MATEO 12
12
Yachacujcuna samana punllapi trigo caspata c'utsashcami
(Mr 2.23-28; Lc 6.1-5)
1Chai punllacunallatajmi Jesusca, samana punllapi trigo chagra chaupi ñanta ricurca. Paipaj yachacujcunaca yaricachishpami, trigo caspata c'utsashpa c'acushpa micui callarircacuna. 2Chaita fariseocuna ricushpaca:
–Cambaj yachacujcunaca, samana punllapi ama rurangui nishcatamari ruracuncuna– nircacunami.
3Chaimi Jesusca:
–Davidpish, paihuan cajcunapish yaricaihuan cashpa, imata rurashcataca ¿manachu rezashcanguichijllapish? 4Paica, Taita Diospaj huasiman yaicushpa, Taita Diosman cushca tandatami micurca. Chai tandataca paipish, paihuan cajcunapish mana micunallachu carca. Chaitaca curacunallami micuna carca. 5Curacunapish Taita Diospaj huasipica, samana punllapimi yanga punllapi shinallataj Taita Diospajta rurancuna. Chashna rurashpapish mana juchayuj tucushcataca Moisés Mandashcapica ¿manachu rezashcanguichij? 6Cancunataca cashnami nini: Taita Diospaj huasitapish yalli jatun cajmari caipi. 7Quillcachishcapi: “Sacrificiocunataca mana ninichu. Ashtahuanpish llaquij cachunmi munani” nishca imata nisha nishcata yachashpaca, manapish millaita rurajcunataca mana llaquichinguichijmanchu. 8Runa Aichayujca, samana punllatapish Mandajmi– nircami.
Chaquishca maquiyuj runata alliyachishcami
(Mr 3.1-6; Lc 6.6-11)
9Chaimanta rishpaca, Jesusca judiocunapaj sinagogamanmi yaicurca. 10Chaipica chaquishca maqui shuj runami tiyacurca. Jesusta juchachingapajmi, fariseocunaca:
–¿Samana punllapica alliyachina ninchu?– nishpa tapurcacuna.
11Shina nijpi Jesusca:
–Cancunapuramanta maijancunataj shujlla ovejata charijpi, samana punllapi jutcuman huashicujpica ¿manachu llujshichinguichijman? 12Runacarin ovejata maihuan yallimari. Chashna cashcamantami, samana punlla cajpipish allita ruranataca mandashcaca mana jarcan– nircami.
13Shina nishpa Jesusca chai runataca:
–Cambaj maquita chutai– nijpi chutajpica, caishuj maqui shinallataj alli tucurcallami. 14Fariseocuna chaimanta llujshishpaca Jesusta ima shina huañuchinatami yuyarinacurcacuna.
Taita Diospajta rurachun agllashcami
15Jesusca chashna huañuchisha nicujta yachashpami, chaimanta llujshishpa rirca. Achcacuna paita catishpa rijpi, tucuicunata alliyachishpaca, 16ñucamantaca pajta piman huillanguichijman nishpami mandarca. 17Profeta Isaías cashna nishca shinallatajmi chashna pajtarca. Isaiasca:
18“Paica ñucapajta rurajmi.
Paitaca ñucami agllarcani.
Paica ñuca c'uyashcami, paillami ñuca munashcata ruraj.
Ñuca Espiritutaca, paipaj jahuapimi churasha.
Paica cashcata rurashpa ñuca mandana cashcatami, mana israelcunaman huillanga.
19Paica mana p'iñanacungachu, caparirishcapish mana uyaringachu.
Ñancunapi jatunta rimaricushcallatapish pi mana uyangachu.
20P'aquirinalla carrizotapish, mana p'aquingachu.
Huañunalla cushnicuj mechatapish, pai tucuita mishashpa mandana punllacama mana huañuchingachu.
21Mana israelcunapish tucuicunami paipi shunguta churangacuna” nishcami pajtarca.
Jesustaca Beelzebú diablohuanmi nishcami
(Mr 3.20-30; Lc 11.14-23)
22Chai q'uipami Jesuspajmanca, supai japishca, mana ricuj, mana rimaj shuj runata pushamurcacuna. Chai mana ricuj, mana rimaj runaca, Jesús alliyachijpica ricurca, rimarcallami. 23Chaita tucui ricujcunaca, jatunta mancharishpami: “¿Caica Davidpaj Churichu imashi?” ninacurcacuna. 24Ashtahuanpish fariseocuna chaita uyashpaca: “Caica, supaicunata mandaj Beelzebú diablohuan cashpamari, supaicunataca llujshichin” nircacunami.
25Jesusca paicuna ima shina yuyacujta yachashpami cashna nirca: “Maijan llajtapipish mandajcunapurallataj p'iñanacushpa chaupirijpica, paicuna mandacushcaca chingarinmanllami. Maijan pueblopi causajcunapish, huasi ucupi causajcunapurapish quiquinpurallataj p'iñanacujpica chingarinmanllami. 26Satanasca, Satanasllatataj llujshichishpaca, pai mandacushcatami chingachinman. 27Ñucataca Beelzebú diablohuan cashcamantami, supaicunataca llujshichicun ninguichijmi. Cancunapaj yachacujcunapish ¿pihuan cashpataj supaicunataca llujshichincunari? Supaicunata paicuna llujshichishpaca, ñucaca Taita Diosmanta cashcata, cancuna pandaricushcatami ricuchin. 28Ashtahuanpish ñucaca, Taita Diospaj Espirituhuanmi supaicunataca llujshichini. Ñuca chashna rurashpaca, jahua pachamanta mandana cancunapajman ña chayamucushcatami ricuchini. 29Maijanpish c'ari c'ari runapaj huasiman yaicushpa, imalla charishcacunata shuhuasha nishpaca, paita manaraj huatashpaca imata mana shuhuai tucunmanchu. Paita huatashpallami shuhuai tucun. 30Maijanpish ñucahuan mana shujlla cajca, ñucata p'iñajmi. Maijanpish mana ñucahuan tucushpa tandachijca ñuca tandachisha nishcatapish urata janajta cachashpa chingachijmi.
31Chaimantami cancunamanca cashna nini: Tucui juchacunata, p'iñashpa c'amishcacunataca Taita Diosca perdonangami. Ashtahuanpish jucha illaj Espirituta p'iñashpa c'amishcataca, manataj perdonangachu. 32Runa Aichayujta maijancuna imata rimashpa c'amishcataca perdonashcami canga. Ashtahuanpish jucha illaj Espirituta p'iñashpa c'amijtaca, cunan causaipipish, shamuj causaipipish manataj perdonangachu.
Alli yura cashcatapish mana alli yura cashcatapish grano p'ucujpimi ricuna
33Alli yura cajpica, alli granomi p'ucun. Mana alli yura cajpica, mana alli granomi p'ucun. Ima yura cashcataca granota p'ucujpimi rijsinchij. 34¡Culebrapaj huahua huahuacuna! Cancunallataj millai cashpaca ¿ima shinataj allitaca rimai tucunguichigari? Shungupi junda tiyashcatami shimica riman. 35Alli runaca, imapish allicunallata paipaj shungupi huaquichishca cashpami, alli sumajcunallata llujshichin. Mana alli runaca imapish mana allicunallata paipaj shungupi huaquichishca cashpami mana alli millaicunallata llujshichin. 36Chashna cajpipish: Gentecunaca maipish cachun rimashcacunataca, imalla rurashcata Taita Dios tapucui punllapimi imamanta chashna rimashcataca paicunallataj huillacungacuna. 37Chai punllapica, cambaj shimi allita rimaj cashca cashpaca, alli nishcami cangui. Cambaj shimi mana allita rimaj cashca cashpaca, llaquichishcami cangui” nircami.
Milagrota rurachun mañashcami
(Mr 8.12; Lc 11.29-32)
38Chaipica Mandashcata quillcajcunapish, fariseocunapish maijancunaca Jesustaca:
–Yachachij, shuj señaltami rurashpa ricuchichun ninchij– nijpimi, 39Jesusca:
–Huahua huahua millaita ruraj, huainayaj runacunaca, shuj señalta rurashpa ricuchichunmi mañancuna. Paicunamanca manataj ricuchishcachu canga. Ashtahuanpish profeta Jonás shina tucushcallatami ricungacuna. 40Jonas, shuj jatun chalhuapaj huijsa ucupi quimsa punllata, quimsa tutata cashca shinallatajmi. Runa Aichayujpish, allpa ucupi quimsa punllata, quimsa tutata canga. 41Imalla rurashcata Taita Dios ricuchi punllapica, cunan cai punllapi causajcunataca Ninivepi causajcunami, mana allitamari rurashcanguichij ningapaj shamungacuna. Ninivepi causajcunaca Jonás huillajpimi, paicuna juchayuj cashcamanta Taita Diosman cutirircacuna. Caipica Jonastapish yallimari huillacun. 42Imalla rurashcata Taita Dios ricuchi punllapica, ura llajtata jatun mandaj huarmipishmi, cunan cai punllapi causajcunataca mana allitamari rurashcanguichij ningapaj shamunga. Chai huarmica ñaupa mandaj Salomón yachaisapa cajpimi, pai yachachishcata uyangapaj caru llajtamanta shamurca. Riquichij, caipica Salomontapish yallimari yachachicun– nircami.
Mapayachij espíritu cutin tigrashcami
(Lc 11.24-26)
43“Mapayachij espíritu runamanta llujshishpaca, shitashca pambacunatami samarinata mashcashpa purin. 44Samarinata mana japishpaca: “Ñaupa ñuca causacushcallamantaj cutin tigrashalla” nishpami tigran. Ña tigrashpaca p'ichashca, allichishca, chushajlla huasi ucu shinatami chai runataca ricun. 45Chashna cajta ricushpaca, paita yalli millai canchis supaicunata pushamushpami, chai runaman yaicushpa causancuna. Chaimantami chai runaca ñaupa ima shina cashcatapish yalli millai tucun. Cunan punllacunapi causacuj millaicunapish chashnallatajmi tucungacuna” nircami.
Jesuspaj mamapish huauquicunapish
(Mr 3.31-35; Lc 8.19-21)
46Chaipi cajcunaman Jesús huillacujpirajmi, paipaj mamapish, huauquicunapish paihuan rimangapaj canllapi shuyacurcacuna. 47Chaimantami shujca:
–Cambaj mama, cambaj huauquicunamari canhuan parlashun nishpa canllapi shuyacuncuna– nirca. 48Jesús cutichishpaca:
–¿Pitaj ñuca mama, pitaj ñuca huauquicunaca?– nishpa, 49paipaj yachacujcunata maquihuan ricuchishpami:
–Caicunami ñuca mama, ñuca huauquicuna. 50Maijanpish jahua pachapi caj ñuca Yayapaj munaita rurajcunami ñuca huauqui, ñuca pani, ñuca mamaca– nircami.
Currently Selected:
MATEO 12: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.