NONGBISHAR 5
5
Ka jingrwai ka Deborah bad u Barak
1Ynda kumta, ka Deborah bad u Barak u khun u Abinoam ki la ïarwai ha kata ka sngi, ki da ong,
2“To ïaroh phi ïa U Trai,
naba ki nongïalam
ki la ïalam ha Israel,
naba ki paidbah
ki la ai sngewbha ïa lade.
3“To sngew, ko phi ki syiem;
to shahshkor,
ko phi ki bakhraw batri;
ma nga hi ngan rwai
ha U Trai;
ngan rwai ïaroh ïa U Trai,
uba U Blei ki Israel.
4“A Trai,
mynba me la mih noh na Seir,
mynba me la ïaid
na ka lyngkha Edom,
ka khyndew ka la khynñiuh,
bad ki bneng ki la jaw,
ki lyoh ki la pynjaw
ka um keiñ.
5 #
Eks. 19:18. Ki lum ki la um noh
ha khmat U Trai,
wat uta u Sinai
ha khmat U Trai,
uba U Blei ki Israel.
6“Ha ki sngi u Shamgar
u khun u Anath,
ha ki sngi ka Jael,
ym don ba ïaid
na ki lynti bah,
ki nongleit jingleit
ki la ïaid na ki lynti khlaw.
7Ki nongsynshar
ki la duh ha Israel,
ki la duh keiñ,
tad ynda nga la ïeng ma nga
ka Deborah,
ba nga la ïeng
ban long kmie keiñ ha Israel.
8Ki la shim
da ki blei thymmai;
hangta te la don thma
ha ki khyrdop:
la ju ïohi mo ïa ka stieh
lane ïa u sum
hapdeng ki sawphew hajar
ngut ha Israel?
9Ka dohnud jong nga
ka long sha ki nongsynshar
ki Israel,
kiba la ai sngewbha ïa lade
hapdeng u paidbah.
To kyrkhu phi ïa U Trai.
10“To ïalap phi,
kiba shong halor ki kadda lieh,
phi kiba shong
halor ki stranji bakordor,
bad phi kiba ïaid ha ka lynti.
11Jngai na ka jingrisa
ki nongsiat khnam,
ha ki jaka tong um,
hangta kin ïalap
ïa ki kam bahok
jong U Trai,
ki kam bahok
jong ka jingsynshar jong U
ha Israel.
“Ynda kumta, ki paidbah U Trai
ki la hiar sha ki khyrdop.
12“To khie, to khie, ko Deborah;
to khie, to khie,
to thaw ka jingrwai:
to ïeng, ko Barak,
bad ïa kita ba la kem mraw
to ïalam mraw,
me u khun u Abinoam.
13Kumta, la wan hiar
kiba dang sah na ki rangbah
bad u paidbah;
U Trai u la wan hiar
na ka bynta jong nga
ban ïaleh ïa ki bakhrawbor.
14Na u Ephraim ki la wan hiar
kita kiba u thied jong ki
u long ha u Amalek;
hadien jong me, u Benjamin,
hapdeng ki paidbah jong me;
na u Makhir
la wan hiar ki nongsynshar,
bad na u Sabulon
kita kiba bat u dieng
u nongïalam.
15Ki rangbah u Issakhar
te ki la don lem
bad ka Deborah;
kumba la long u Issakhar,
kumta u la long u Barak:
sha ka them ki la tur noh
ha ki kjat jong u.
Ha ki lynti um u Reuben
la don kiba jur ki jingthmu
ka dohnud.
16Balei me shong
hapdeng ki jingker langbrot,
ban sngap ïa ki jingput
ïa ki kynhun?
Ha ki lynti um u Reuben
la don kiba jur ki jingïit
ka dohnud.
17Ka Gilead ka la shong
sha lyndet ka Jordan:
bad u Dan, balei ba u la sah
ha ki lieng?
u Asher u la shong khop
harud ka duriaw,
bad u la shong ha ki kdong um
jong u.
18U Sabulon u la long
u paidbah ba la kheiñduh
ïa la ka mynsiem
jin haduh ka jingïap,
u Naphtali ruh,
ha ki jaka bajrong jong ka ri.
19“Ki syiem ki la wan
bad ki la ïaleh;
ynda kumta,
ki syiem ka Kanaan
ki la ïaleh thma na Taanakh
harud ki um Megiddo:
kim shym la ïohnong
da u sbai.
20Ki la ïaleh na bneng,
ki khlur ha la ki jingïaid
ki la ïaleh thma pyrshah
ïa u Sisera.
21Ka wah Kishon
ka la rong noh ïa ki,
kata ka wah barim,
ka wah Kishon keiñ.
Ko mynsiem jong nga
to nang ïaid da ka bor.
22“Hangta, ki khnap kulai
ki la kyrdem
namar ki jingrynsied,
ki jingrynsied kiba khlaiñ
jong ki.
23“To tim phi ïa ka Meros,”
la ong u angel U Trai,
“to tim duh phi ïa ki briew
jong ka;
namar kim shym la wan
ban ïarap ïa U Trai,
ban ïarap ïa U Trai
pyrshah ïa ki bakhlaiñ.
24“Kan long kaba suk ka Jael,
ka tnga u Heber u nong Ken,
nalor ki kynthei,
kan long kaba suk ma ka
nalor ki kynthei
ha ka ïingjaiñ.
25U la pan ka um,
te ka la ai ïa u da ka dud;
ha ka pliang kaba kor
ka la wallam makhon ïa u.
26Ka la buh ïa la ka kti
ha u snar,
bad ka kti kamon jong ka
ha u tyrnem ki nongtrei;
bad da uta u tyrnem
ka la sah ïa u Sisera,
ka la sah lyngba na ka khlieh
jong u,
ka la sam keiñ
bad ka la sah lyngba
ïa ki moi moi jong u.
27Ha ki kjat jong ka u la dem,
u la kyllon, u la thiah:
ha ki kjat jong ka u la dem,
u la kyllon:
ha kaba u la dem,
hangta u la kyllon ïap.
28“Lyngba ki jingkhang ïit
ka la jngoh,
bad ka la pyrta,
ka kmie u Sisera
ka la pyrta lyngba ka phrah,
‘Ka slem lei katta ka kali jong u
ban wan?
ki tud lei ki shalyntem ki kali
jong u?’
29Ki lok kynthei bastad
jong ka
ki la ïathuh ïa ka,
ka ruh ka la phai ktien
ha lade hi,
30‘Hato kim shym la shem
kim shym la ïabynta
ïa ka jinglute?
ha uwei uwei kawei lane ar
ki samla;
ha u Sisera
ka jinglute ki jaiñkup
bun rong,
ka jinglute bun rong
ka jingsuh thoh,
baroh ar liang
ka jingsuh thoh
ba bun rong,
ha ki ryndang
jong ka jinglute?’
31 #
Jpw. 1:16. “Kumta ai kin jot
ki nongshun jong me baroh,
A Trai:
hynrei, ai ba kita kiba ieit ïa U
kin long kum ka sngi
haba ka dang ïeng ha ka bor
jong ka.”
Ka ri te ka la suk sawphew snem.
Currently Selected:
NONGBISHAR 5: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India