11. Kola, mwanaIzahale, mwanaKohate mwanaLevi, naNdatane naAvilame vana vaElyave, naOne, mwanaPelete, ava vana vuLuvene, vayile navatu vakwavo,
2Vakatukile kumeso aMose, navana vaIsalele vamwe nawa, vaka-kulitulaho jalizavu makulukaji avali namakumi atanu, vakivo vaze vasanyikile kwiza kuliwuka lyavakulwane, malunga vapuho.
3Vavawungililile vaMose naAlone, vavambile ngwavo, Muli nakulihaka vyavivulu, mwomwo vaka-lizavu vosena vajila, mutu himutu, kaha Yehova ali mukaci kavo. Xikaho muli nakulizundwila ika helu lyaliwuka lyaYehova?
4Jino Mose hakucivwa, alimbilile cameso-hamavu.
5Ahanjikile kuli Kola nakulizavu lyenyi lyosena ngwenyi, Hacimene numba Yehova alweze ava vanapu venyi nou apwa wajila, kaha mwamupandamisa kuli Ivene. Ou vene mwasakula mwamupandamisa kuli Ivene.
6Lingenu ngana, mbatenu viloso vyakulumbila vize vyalivumba lyamwaza, enu vaKola nalizavu lyenyi lyosena,
7hakenuho kakahya, muhakeho vize vyakulumba vyalivumba lyamwaza kumeso aYehova hamene. Kaha nacipwa, ou mutu kana navasakula kuli Yehova, ikiye mwapwa wajila. Muli nakulihaka vyavivulu, enu vana vaLevi.
8Mose ambile kuli Kola ngwenyi, Enu vana vaLevi, ivwililenu jino.
9Munacimono ngwenu, cuma cacindende tahi? omwo namihandununa Kalunga kavaIsalele kulizavu lyavaIsalele mangana amipandamise kuli Ivene, mangana muzatenga milimo #16.9: Tala 1.50. yakutavanaku yaYehova mwimanenga kumeso alizavu muvazacilenga,
10nomwo nakupandamisa navandumbwove vosena vana vaLevi hamwe? Kaha kumana, namusaka naupilixitu nawa?
11Xikaho ove nalizavu lyove lyosena munamuwungilila Yehova, kaha Alone ikiyeya numba mumutatwokese?
12Mose atumine vatu nakusanyika Ndatane naAvilame, vana vaElyave. Oloze vambile ngwavo, Katute kuyako.
13Omu unatulovola mulifuci lyakumbwambumuka mavele nawuci mangana utujihixile muno mupambo cinapu cuma cacindende tahi, numba ulilingise kupwa umuka-kulitulaho nawa hali etu?
14Kaha nawa, kawatuhetesele mulifuci lyakumbwambumuka mavele nawuciko, cipwe kutuhana uswana wamawande namivinyoko. Nautuva meso amalungava tahi? Katute kuyako.
15Jino Mose akwacile ndombo cikuma, ambile kuli Yehova ngwenyi, Kanda utala wana wavoko. Kangwavatambwile cipwe cimbulu umweko, cipwe kupihisa minavo umwe.
16Kaha Mose ambile kuli Kola ngwenyi, Ove nalizavu lyove lyosena mwimana kumeso aYehova hamene, nayove navakivo naAlone nawa.
17Mbatenu mutu himutu ciloso cenyi, hakenuho vize vyakulumba vyalivumba lyamwaza, munehe mutu himutu ciloso cenyi kumeso aYehova, viloso makulukaji avali namakumi atanu, nayove nawa naAlone, mutu himutu naciloso cenyi.
18Ngoco vambacile mutu himutu ciloso cenyi, vahakileho kakahya, vahakileho vize vyakulumba vyalivumba lyamwaza, Vemanyine kucikolo cambalaka yakuliwanyina, naMose nawa naAlone.
19Kaha Kola avawungixililile lizavu lyosena kucikolo cambalaka yakuliwanyina. Kaha upahu waYehova wasolokele kulizavu lyosena.
20Yehova ahanjikile kuli Mose nakuli Alone ngwenyi,
21Lihandununenu mulizavu eli, mangana nguvanongese hakukemwina caliso.
22Vakivo Valimbilile cameso-hamavu, vamwambile ngwavo, Ove Kalunga, Ove Kalunga kajixipilitu javatu vosena, mutu umwe avulumune, kaha usangumukile lizavu lyosena?
23Yehova ahanjikile kuli Mose ngwenyi,
24Hanjika kulizavu ngwove, Ehukenu okwo vatwama vaKola naNdatane naAvilame jingulwixi.
25Mose akatukile, ayile kuli vaNdatane naAvilame, kaha vakulwane javalsalele vamukavile.
26Ahanjikile kulizavu ngwenyi, Acehukenu kujimbalaka jamalunga vakuhukava, kanda mukwata kucuma cavo cipwe cimweko, kucina namunonga hami onga yavo yaxili yosena.
27Ngoco vehukile kuze vatwamine vaKola naNdatane naAvilame jingulwixi. Kaha Ndatane naAvilame valovokele, vemanyine kuvikolo vyajimbalaka javo, namapwevo javo nawa, navana vavo vamalunga navana vavo vavandende.
28Mose ambile ngwenyi, Oho vene namutacikijilaho omu nangutumu Yehova ngulinge vilinga vyosenevi. Mwomwo kavyapwile vyamumucima wamiko.
29Kaci nge malungava navafwa nge omu veji kufwanga vatu vosena, mokomoko kaci nge navamona muveji kumonanga vatu vosena, kaha Yehova kangutumineko.
30Oloze kaci nge Yehova mwatanga cuma cacihya, kaci nge mavu nawasokolola kanwa kawo nakuvamina navavo vosena hamwe, kaci nge navaya vavatonyi mumavu #16.30 Mwaya vafu.muXeyole, kaha namutacikiza ngwenu, malungava vanasaula Yehova.
31Kaha casolokele, ikiye hakukumisa kuhanjika mazu osenawa, mavu apwile muxi yavo ahandunukile.
32 #
Yuta 11. Mavu asokolwele kanwa kawo nakuvamina, navaze vakujizuvo javo navatu vosena vapwile vaKola, navikumba vyavo vyosena.
33Ngoco vakivo navavo vosena vayile vavatonyi mumavu muXeyole. Mavu aliwanyine ceka helu lyavo, kaha vanongele muliwuka.
34VaIsalele vosena vaze vavajingilikile vacinyine hakwivwa miteto yavo. Mwomwo valyambile ngwavo, Kucina mavu nawatumina nayetu nawa.
35Kaha kuli Yehova kwalovokele kakahya, kalile malunga makulukaji avali namakumi atanu vaze vahanyine vize vyakulumba vyalivumba lyamwaza.
36Jino Yehova ahanjikile kuli Mose ngwenyi,
37Hanjika kuli Eleyaza mwanakapilixitu Alone, mangana anone viloso mukaci kakuwema kana, kaha sanda kakahya, mwomwo vinapu vyajila,
38vize viloso vyavava vakulivulumuna myono yavo. Vakavitatule vakavisame vikapwe vyakufwika lijiko lyakulumbila, mwomwo vavipandamisanga kumeso aYehova, xikaho vinapu vyajila. Kaha vipwenga cinjikizo kuli vana vaIsalele.
39Ngoco kapilixitu Eleyaza anonele viloso vyaunengu vize, vize vapandamixile vaze vawemene. Kaha vavisamine vipwenga vyakufwika lijiko lyakulumbila,
40vipwenga vyakwanukilangaho kuli vana vaIsalele, mangana kucina mutu weka, ou azeneka kupwa wakutanga yaAlone, mwakapandama nakulumba vize vyalivumba lyamwaza kumeso aYehova, kucina mwakapwa nge Kola, nge lizavu lyenyi. Alingile nge omu amulwezele Yehova muli Mose.
41Oloze omu kwacele, lizavu lyavana vaIsalele #Koli. 1, 10.10.vosena vavatatwokesele Mose naAlone ngwavo, Enu munajihi vatu jaYehova.
42Ngoco casolokele, omu lyalingile lizavu hilinavawungilila lyehi Mose naAlone, vatalile kumbalaka yakuliwanyina, kaha kumana, livwi lyayifwikile, upahu waYehova wasolokele.
43Mose naAlone vejile kulutwe lwambalaka yakuliwanyina.
44Kaha Yehova ahanjikile kuli Mose ngwenyi,
45Fumenu mulizavu eli, mangana nguvanongese hakukemwina caliso. Oloze valimbilile cameso-hamavu.
46Mose ambile kuli Alone ngwenyi, Mbata ciloso cove, uhakemo kakahya kahalijiko lyakulumbila, uhakeho vize vyakulumba vyalivumba lyamwaza, uvitwale waxi kulizavu uvalingile cakufwika xili, mwomwo ndombo yinalovoka lyehi kuli Yehova, musongo wacihita unaputuka lyehi.
47Alone alingile nge omu ahanjikile Mose, alahilile mukaci kaliwuka. Kaha kumana, musongo wacihita wapwile unaputuka lyehi muli vatu. Ahakileho vize vyakulumba vyalivumba lyamwaza, avalingilile vatu cakufwika xili.
48Emanyine mukaci kavafu navavatonyi, kaha musongo wacihita wemanyine.
49Jino, #Koli. 1, 10.10.vaze vafwile kumusongo wacihita vapwile #16.49:14, 700.kanunu kamwe namakombakaji awana namakulukaji atanu naavali, kaha kwapwile navaze vafwilile hamulonga waKola nawa.
50Alone akindulukile kuli Mose kucikolo cambalaka yakuliwanyina, kaha musongo wemanyine kwawo.
Currently Selected:
KULAVA 16: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
