DEUTERONOMI 4

Ka jingkyntu u Moses ïa ka ban kohnguh

1“Te namar kata to sngew, A Israel, ïa ki hukum, bad ïa ki jingbishar, ïa kiba nga hikai ïa phi, ïa ka ban leh ïa ki; ba phin ïoh im, bad phin leit hapoh, ban ïoh ruh ïa kata ka ri ïa kaba U Trai uba U Blei ki kpa jong phi u ai ha phi. 2#Jpw. 22:18,19.Phin ym pyntam ei ei ruh ha kata ka ktien ïa kaba nga hukum ïa phi, lymne pynduna na ka, ba phin ïoh sumar ïa ki hukum U Trai uba U Blei jong phi, ïa kiba nga hukum ha phi. 3#Jkñ. 25:1-9.Ki khmat jong phi ki la ïohi ïa kaba U Trai u la leh namar u Baal-peor: naba u briew baroh uba la bud ïa u Baal-peor, U Trai uba U Blei jong phi u la pynjot noh ïa u napdeng jong phi. 4Hynrei, ma phi kiba la ïasoh ha U Trai uba U Blei jong phi, phi ïa-im baroh ha kane ka sngi keiñ. 5Ha khmih, nga la hikai ïa phi ïa ki hukum, bad ïa ki jingbishar, kumba U Trai uba U Blei jong nga u la hukum ïa nga, khnang ba phin leh kumta ha kata ka ri, sha kaba phin leit ïoh ïa ka. 6To sumar, namar kata, bad to leh ruh ïa ki; naba kane ka long ka jingstad, bad ka jingshemphang jong phi ha khmat kita ki jaid bynriew, ki ban ïohsngew ïa kine ki hukum baroh, bad kin ïa-ong, ‘Shisha kane ka jaid bynriew kaba khraw ka long u paidlang u bastad, bad u bashemphang.’ 7Naba kano ka jaid bynriew kaba khraw, kaba don U Blei hajan katta ïa ka, kumba U Trai uba U Blei jong ngi u long ha kiei kiei baroh katba ngi kyrpad ïa u? 8Bad kano ka jaid bynriew ruh kaba khraw, kaba don ki hukum, bad ki jingbishar ki bahok katta, kum kane ka hukum baroh, ïa kaba nga buh ha khmat jong phi ha kane ka sngi?

U pynkynmaw ïa kaei kaba la jia ha Horeb

9 # Eks. 19:1-20,21. “Tang ba men sumar ïa lade, bad sharai minot bha ïa la ka mynsiem, ïoh ba men klet ïa kine kiei kiei kiba ki khmat jong me ki la ïohi, bad ïoh ba kin kynriah noh ruh na ka dohnud jong me, baroh ki sngi ka rta jong me; hynrei, to hikai ïa ki ha la ki khun shynrang, bad ha ki khun shynrang ki khun shynrang jong me keiñ; 10kham tam keiñ ïa kata ka sngi mynba me la ïeng ha khmat U Trai uba U Blei jong me ha Horeb, mynba U Trai u la ong ha nga, ‘To ïalum lang ha nga ïa u paidbah, ba ngan ïoh pynsngew ha ki, ïa ki ktien jong nga, ba kin ïoh tip ban sheptieng ïa nga, baroh ki sngi ba kin ïoh im ha ka pyrthei, bad ba kin ïoh hikai ïa ki ha la ki khun ruh.’ 11#Eks. 19:16-18; Heb. 12:18,19.Bad phi la ïawan hajan, bad phi la ïeng ruh ha trai uta u lum; te uta u lum u la ing da ka ding haduh bneng, da ka jingdum, bad ki lyoh, bad ka jingdum tliw tliw. 12Bad U Trai u la kren ha phi napdeng kata ka ding: phi la ïohsngew tang ïa ka jingsawa ki ktien, hynrei, phim shym la ïohi ïa ka dur ei ei ruh: hynrei, tang ïa ka jingsawa hi. 13#Eks. 31:18.Bad u la pyntip ha phi ïa ka jutang jong u, ïa kaba u la hukum ïa phi ban leh, ïa kita ki shiphew hukum keiñ; bad u la thoh ïa ki ha ki ar tylli ki maw lyngkniap. 14#Eks. 21:1.Te U Trai u la hukum ïa nga ha kata ka por ïa ka ban hikai ïa phi ha ki hukum, bad ha ki jingbishar, ba phin dup leh ïa ki ha kata ka ri, sha kaba phin leit sha shiliang ban ïoh ïa ka.

Ka jingmaham pyrshah ïa kaba mane bleithaw

15“Namar kata, to sumar ïa lade biang biang ruh; naba phim shym la ïohi ïa ka dur ei ei ruh, ha kata ka sngi ba U Trai u la kren ha phi ha Horeb napdeng kata ka ding: 16#Eks. 20:4; Leb. 26:1; Deu. 5:8; 27:15.ba ïoh phin pynsniew ïa lade, bad ba phin ïathaw bleithaw ïa lade ba la mutdur ha ka jingsyriem ka dur kaei kaei ruh, ka dur u shynrang, ne ka kynthei, 17ka dur uno uno ruh u mrad uba don ha ka pyrthei, lane ka dur jong kano kano ruh ka sim ba don thapniang baher ha suiñ, 18ka dur kaei kaei ruh ka bapar halor ka khyndew, ka dur kano kano ruh ka dohkha kaba ha ki um hapoh ka khyndew: 19ba ïoh men khmied ruh ïa la ki khmat sha bneng, bad haba me ïohi ïa ka sngi, bad ïa u bnai, bad ïa ki khlur, ïa u paidbah bneng baroh keiñ, yn pynleh ïa me ban mane ïa ki, bad shakri ïa ki, ïa kiba U Trai uba U Blei jong me u la ïasam ha ki jaid bynriew baroh hapoh ka bneng baroh kawei. 20#Eks. 19:5; Deu. 7:6; 14:2; 26:18; Tit. 2:14; 1 Pet. 2:9.Hynrei, U Trai u la shim ïa phi, bad u la wallam noh ïa phi na kata ka lawar ding saiñ nar, na ka ri Ijipt keiñ, khnang ba phin long u paidlang ha u, ka bynta trai keiñ, kumba phi long ha kane ka sngi. 21#Jkñ. 20:12.Nalor kane, U Trai u la bitar bad nga na ka bynta jong phi, bad u la smai ba ngan ym ïoh leit sha shiliang ka Jordan: bad ngan ym ïoh leit shapoh kata ka ri babha, ïa kaba U Trai uba U Blei jong me u ai ha me ban long ka bynta pateng: 22hynrei, nga dei ban ïap ha kane ka ri, ngan ym ïoh leit sha shiliang ka Jordan; hynrei, phi, phin ïoh leit keiñ sha shiliang, bad phin ïoh pateng ruh ïa kata ka ri babha. 23To sumar ïa lade, ba ïoh phin ïaklet ïa ka jutang U Trai uba U Blei jong phi, ïa kaba u la pynlong bad phi, bad ba phin ïathaw bleithaw ïa lade ba la mutdur, lane ïa ka dur kaei kaei ruh ïa kaba U Trai uba U Blei jong me u la adong ïa me. 24#Heb. 12:29.Naba U Trai uba U Blei jong me, u long ka ding kaba bam duh, U Blei u bathut shen.

25“Ynda men ïoh pynkha khun, bad ïoh ki ksiew ruh, bad ba phi la ïashong slem ha kata ka ri, bad ba phi la pynsniew ïa lade, bad phi la ïathaw bleithaw ba la mutdur, ka dur kaei kaei ruh, bad ba phin leh bymman ha khmat U Trai uba U Blei jong me, ïa ka ban pynbitar ïa u: 26nga khot ïa ka bneng, bad ïa ka khyndew, ban sakhi pyrshah ïa phi ha kane ka sngi, ba shen shen ruh, phin duh noh khoit na kata ka ri sha kaba phin sa leit sha shiliang ka Jordan ban ïoh ïa ka; phin ym pynslem ïa ki sngi jong phi ha ka, hynrei, yn pynjot noh thiaw ïa phi keiñ. 27#Deu. 28:36.Bad U Trai un pynsakma ïa phi hapdeng ki jaid bynriew, bad yn iehnoh ïa phi tang khyndiat briew hapdeng kita ki kynja bynriew, sha kiba U Trai un ïalam noh ïa phi. 28Te hangta, phin ïashakri ïa ki bleithaw, ïa kiba la thaw da ki kti ki briew, na u dieng, bad na u maw keiñ, ki bymïohi, lymne ki bymïohsngew, lymne kim bam, lymne iw ruh. 29#Jer. 29:13.Hynrei, lada nangta, men da wad ïa U Trai uba U Blei jong me, men sa shem ïa u, lada men da wad ïa u da la ka dohnud baroh, bad da la ka mynsiem baroh. 30Haba me long ha ka jingjynjar, bad haba kine kiei kiei baroh ki la jia ha me, ha kita ki sngi ki bakhatduh men phai khmat sha U Trai uba U Blei jong me, bad men kohnguh ruh ïa ka ktien jong u; 31naba U Trai uba U Blei jong me, u long U Blei uba isynei keiñ; un ym iehnoh ïa me, lymne pynjot ïa me, lymne klet ïa ka jutang jong ki kpa jong me ïa kaba u la smai ha ki.

32“Naba to da kylli mynta shaphang kita ki sngi kiba la lah, kiba la long mynshuwa jong me, naduh kata ka sngi ba U Blei u la thaw ïa u briew ha ka pyrthei, bad naduh ka bakut haduh ka bakut ka bneng ruh, la jia ne em kaei kaei ruh kaba khraw kum kane, lane la ïohsngew ne em kaba kum kane? 33Ki briew ki la ju ïohsngew ne em ïa ka jingsawa U Blei ba kren napdeng ka ding, kumba me la ïohsngew, bad ki im? 34Lane U Blei u la pyni da kaba leit shim ha lade ïa ka jaid bynriew napdeng kawei pat ka jaid bynriew, da ki jingtynjuh, da ki dak khyllah, bad da ki jingphylla, bad da ka thma, bad da ka kti badonbor ruh, bad da ka ksang'ti ba la kner, bad da ki jingsheptieng bakhraw ruh, kat kumba baroh ïa kaba U Trai uba U Blei jong phi u la leh na ka bynta jong phi ha ka ri Ijipt ha khmat jong phi? 35#Mrk. 12:32.Ha me keiñ la pyni ïa kane, khnang ba men ïoh tip ba U Trai u long U Blei; ym don uwei pat, tang ma u. 36Na bneng u la pynsngew ïa ka ktien jong u ha me, ba un ïoh hikai ïa me: bad ha ka pyrthei ruh u la pyni ïa me ïa ka ding bakhraw jong u; bad me la ïohsngew ïa ki ktien jong u ruh napdeng kata ka ding. 37Te namar ba u la ieit ïa ki kpa jong me, namar kata keiñ, u la jied ïa ki symbai jong ki hadien jong ki, bad u la wallam noh ïa me ha khmat jong u, da ka bor bakhraw jong u, na ka ri Ijipt; 38ïa ka ban beh noh na khmat jong me ïa ki jaid bynriew kiba kham khraw, bad kiba kham don bor ruh ban ïa me, ban wallam ïa me hapoh, ïa ka ban ai ha me ïa ka ri jong ki kum ka bynta pateng, kumba ka long ha kane ka sngi. 39Namar kata, to tip ha kane ka sngi, bad to da pyrkhat ruh ha la ka dohnud, ba U Trai, ma u hi u long U Blei ha ki bneng sha jrong bad ha ka pyrthei shapoh: uwei pat, um don shuh keiñ. 40Men sumar, namar kata, ïa ki hukum jong u, bad ïa ki aiñ jong u, ïa kiba nga hukum ïa me ha kane ka sngi, ba kan long bha ïa me, bad ïa la ki khun hadien jong me, bad ba men ïoh pynslem ruh ïa ki sngi jong me ha ka khyndew, ïa kaba U Trai uba U Blei jong me u aiti ha me, ha la ka rta.”

Ki nongbah jaka rieh shaphang mihngi ka Jordan

41 # Jkñ. 35:6,9-34; Deu. 19:2-13; Jos. 20:7-9. Ynda kumta, u Moses u la pynkyrpang lai tylli ki nongbah ha kane ka liang ka Jordan shaphang mihngi; 42ba u nongpynïap briew un ïoh phet ïap shata, uba la kum pynïap ïa la u paramarjan, haba um shym la shun ïa u mynshuwa; te da kaba phet ïap sha kawei na kine ki nongbah, un ïoh im keiñ: 43kita ki long: ka Beser ha ka ri khlaw, ha ka ri madan, ïa ki Reuben; bad ka Ramoth ha Gilead, ïa ki Gad; bad ka Golan ruh ha Bashan, ïa ki Manasseh.

Ka ktien lamphrang shaphang ka hukum

44Kane te kata ka hukum ïa kaba u Moses u la buh ha khmat ki khun Israel: 45kine keiñ kita ki jingphla, bad kita ki hukum, bad kita ki jingbishar, ïa kiba u Moses u la kren ha ki khun Israel, hadien ba ki la ïamih noh na ka ri Ijipt; 46ha kane ka liang ka Jordan, ha kata ka them, marpyrshah ka Beth-peor, ha ka ri u Sihon u syiem ki Amor, uba la shong sah ha Heshbon, ïa uba u Moses bad ki khun Israel ki la ïashoh ïap, hadien ba ki la ïamih noh na ka ri Ijipt; 47te ki la ïoh ïa ka ri jong u, bad ïa ka ri u Og ruh u syiem ka Bashan, baroh ar syiem keiñ ki jong ki Amor, kiba ha kane ka liang ka Jordan shaphang mihngi; 48naduh Aroer, kaba harud ka wah Arnon, haduh u lum Sirion#4:48 u lum Sirion: Khmih ruh ha Deu. 3:9. (uba long u Hermon keiñ), 49bad ïa kata baroh kawei ka pyntha kaba ha kane ka liang ka Jordan shaphang mihngi, haduh ka duriaw ka pyntha, hapoh kita ki umpohliew Piskah.

Currently Selected:

DEUTERONOMI 4: KHB

Highlight

Copy

Compare