MATEO 11
11
1Jesusca, paipaj chunga ishqui yachacujcunaman yachachishca q'uipaca, chai llajtallapitaj caj shujtaj pueblocunapi yachachingapaj huillangapajpishmi chaimantaca rirca.
Bautizaj Juan paipaj yachacujcunata Jesusta tapunaman cachashcami
(Lc 7.18-35)
2Juanca carcelpi cashpami, Cristo imallata ruracushcata uyashpa, paipaj yachacujcunamanta ishquita, 3Jesusta tapunaman cacharca. Paicunataca:
–¿Canchu chai shamuna cashcaca cangui, mana cashpaca shujtajtachu shuyana canchij?– nichunmi cacharca.
4Paicuna tapujpica Jesusca:
–Richij, cancuna imata ricushcata, uyashcata Bautizaj Juanmanca huillagrichij. 5Ñahui mana ricujcuna ricushcata, cojocuna purishcata, leprahuan cajcuna alliyashcata, rinrin mana uyajcuna uyashcata, huañushcacunata causachishcata, huajchacunamanpish alli huillaita huillashcata Juanmanca huillagrichij. 6Maijanpish ñucapi mana ñitcarijca cushichishcami canga– nircami.
7Bautizaj Juan cachashcacuna rishca q'uipami, Jesusca chaipi cajcunaman Juanmanta cashna parlai callarirca: –Shitashca pambapica ¿imata ricungapajtaj rircanguichij? ¿Shuj carrizota huaira caiman chaiman cuyuchicujtachu ricugrircanguichij? 8Mana cashpaca ¿Shuj runa sumaj churanacunata churarishcatachu ricugrircanguichij? Sumajta churarishcacunaca, jatun mandajcunapaj huasicunallapimi tiyan. 9Shinashpaca ¿imata ricungapajtaj rircanguichij? ¿Shuj profetatachu ricugrircanguichij? Ari, profetatatajmari ricugrircanguichij. Paica profetatapish yallimari. 10Juanmantaca, cashna quillcachishcami tiyacun:
“Ñuca ima nishcata huillajtaca cambaj ñaupami cachani.
Paimi cambaj ñaupa rishpa, can purina ñanta allichinga” nishcami.
11Cai pachapi huacharishcacunapurapica, bautizaj Juanta yalli allica pi mana tiyashcachu. Shina cajpipish cai pachapi imapish mana caj shinacunami jahua pachamanta mandacunpica Juanta yalli cangacuna. Chashnatajmi canga.
12Bautizaj Juan huillai callarishca punllamanta cunancamami, jahua pachamanta mandacunca llaquita apacun. Chai mandacunman yaicusha nijcuna ama yaicuchunmi millaicunaca chingachisha nicuncuna. 13Profetacunapish, mandashcacunapish, jahua pachamanta mandaj shamuna cashcataca Juan huillai callaringacamami huillacurca. 14Eliastami cachasha nishpa Taita Dios nishcaca bautizaj Juanmi. Paita crisha nishpaca crichijlla. 15Maijanpish uyanapaj rinrinta charijca uyaichigari. 16Cunan cai punllapi causacujcunataca ¿imahuantaj ch'imbapurashari? Paicunaca, plazacunapi tiyacuj huambracuna paicunahuan caj huambracunata cashna caparicuj shinami: 17“Flautapi tocajpipish, mana bailarcanguichijchu. Huañuipi cantanata tocajpipish, mana huacarcanguichijchu” nicuj shinamari canguichij. 18Juan shamushpaca, mana micurcachu. Mana ubyarcachu. Chaimanta paitaca: “Supaitami charin” nincunami. 19Runa Aichayuj tucushpa shamujca micujmi, ubyajmi. Chaimanta chai runaca: “Achcata micujmi, vinotapish ubyajmi, impuestota japijcunahuan, juchayujcunahuanpish tandanacunllami” nincunami. Chashna nijpipish Taita Dios yachaj cashcataca Taita Diospaj huahuacunallami allimi nincuna– nircami.
Taita Diosman mana cutirij pueblocunata llaquichinami
(Lc 10.13-16)
20Jesusca tauca pueblocunapimi, achca milagrocunata rurarca. Chai pueblopi causajcunaca chaita ricushpapish, mana allita ruracushcata mana saquishpa Taita Diosman mana cutirijpimi, paicunataca sinchita cashna rimai callarirca: 21“Aij Corazinpi causajcunalla, aij Betsaidapi causajcunalla. ¡Imachari tucunguichij! Cancunapajpi rurashca shina milagrocunata Tiropi, Sidonpi rurashca cajpica, paicunarajchari mana allita ruracushcata saquishcata ricuchingapaj cañamazuta churarishpa, ushpata shitarinman carcacuna. 22Chaimantami cancunaman huillani: Imalla rurashcata Taita Dios ricuchi punllapica, cancunataca Tiropi, Sidonpi causajcunata yallimi jatunta llaquichinga. 23Capernaumpi causajcunalla, jahua pachamanmi apashca cashun yuyacunguichijmi. Ashtahuanpish ucu pachamanmari shitashca canguichij. Cancunapajpi rurashca shina milagrocunata, Sodomapi rurashca cajpica, cunan punllacamami chai puebloca tiyacunmanraj carca. 24Chaimantami cancunaman huillani: Imalla rurashcata Taita Dios ricuchi punllapica, cancunataca Sodomapi causajcunata yallimi jatunta llaquichinga” nircami.
Ñucapajman shamushpa samarichij
(Lc 10.21-22)
25Chaipimi Jesusca cashna nirca: “Jahua pachata, cai pachata Mandaj ñuca Yaya, ñucaca cantami alabani. Alli yuyaiyuj, yachaisapacunamanca caicunataca pacarcanguimari. Ashtahuanpish uchilla huahuacunamanmari ricuchircangui. 26Ñuca Yayitu, canllatajmari chashna tucuchun munashcangui.
27Ñuca Yayaca tucuitami ñucamanca curca. Churi pi cashcatapish pi mana rijsinchu, Yayallami rijsin. Yayatapish pi mana rijsinchu, Churillami rijsin. Pi cashpapish Churi rijsichisha nishcacunallami, Yayataca rijsin. 28Tucui imalla ruranacunahuan shaicushcacuna, aparishcacuna tucuicuna ñucapajman shamuichij. Ñucami cancunataca samachisha. 29Ñucataca manso, mana jatun tucushca shungu cashcata ñuca yugota aparishpa yachaichij. Chashnami cancunapaj alma samarinata japinguichij. 30Ñuca yugoca p'anguillami, ñuca apachinapish mana llashajchu” nircami.
Currently Selected:
MATEO 11: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.