DEUTERONOMI 3

Ki Israel ki jop ïa u Og u syiem Ka Bashan

(Jkñ. 21:31-35)

1 # Jkñ. 21:33-35. “Ynda kumta, ngi la leit phai, bad ngi la leit kiew ruh na ka lynti sha Bashan: te u Og u syiem ka Bashan, u la wan mih noh pyrshah ïa ngi, ma u bad u paidbah jong u baroh, ban ïaleh thma ha Edrei. 2Te U Trai u la ong ha nga, ‘To wat sheptieng ïa u: naba ha ka kti jong me ngan aiti ïa u, bad ïa u paidbah jong u baroh, bad ïa ka ri jong u ruh; te men leh ïa u kumba me la leh ha u Sihon u syiem ki Amor, uba la shong sah ha Heshbon.’ 3Kumta, U Trai uba U Blei jong ngi u la aiti ha ki kti jong ngi ïa u Og ruh, u syiem ka Bashan, bad ïa u paidbah jong u baroh: bad ngi la ïashoh ïap ïa u haduh ba ym shym la pynsah ha u ïa uwei ruh. 4Bad ngi la jop ruh ïa ki nongbah jong u baroh ha kata ka por; ym shym la don kawei ka nongbah ïa kaba ngim shym la shim na ki; ïa hynriewphew tylli ki nongbah, ïa ka ri Argob baroh, ïa ka hima u Og keiñ ha Bashan. 5Ïa kine ki nongbah baroh la ker sawdong da ki kynroh bajrong, da ki khyrdop, bad da ki dieng khap; nalor shibun ki shnong ki bym shym la ker kynroh. 6Te ngi la ïa-pynduh noh khoit ïa ki, kumba ngi la leh ha u Sihon u syiem ka Heshbon, ïa ki rangbah, ïa ki kynthei, ïa ki khynnah de, ki jong ki nongbah baroh la pynduh noh khoit keiñ. 7Hynrei, ïa ki jingri baroh, bad ïa ka jinglute jong kita ki nongbah, ngi la ïashim lute ha lade. 8Ngi la ïashim ruh ha kata ka por, na ka kti kita ar ngut ki syiem ki kynja Amor, ïa kata ka ri kaba ha kane ka liang jong ka Jordan, naduh ka wah Arnon haduh u lum Hermon;” 9(Ïa uta u Hermon, ki Sidon ki khot “Sirion”, bad ki Amor ki khot “Senir” ïa u;) 10“ïa ki nongbah baroh ha kata ka madan, bad ïa ka ri Gilead baroh, bad ïa ka ri Bashan baroh, haduh Salekah, bad Edrei, ki nongbah ka hima u Og ha Bashan.” 11(Naba tang une u Og u syiem ka Bashan u la dang sah na kita ki riewradbah; ha khmih, ka palong thiah jong u ka la long da u nar; kam don mynta ha Rabbath ki khun u Ammon? ka lynter jong ka, khyndai pruh, bad ka pyngkiang jong ka, saw pruh, kat kum ka pruh u rangbah.)

Kaba ïasam bynta ïa kita ki ri

(Jkñ. 32:1-42)

12 # Jkñ. 32:1-42. “Te ïa kane ka ri, ngi la ïoh ha kata ka por; naduh Aroer, kaba harud ka wah Arnon, bad ïa shiteng u lum Gilead ruh, bad ïa ki nongbah jong u, nga la ai ha ki Reuben, bad ha ki Gad: 13Bad ïa kaba dang sah na ka ri Gilead, bad ïa baroh kawei ka ri Bashan, kaba ka hima u Og, nga la ai ha kaba shiteng ka jaid Manasseh; ïa baroh kawei ka ri Argob, lem bad ka Bashan baroh.” (Ïa kane la khot “ka ri ki riewradbah”. 14U Jair u khun u Manasseh, u la shim ïa ka ri Argob baroh, haduh ki phang ki Geshur bad ki Maakath; bad u la khot kyrteng ïa ki, ha la ka jong ka kyrteng, “ka Bashan Haboth-jair”#3:14 ka Bashan Haboth-jair: Ïa kane ka bynta la khmih na Ka Ktin U Blei kaba la pynmih ha ka snem 1899. La shem ba ka long kaba kham shai ban ïa kaba don ha ki edition jong Ka Baibl kiba mih ha ki snem ba hadien., haduh kane ka sngi keiñ.) 15“Te ïa ka ri Gilead nga la ai ha u Makhir. 16Bad ha ki Reuben, bad ha ki Gad ruh, nga la ai naduh Gilead haduh shiteng keiñ ka wah Arnon, bad ïa ka pud haduh ka wah Jabbok, kaba long ka pud ki khun u Ammon; 17ïa kata ka madan ruh, bad ïa ka Jordan bad ïa ka phang jong ka, naduh Khinnereth haduh ka duriaw ka pyntha, ka Duriaw Mluh keiñ, hapoh ki umpohliew Piskah shaphang mihngi.

18 # Jos. 1:12-15. “Te nga la hukum ïa phi ha kata ka por, da kaba ong, ‘U Trai uba U Blei jong phi u la ai ha phi, ïa kane ka ri ban ïoh ïa ka: ka dei ïa phi ban leit sha shiliang, kiba la kieng atiar ha khmat ki para jong phi ki khun Israel, baroh keiñ kiba don bor ban ïaleh thma. 19Hynrei, ki tnga jong phi, bad ki khun rit jong phi, bad ki jingri jong phi,’ ” (nga tip ba phi don bun ki jingri,) “ ‘kin sah ha ki nongbah jong phi ïa kiba nga la ai ha phi: 20tad ynda U Trai u la pynshong thait ïa ki para jong phi, kumba ïa phi ruh, bad ba ki ruh ki la ïoh ïa kata ka ri ïa kaba U Trai uba U Blei jong phi u la ai ha ki, sha shiliang ka Jordan: ynda kumta keiñ, phin sa wan phai pat, uwei uwei baroh sha la ka bynta trai, ïa kaba nga la ai ha phi.’ 21Nga la hukum ruh ha u Joshua ha kata ka por, da kaba ong, ‘Ki khmat jong me ki la ïohi baroh ïa kaba U Trai uba U Blei jong phi u la leh ïa kine ar ngut ki syiem: kumta keiñ, U Trai un leh ïa kita ki hima baroh sha kiba men sa leit. 22Wat sheptieng ïa ki: naba U Trai uba U Blei jong phi, ma u hi keiñ, un ïaleh thma na ka bynta jong phi.’

U Moses um ïoh leit rung shapoh kata ka ri

23 # Jkñ. 27:12-14; Deu. 32:48-52. “Te nga la kyrpad ïa U Trai ha kata ka por, nga da ong, 24‘A Trai uba U Blei, me la sdang ban pyni ha la u shakri ïa ka jingkhraw jong me, bad ïa ka kti badonbor jong me: naba uno u blei#3:24 u blei: La buh ïa kine ki kyntien ha ki dak rit namar ba kim shym thew lane mut ïa U Blei ba-im bad bashisha. uba ha ki bneng lane ha ka khyndew, uba lah ban leh katba kum ki jingleh jong me, bad katba kum ki bor jong me? 25Nga kyrpad ïa me, to shah ba ngan leit sha shiliang, ban ïohi ïa kata ka ri ka babha kaba sha shiliang ka Jordan, ïa uta u lum ba-itynnad, ïa u Lebanon keiñ.’ 26Hynrei, U Trai u la bitar bad nga na ka bynta jong phi, te um sngew ïa nga: hynrei, U Trai u la ong ha nga, ‘Katta la biang; wat kren shuh ha nga shaphang kane ka kam. 27To leit kiew me sha kliar u lum Piskah, bad to khmied ïa la ki khmat shaphang sepngi, bad shaphang shatei, bad shaphang shathie, bad shaphang mihngi, bad to khmih ïa ka da la ki khmat; naba men ym ïoh leit keiñ sha shiliang kane ka Jordan. 28Hynrei, to hukum ïa u Joshua, bad to pynshlur ïa u, bad to pynkhlaiñ ruh ïa u: naba ma u, un ïoh leit sha shiliang ha shuwa une u paidbah, bad un pynïabynta ruh ha ki, ïa kata ka ri ïa kaba men ïohi.’ 29Kumta, ngi la ïashong sah ha kata ka madan kaba ha pyrshah Beth-peor.”

Currently Selected:

DEUTERONOMI 3: KHB

Highlight

Copy

Compare