DEUTERONOMI 5

Ki Shiphew Hukum

(Eks. 20:1-17)

1Te u Moses u la khot ïa ki Israel baroh, bad u la ong ruh ha ki, “To sngew, A Israel, ïa ki hukum, bad ïa ki jingbishar, ïa kiba nga kren ha ki shkor jong phi ha kane ka sngi, ba phin dup nang ïa ki, ba phin sumar ïa ki, bad phin leh ïa ki ruh. 2U Trai uba U Blei jong ngi, u la pynlong ïa ka jutang bad ngi, ha Horeb. 3U Trai um shym la pynlong ïa kane ka jutang bad ki kpa jong ngi, hynrei, bad ngi, ma ngi hi keiñ, ki ba-im hangne baroh ha kane ka sngi. 4U Trai u la ïakren markhmat bad phi ha uta u lum napdeng kata ka ding, 5(nga la ïeng hapdeng U Trai bad phi ha kata ka por, ïa ka ban pyni ha phi ïa ka ktien U Trai: naba phi la sheptieng ïa kata ka ding, bad phim shym ïatreh ban leit kiew sha uta u lum); u da ong,

6 # Eks. 20:2-17. “ ‘Ma nga long U Trai uba U Blei jong me, uba la wallam ïa me na ka ri Ijipt, na kata ka ïing ka jinglongmraw.

7“ ‘Men ym ïoh kiwei kiwei ki blei nalor jong nga.

8 # Eks. 34:17; Leb. 19:4; 26:1; Deu. 4:15-19; 27:15. “ ‘Men ym thaw dur bleithaw ba shu mut ïa lade, lymne ïa ka dur jong kaei kaei ruh kaba don ha bneng sha jrong, lymne ka jong kaba ha ka khyndew shapoh, lymne ka jong kaba ha ki um shapoh ka khyndew: 9#Eks. 34:6,7; Jkñ. 14:18; Deu. 7:9,10.men ym dem ïa ki, bad men ym shakri ruh ïa ki: naba ma nga U Trai uba U Blei jong me, nga long U Blei u bathut shen, uba pynwan ïa ka jingpalat ki kpa halor ki khun haduh ka balai, bad ka basaw pateng bynriew jong kiba isih ïa nga; 10uba leh isynei ruh ïa ki hajar jong kiba ieit ïa nga, bad ba sumar ïa ki hukum jong nga.

11 # Leb. 19:12. “ ‘Men ym ong thala ïa ka kyrteng U Trai uba U Blei jong me: naba U Trai un ym pynksan ïa uba ong thala ïa ka kyrteng jong u.

12 # Eks. 16:23-30; 31:12-14. “ ‘To sumar ïa ka sngi Sabbaton, ïa ka ban pynkyntang ïa ka, kumba U Trai uba U Blei jong me u la hukum ïa me. 13#Eks. 20:8-11; 23:12; 31:15; 34:21; 35:2; Leb. 23:3.Hynriew sngi men trei, bad men leh ruh ïa ka kam jong me baroh: 14hynrei, ka bahynñiew ka sngi, long ka Sabbaton ha U Trai uba U Blei jong me: ha kata, men ym leh ïa kaei kaei ruh ka kam, ma me, lymne u khun jong me, lymne ka khun jong me, lymne u shakri jong me, lymne ka shakri jong me, lymne u masi jong me, lymne ka kadda jong me, lymne ki jingri jong me, lymne u nongwei uba hapoh ki phalor jong me; ba u mraw jong me, bad ka mraw jong me kin ïoh shongthait kumjuh kum ma me hi. 15Bad to kynmaw ba me, me la long u mraw ha ka ri Ijipt, bad ba U Trai uba U Blei jong me u la wallam noh ïa me nangta da ka kti badonbor, bad da ka ksang'ti ba la kner: namar kata keiñ, U Trai uba U Blei jong me u la hukum ïa me ban sumar ïa ka sngi Sabbaton.

16 # Deu. 27:16; Mat. 15:4; 19:19; Mrk. 7:10; 10:19; Luk. 18:20; Eph. 6:2; 6:3. “ ‘To burom ïa la u kpa, bad ïa la ka kmie, kumba U Trai uba U Blei jong me u la hukum ïa me: ba yn pynslem ïa ki sngi jong me, bad ba kan long bha ïa me, ha kata ka ri ïa kaba U Trai uba U Blei jong me u ai ha me.

17 # Jen. 9:6; Leb. 24:17; Mat. 5:21; 19:18; Mrk. 10:19; Luk. 18:20; Rom. 13:9; Jak. 2:11. “ ‘Men ym pynïap briew.

18 # Leb. 20:10; Mat. 5:27; 19:18; Mrk. 10:19; Luk. 18:20; Rom. 7:7; 13:9; Jak. 2:11. “ ‘Lymne men ym klim.

19 # Leb. 19:11; Mat. 19:18; Mrk. 10:19; Luk. 18:20; Rom. 13:9. “ ‘Lymne men ym tuh.

20 # Eks. 23:1; Mat. 19:18; Mrk. 10:19; Luk. 18:20. “ ‘Lymne men ym ïeng sakhi lamler ïa u paramarjan jong me.

21 # Rom. 7:7; 13:9. “ ‘Lymne men ym ikwah ïa ka tnga u paramarjan jong me; lymne men ym ikwah ïa ka ïing u paramarjan jong me, lymne ïa ka lyngkha jong u, lymne ïa u mraw jong u, lymne ïa ka mraw jong u, lymne ïa u masi jong u, lymne ïa ka kadda jong u, lymne ïa kaei kaei ruh kaba dei ka jong u paramarjan jong me.’

22 # Eks. 20:18-21; Heb. 12:18,19. “Ïa kine ki ktien, U Trai u la kren ha ka jingïaseng lang jong phi baroh ha uta u lum napdeng kata ka ding, na uta u lyoh, bad na kata ka jingdum tliw tliw, da ka jingsawa bajam: bad um shym la kren shuh nalor kata. Bad u la thoh ruh ïa ki ha ki ar tylli ki maw lyngkniap, bad u la ai ïa ki ha nga.

Ka jingsheptieng ka ngat ha u paidbah

(Eks. 20:18-21)

23“Ka la jia te, mynba phi la ïohsngew ïa kata ka jingsawa ktien napdeng kata ka jingdum, (namar uta u lum u la ing da ka ding,) ba phi la ïawan hajan jong nga, baroh keiñ ki rangbah ki jaid jong phi, bad ki tymmen basan jong phi; 24bad phi la ïa-ong, ‘Ha khmih, U Trai uba U Blei jong ngi u la pyni ha ngi ïa la ka burom, bad ïa la ka jingkhraw, ngi la ïohsngew ruh ïa ka jingsawa ktien jong u napdeng kata ka ding: ngi la ïohi keiñ ha kane ka sngi, ba U Blei u kren ha u briew, bad ba u im ruh. 25Te namar kata, balei ngin da ïap? namar kane ka ding kaba khraw kan bam duh ïa ngi: lada ngin nang ïohsngew shuh ïa ka jingsawa ktien U Trai uba U Blei jong ngi, te ngin sa ïap noh. 26Naba uno na ka doh baroh, ba la ïohsngew ïa ka jingsawa ktien U Blei u ba-im, ba U da kren napdeng kata ka ding, kum ma ngi, bad uba la im keiñ? 27To leit hajan ma me, bad to sngew ruh ïa baroh kaba U Trai uba U Blei jong ngi un kren: bad to da kren ma me ha ngi ïa baroh kaba U Trai uba U Blei jong ngi un sa kren ha me; te ngin sngap, bad ngin leh ruh ïa kata.’

28“Te U Trai u la ïohsngew ïa ka jingsawa ki ktien jong phi, mynba phi la ïakren ha nga; bad U Trai u la ong ha nga, ‘Nga la ïohsngew ïa ka jingsawa ki ktien jong une u paidbah, ïa kiba ki la kren ha me: ki la kren bha ïa baroh kaba ki la kren. 29A ban da don ha ki ka dohnud kat kane, ïa ka ban sheptieng ïa nga, bad ban sumar ïa ki hukum jong nga baroh ha la ka sngi, ba kan da long bha ïa ki, bad ïa ki khun jong ki ha la ka rta! 30To leit ong ha ki, “To khie leit phai pat phi sha la ki ïingjaiñ.” 31Hynrei, shaphang jong me, to ïaisah ma me hangne bad nga, te ngan kren ha me ïa ki hukum baroh, bad ïa ki aiñ, bad ïa ki jingbishar, ïa kiba men hikai ha ki, ba kin ïoh leh ïa ki ha kata ka ri ïa kaba ngan ai ha ki, ïa ka ban ïoh ïa ka.’ 32Namar kata, phin sumar ban leh kumba U Trai uba U Blei jong phi u la hukum ïa phi: lymne phin ym phai sha kadiang lymne sha kamon. 33To phin ïaid ha kita ki lynti baroh ïa kiba U Trai uba U Blei jong phi u la hukum ïa phi, ba phin ïoh im, bad ba kan long bha ruh ïa phi, bad ba phin pynslem ïa ki sngi jong phi ha kata ka ri ïa kaba phin sa ïoh.

Currently Selected:

DEUTERONOMI 5: KHB

Highlight

Copy

Compare