NONGBISHAR 6
6
Ka jingkhot ïa u Gideon
1Te ki khun Israel ki la leh ïa ka basniew ha khmat U Trai: bad U Trai u la ai noh ïa ki ha ka kti ki Midian hynñiew snem. 2Ka kti ki Midian te ka la jop ïa ki Israel: bad na ka bynta ki Midian, ki khun Israel ki la thaw ïa lade ïa kita ki thliew kiba ha ki lum, bad ïa kita ki krem, bad ïa ki kut baskhem. 3Haba ki Israel te ki la bet, kita ki Midian ki la wan kiew, bad ki Amalek, bad ki khun mihngi; kita, ki la wan kiew pyrshah ïa ki; 4bad ki la sher dara pyrshah ïa ki, bad ki la pynduh ïa ka jingmih ka khyndew, haduh ba me poi sha Gasa, bad kim shym la iehnoh jingbam shuh ïa ki Israel, lymne langbrot, lymne masi, lymne kadda. 5Naba ki la wan kiew lem bad la ki jingri bad la ki ïingjaiñ, bad ki la wan kiew u paidbah kum ki puit; ïa ki hi bad ki ut jong ki ym lah kheiñ shuh: bad ki la wan bsut sha ka ri ban pynjot ïa ka. 6Ki Israel te ki la shipa eh na ka bynta ki Midian: bad ki khun Israel ki la lynñiar ha U Trai.
7Te haba ki khun Israel ki la lynñiar ha U Trai na ka bynta ki Midian, 8U Trai u la phah ïa u nongïathuhlypa ha ki khun Israel: bad u la ong ha ki, “Kumne u ong U Trai, U Blei jong ki Israel: ‘Nga la wallam noh ïa phi na ka ri Ijipt, bad nga la pynmih noh ïa phi na ka ïing ka jinglongmraw; 9bad nga la pyllait ïa phi na ka kti ki Ijipt, bad na ka kti kita baroh kiba la banbeiñ ïa phi, nga la beh ruh ïa ki na khmat jong phi, bad nga la ai ha phi ïa ka ri jong ki;’ 10nga la ong de ha phi: ‘Nga long U Trai uba U Blei jong phi; phin ym sheptieng ïa ki blei ki Amor, ha ka ri jong kiba phi shong’; hynrei, phim shym la shahshkor ïa ka ktien jong nga.”
11Ynda kumta, u angel U Trai u la wan, bad u la shong hapoh uta u dieng Sning uba ha Ophrah, uba dei ïa u Joash u nong Abieser; te u khun jong u, u Gideon u dang shoh Kew ha ka jaka khem umsoh, ban buhrieh ïa u na ki Midian. 12Te u angel U Trai u la paw ha u, bad u la ong ha u, “U Trai u don ryngkat bad me, me u briew uba shynrang.” 13U Gideon te u la ong ha u, “A kynrad jong nga, lada U Trai u don ryngkat bad ngi, balei te ba kane baroh ka la ngat ha ngi? bad shano ki kam phylla jong U baroh kiba ki kpa jong ngi ki la ïathuh ha ngi, ki da ong, ‘U Trai um shym la wallam noh ïa ngi na ka ri Ijipt?’ hynrei mynta, U Trai u la lyndet noh ïa ngi, bad U la ai noh ïa ngi ha ka kti ki Midian.” 14U Trai te U la peit ha u, bad U la ong, “Khie leit ha kane ka bor jong me, bad pyllait ïa ki Israel na ka kti ki Midian: ngam shym la phah ma nga ïa me?” 15U te u la ong ha U, “A Trai, kumno ngan pyllait ïa ki Israel? ha khmih, ka kur jong nga ka baduk tam ha Manasseh, bad nga ruh u barit tam ha ka ïing u kpa jong nga.” 16U Trai te U la ong ha u, “Shisha ngan long lem bad me, bad men jop ïa ki Midian kum ïa uwei u briew.” 17U la ong te ha U, “Lada kumta nga la shem sngewbha ha khmat jong me, to men pyni ka dak ha nga ba long ma me uba kren bad nga. 18Nga kyrpad ïa me, wat leit noh nangne, tad ynda nga wan ha me, bad nga wallam ka jingainguh jong nga ban buh ha khmat jong me.” U te u la ong, “Ngan ap keiñ haduh ba men da wan pat.”
19Te u Gideon u la rung shapoh, bad u la pynkhreh ïa u khun blang, bad ïa ki 'pu stang khlem thiat da shi ephah u 'purew: ïa ka doh u la buh ha ka tukri, bad u la buh ïa ka syrwa ha u khiew, bad u la wallam ïa ka ha u hapoh uta u dieng Sning, bad u la ai ïa ka. 20U angel U Blei te u la ong ha u, “To shim ïa kata ka doh bad ïa ki kpu khlem thiat, bad buh ïa ki halor une u mawsiang, bad to theh ïa kata ka syrwa.” Te u la leh kumta. 21Ynda kumta, u angel U Trai u la rah ïa ka tduh jong u diengduh uba ha ka kti jong u, u la pyndei ha kata ka doh bad ha ki kpu khlem thiat; te ka ding ka la mih na uta u mawsiang, bad ka la pyning duh ïa ka doh bad ïa ki kpu khlem thiat; hadien kata, u angel U Trai u la leit noh na khmat jong u. 22Te haba u Gideon u la sngewthuh ba u la long u angel U Trai, u Gideon u la ong, “Wa, A Trai uba U Blei! namar nga la ïohi markhmat ïa u angel U Trai.” 23U Trai te U la ong ha u, “To long suk ma me; wat sheptieng: men ym ïap.” 24Ynda kumta, u Gideon u la tei ka duwan ha U Trai hangta, bad u la khot ïa ka “Jehobah-shalom:”#6:24 Jehobah-shalom: U Trai u long ka jingsuk. (Haduh kane ka sngi ka dang don ha Ophrah jong ki Abieser.)
25Te ha kata ka miet, U Trai u la ong ha u, “To shim ïa u masi dab u kpa jong me, u masi dab u ba-ar keiñ! u bahynñiew snem ka rta, bad to pynkyllon ïa ka duwan jong u Baal kaba u kpa jong me u don, to pynduh ruh ïa ka Asherah kaba ha ka: 26bad to tei ïa ka duwan ïa U Trai uba U Blei jong me ha kliar kane ka kut, ha ka rukom ba la buh beit, bad to shim ïa uta u masi dab u ba-ar, bad to ainguh ka jingainguh thang da kita ki dieng jong kata ka Asherah ïa kiba men sa pynduh.” 27Ynda kumta, u Gideon u la shim shiphew ngut na ki shakri jong u, bad u la leh kumba U Trai u la kren ha u: te namar ba u la sheptieng ïa ki kur u kpa jong u bad ïa ki rangbah kata ka shnong, um lah ban leh mynsngi, u la leh mynmiet.
28Te haba ki rangbah ka shnong ki la khie dang step phyrngab, ha khmih, ïa ka duwan u Baal la pynkyllon, bad ïa ka Asherah kaba ha ka la pynduh noh, bad ïa u masi dab u ba-ar de la kñia halor kata ka duwan ba la tei. 29Ki la ïa-ong paralok te, “Uei ba la leh ïa kane?” Haba ki la wad te bad kylli, ki la ïa-ong, “U Gideon u khun u Joash u la leh ïa kane.” 30Ynda kumta, ki rangbah ka shnong ki la ong ha u Joash, “Wallam noh ïa u khun jong me, ba un ïap: naba u la pynkyllon ïa ka duwan u Baal, bad naba u la pynduh noh ïa ka Asherah kaba ha ka.” 31U Joash te u la ong ha kita baroh ba ïeng ïaleh ïa u, “Phin ïasaid na ka bynta u Baal? lane phin pynim ïa u? uta uba ïasaid na ka bynta jong u, to ai ba un ïap ha kane ka step: lada u long u blei, to ai un ïasaid na ka bynta ïa lade, namar ba don uba la pynkyllon ïa ka duwan jong u.” 32Namar kata, ha kata ka sngi u la khot “Jerubbaal” ïa u, u da ong, “Ai u Baal un ïasaid pyrshah ïa u,” namar ba u la pynkyllon ïa ka duwan jong u.
33Te ki Midian baroh bad ki Amalek bad ki khun mihngi ki la ïalum lang; bad ki la leit sha shiliang, bad ki la sher dara ha ka them Jesril. 34Hynrei, U Mynsiem U Trai u la wan ha u Gideon; bad u la put ka turoi; te ki Abieser ki la ïalang hadien jong u. 35U la phah te ki nonglam-ktien ha ki Manasseh baroh; ki ruh ki la ïalang hadien jong u: bad u la phah ki nonglam-ktien ha ki Asher, bad ha ki Sabulon, bad ha ki Naphtali; ki de ki la wan kiew ban tan ïa u.
36Te u Gideon u la ong ha U Blei, “Lada men pynim ïa ki Israel da ka kti jong nga, kumba me la kren, 37ha khmih, ngan buh u 'ñiuh langbrot ha ka kyntem; lada ka umjer kan don tang ha u shñiuh hi, bad kan rkhiang ha ka khyndew baroh, te ngan tip ba men pynim ïa ki Israel da ka kti jong nga, kumba me la kren.” 38Te ka la long kumta, naba u la khie dang step ha kaba lashai, bad u la lum ïa u shñiuh, bad u la khyrwait ïa ka umjer na uta u shñiuh, shi khuri dap ka um. 39Te u Gideon u la ong ha U Blei, “Wat ai ba ka jingbitar jong me kan meh ïa nga, bad ngan kren sa kane shi sien: nga kyrpad ïa me, ai ngan tynjuh da une u shñiuh sa kane shi sien; ai kan rkhiang tang ha une u shñiuh, bad ha ka khyndew baroh kan long umjer.” 40Bad U Blei u la leh kumta ha kata ka miet: naba ka la rkhiang tang u shñiuh hi, hynrei, ha ka khyndew baroh la don umjer.
Currently Selected:
NONGBISHAR 6: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
