KULAVA 15
15
Jiximbi jakuvuluka mawana
1Yehova ahanjikile kuli Mose ngwenyi,
2Hanjika kuli vana vaIsalele uvambulile ngwove, Omu namukalinga himunengila lyehi mulifuci lize namukatwama, lize nguli nakumihana,
3omu namukahana wana wakwoca hakakahya wakuhana kuli Yehova, wana wakulumba, cipwe cimuna wakuvatula wakulinga mwakuxika, cipwe wakulyanukila, cipwe #Levi 23.1-44.kuviwanyino vyenu vyakutongola, wakulinga livumba lyalupengopengo kuli Yehova, wakuutanga wavangombe, cipwe wakuutanga wavimuna vavandende,
4uze mwakahana wana wenyi akahane wana wakulya kuli Yehova, cimbwa cimwe cakusokesa muvimbwa vyalifwa limwe likumi cawunga wakusalulula, vanahingunwina lyehi cimbwa cimwe cakusokesa muvimbwa vyahine viwana camaji,
5navinyo nawa kupwa wana wakuhingununa, cimbwa cimwe cakusokesa muvimbwa vyahine viwana. Ukavilinga hawana wakulumba, cipwe hacimuna wakuvatula, hamwanamukoko hamwanamukoko.
6Mokomoko hacizamba camukoko Ukalinga wana wakulya wavimbwa vivali vyakusokesa muvimbwa vyalifwa likumi vyawunga wakusalulula vanahingunwina cimbwa cimwe cakusokesa muvimbwa vyahine vitatu camaji.
7Kaha ukahana wana wakuhingununa wacimbwa cimwe cakusokesa muvimbwa vyahine vitatu cavinyo, kupwa livumba lyalupengopengo kuli Yehova.
8Kahove hakulinga ngombe wacikuji kupwa wana wakulumba, cipwe cimuna wakuvatula wakulinga mwakuxika, cipwe kupwa mawana akulweza keke akuhana kuli Yehova,
9kaha hamwe nangombe wacikuji uze akahane wana wenyi wakulya wavimbwa vitatu vyakusokesa muvimba vyalifwa likumi vyawunga wakusalulula vanahingunwina lyehi cimbwa cahine camaji.
10Kaha ukahana wana wakuhingununa wacimbwa cahine cavinyo, kupwa wana wakwoca hakakahya, walivumba lyalupengopengo kuli Yehova.
11Mukiko vene munavakalinga hangombe wacikuji hangombe wacikuji, cipwe hacizamba camukoko hacizamba camukoko, cipwe hamwanamukoko wacizamba hamwanamukoko wacizamba, cipwe hamwanapembe hamwanapembe.
12Nge kutesa nakuvula cavava namukalinga, ngoco munamukalinga haumwe naumwe kukuvula cavo.
13Vosena vanasemuwila mulifuci vakalinge vyumevi ngoco, hakuhana wana wakwoca hakakahya walivumba lyalupengopengo kuli Yehova.
14Kaha kaci nge ngeji mwakazuzumana kuli enu, mokomoko wose mwakapwa muli enu mukusemunwina cenu cosena, kaci nge mwakahana wana wakwoca hakakahya walivumba lyalupengopengo kuli Yehova, nganomu mweji kulingangenu, mukiko mumwakalinga ikiye.
15Mwomwo kuliwuka kukapwenga cilika cimwe, nakuli enu nakuli ngeji wakuzuzumana kuli enu, cilika cahaya myaka yosena mukusemunwina cenu cosena. Nganomu mwapwenu, mukiko mumwapwa nayou nawa nazuzumana kumeso aYehova.
16Kupwenga jiximbi jojimwe namazu akuyula wowamwe hali enu nahali ngeji nazuzumana kuli enu.
17Yehova ahanjikile kuli Mose ngwenyi,
18Hanjika kuli vana vaIsalele uvambulile ngwove, Enu hakwingila mulifuci lize nguli nakumitwala,
19kaha cikapwe, omu namukalya kulya cakulifuci, mukahana wana wakuzundula kuli Yehova.
20Kuwunga wenu wakulivanga kucika mukahanako mbolo yimwe, kupwa wana wakuzundula nge wana wakuzundula wakucizungwilo, ngoco munamukauzundwila.
21Kuwunga wenu wakulivanga kucika mukahanako Yehova wana wakuzundula mukusemunwina cenu cosena.
22Omu namukatamuka, nakuzeneka kulinga mwaya jiximbi joseneji nahanjika Yehova kuli Mose,
23mwosenomu namilweze Yehova muli Mose, kufumisa kulikumbi lize vamihanyine luximbi kuli Yehova nakutwala mukusemunwina cenu cosena,
24kaha cikapwe, kaci nge vanacilingi hakutamuka, cakuhona lizavu kucijiva, kaha lizavu lyosena likahane ngombe wacikuji walivuvu umwe kupwa wana wakulumba, kupwa livumba lyalupengopengo kuli Yehova, nawana wawo wakulya nawana wawo wakuhingununa, nge omu mwaya mazu akuyula, napembe wacizamba umwe kupwa wana wahaxili.
25Kapilixitu akalinge cakufwika xili halizavu lyavana vaIsalele lyosena, kaha navavakonekela, mwomwo wapwanga mutamu, kaha vakivo vananehe lyehi wana wavo, wana wakwoca hakakahya wakuhana kuli Yehova, nawana wavo wahaxili nawa, kumeso aYehova, hamutamu wavo.
26Ngoco lizavu lyavana vaIsalele lyosena navavakonekela, nangeji wakuzuzumana muli vakivo nawa, mwomwo kuli vatu vosena capwanga kutamuka, xikaho.
27Kaha kaci nge mutu umwe mwavulumuna hakutamuka, akahane pembe wacipwevo wamwaka umwe kupwa wana wahaxili.
28Kapilixitu akalinge cakufwika xili hali mutu uze mwatamuka, omu mwavulumuna hakutamuka kumeso aYehova, kumulingila cakufwika xili, kaha navamukonekela.
29Mupwanga naluximbi lwolumwe hali uze mwalinga mwakutamuka, nahali uze nasemuwila mulifuci muli vana vaIsalele, nahali ngeji nazuzumana muli vakivo.
30Oloze mutu uze mwakalinga tuhu nakulipambula, cipwe nasemuwila mulifuci, cipwe napu wakuzuzumanamo, ali nakusaula Yehova, kaha mutu uze navakamuteta muli vatu vakwavo.
31Mwomwo nalumbilisa mazu aYehova, nazomboka luximbi lwenyi, xikaho mutu uze navakamutetamo cakumutetamo. Kuhenga cenyi naukatwamanga hali ikiye.
Ou mwajilulula sambata navamwasa malolwa
32Jino omu vapwile vana vaIsalele mupambo, vawanyine lunga umwe apwile nakuhokola jitete halikumbi lyasambata.
33Vaze vamuwanyine hakuhokola jitete vamutwalile kuli vaMose naAlone nakulizavu lyosena.
34Kaha vamusekelele mwakumulamina, mwomwo haze kanda vavalumbunwine lyehi mwakumulingila, xikaho.
35Yehova ambile kuli Mose ngwenyi, Mutu kana afwe cakufwa. Vakalizavu vosena vamwaxile malolwa kusali yacilombo.
36Ngoco vaka-lizavu vosena Vamulowele kusali yacilombo, vamwaxile malolwa, kaha afwile, nge omu valwezele Mose kuli Yehova.
Jizombo jakumahina
37Yehova ambile kuli Mose ngwenyi,
38Hanjika kuli vana vaIsalele uvalweze valitungile #Mateu 23.5.jizombo kujisongo jamahinavo mukusemunwina cavo cosena. Kaha vahake wanda umwe uxikima kuzombo yakusongo kuzombo yakusongo.
39Jipwenga jizombo kuli enu, mangana mutalengaho, mwanukenga jiximbi jaYehova josena, mujilingenga, mangana kucina namukakava mwaya micima yenu nameso enu, mukiko mumwapwilenga nakulinga ujila.
40Mangana mwanukenga, mulingenga mwaya jiximbi jami josena, mupwenga mwajilila Kalunga kenu.
41Ami yami Yehova Kalunga kenu, ngwamilowele mulifuci lyaEjipitu mangana ngupwenga nguKalunga kenu. Ami yami Yehova Kalunga kenu.
Currently Selected:
KULAVA 15: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
