NONGBISHAR 7
7
Ki paidïapom u Gideon ki jop thma ïa ki Midian
1Ynda kumta, u Jerubbaal, u Gideon keiñ, bad ki paidbah kiba lem bad u, ki la khie dang step, bad ki la pynïeng dara harud ka pukri Harod: te u paidbah ki Midian u la don shaphang shatei na ki, hajan u lum Moreh, ha ka them.
2U Trai te u la ong ha u Gideon, “Kine ki briew kiba bad me ki bun eh ïa nga ban ai noh ïa ki Midian ha ka kti jong ki, ba ïoh ki Israel kin sngewsarong ïaleh ïa nga, da kaba ong, ‘Ka kti jong nga hi ka la pynim ïa nga.’ 3#Deu. 20:8.Namar kata te, to khie pynbna ha ki shkor u paidbah, da ong, ‘Uno uno uba sheptieng bad ba khaw-eit, to un phai bad leit wan noh na u lum Gilead.’ ” Kumta la phai noh na u paidbah arphew ar hajar; bad shiphew hajar ki la sah.
4Te U Trai u la ong ha u Gideon, “U paidbah u shu dang bun pynban; to ïalam arsut ïa ki sha ka um, te ngan tynjuh ïa ki hangta na ka bynta jong me: bad kan long ruh, ïa uba ngan ong ha me, ‘Une un leit bad me,’ uta keiñ un leit bad me; bad ïa uba ngan ong ha me, ‘Une un ym leit bad me,’ uta un ym ïoh leit.” 5Kumta, u la ïalam arsut ïa u paidbah sha ka um: U Trai te u la ong ha u Gideon, “Uno uno uba jliah um da la u thylliej, kumba u ksew u jliah, ïa uta men buh kyrpang; kumjuh ruh uno uno uba dem la ki khohsiew ban dih.” 6Te ka jingkheiñ jong kita kiba jliah da kaba kyndup da ki kti ha la ka shyntur, ka la long laispah ki rangbah: hynrei, kiba sah na u paidbah baroh ki la dem da la ki khohsiew ban dih um. 7Bad U Trai u la ong ha u Gideon, “Da kita ki laispah ki rangbah kiba la jliah ngan pynim ïa phi, bad ngan ai noh ïa ki Midian ha ka kti jong me: bad to ai ba u paidbah baroh uwei pa uwei un leit sha la ka jaka.” 8Kumta, ki briew ki la rah jingbam ha la ki kti, bad ki turoi jong ki: bad u la phah ïa ki paidbah Israel baroh uwei pa uwei sha la ka ïingjaiñ: hynrei, u la bat ïa kita ki laispah ki rangbah: bad ki paidbah ki Midian ki la don harum jong u ha ka them.
9Te ha kata ka miet, U Trai u la ong ha u, “To ïeng joit, to leit hiar sha uta u paidbah; naba nga la ai noh ïa u ha ka kti jong me. 10Hynrei, lada me sheptieng ban leit hiar, to leit hiar ma me lem bad u Purah u shakri jong me sha uta u paidbah: 11bad men ïohsngew ïa kaei ba ki ïa-ong; bad hadien kata, yn pynkhlaiñ ïa ki kti jong me ïa ka ban leit hiar sha uta u paidbah.” Ynda kumta, u la leit hiar bad u Purah u shakri jong u haduh khap ki nongap phira uta u paidbah. 12Ki Midian te bad ki Amalek bad ki khun mihngi ki la ïathiah ter lter ha ka them ha ka jingkheiñ kum ki puit; bad ki ut jong ki ym lah ñiew shuh, byllien kum u shyiap harud duriaw. 13Te ynda u Gideon u la wan, ha khmih, la don u briew uba ïathuh ïa la ka jingphohsniew ha la u lok, bad u la ong, “Ha khmih, nga la phohsniew ka jingphohsniew, te kumne, uwei u kpu Barli u tyllun sha u paidïapom Midian, bad u la poi ha kawei ka ïingjaiñ, bad u la pakhuh ïa ka haduh ba ka la ngat, bad u la pynkyllon khongpong ïa ka, ba kata ka ïingjaiñ ka jot noh thiaw.” 14U lok jong u te u la ïathuh bad u la ong, “Kane kam long ei ei, hynrei, tang ka waitlam u Gideon u khun u Joash, u rangbah na Israel: ha ka kti jong u, U Blei u la ai noh ïa ki Midian, bad ïa u paidïapom baroh.”
15Te ka la long, haba u Gideon u la ïohsngew ïa ka jingïathuh ïa kata ka jingphohsniew, bad ïa ka jingbatai jong ka, u la mane dem; bad u la leit phai pat sha ka dara jong ki Israel, bad u la ong, “Ïeng; naba U Trai u la ai noh ha ka kti jong phi ïa u paidïapom ki Midian.” 16Bad u la pynïabynta lai kynhun ïa kita ki laispah ki rangbah, bad u la pynbat ki turoi ha ki kti jong ki baroh, bad ki khra suda, bad ki jingtbeh de hapoh kita ki khra. 17U la ong ruh ha ki, “To khmih ha nga, bad to leh kumjuh: ha khmih ruh, haba nga poi haduh khap uta u paidbah, te kan long, kumba leh ma nga, kumta to leh ma phi ruh. 18Haba nga put ka turoi, ma nga bad kiba bad nga, te phi ruh phin put ki turoi baroh sawdong ïa uta u paidbah baroh, bad to ong, ‘Na ka bynta U Trai bad na ka bynta u Gideon.’ ”
19Kumta, u Gideon bad kita ki laispah ki rangbah kiba bad u, ki la wan ha khap uta u paidbah hamar ba sdang ka jingap miet ba hapdeng, haba ki dang ïabujli kata ka jingap: bad ki la put ki turoi, bad ki la pynpait ïa kita ki khra kiba ha ki kti jong ki. 20Bad kita ki lai kynhun ki la put ïa ki turoi, bad ki la pynpait ruh ïa kita ki khra, bad ki la bat ïa kita ki jingtbeh ha ki kti kadiang jong ki, bad ïa ki turoi ha ki kti kamon jong ki ban put da ki: bad ki la pyrta, “Ka waitlam U Trai bad ka jong u Gideon.” 21Ki la ïeng te uwei uwei baroh ha la ka jaka baroh sawdong uta u paidbah: te uta u paidïapom baroh u la mareh; bad ki la kynha, bad ki la pynphet ïap ïa ki. 22Bad ki la put ïa kita ki laispah ki turoi, bad U Trai u la pynphai ïa ka waitlam uwei uwei baroh pyrshah ïa la u lok, bad pyrshah ïa u paidïapom baroh: te uta u paidïapom u la phet ïap haduh Beth-shittah shaphang Sererah, haduh ka pud Abel-meholah, hajan Tabbath. 23Bad ki rangbah Israel ki la ïalum lang na Naphtali, bad na Asher, bad na Manasseh baroh, bad ki la beh ïa ki Midian.
24U Gideon te u la phah ïa ki nonglam-ktien ha ka ri lum Ephraim baroh, u da ong, “To ïawan hiar ïaleh ïa ki Midian, bad to ïakhang ha shuwa jong ki, ïa ki um haduh ka Beth-barah, ka Jordan keiñ.” Kumta, ki rangbah Ephraim baroh ki la ïalum lang, bad ki la shim ïa kita ki um haduh Beth-barah, ka Jordan keiñ. 25Te ki la kem ïa ki ar ngut ki syiem ki Midian, u Oreb bad u Sib; bad ki la pynïap ïa u Oreb ha u mawsiang Oreb, bad ïa u Sib ki la pynïap ha ka jaka khem umsoh u Sib, bad ki la beh ïa ki Midian: bad ki la wallam ïa ki khlieh jong u Oreb bad u Sib sha u Gideon sha lyndet ka Jordan.
Currently Selected:
NONGBISHAR 7: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
