MATEO 13
13
Tarpujmanta yuyachij parlomi
(Mr 4.1-9; Lc 8.4-8)
1Chai punllallatajmi Jesusca huasimanta llujshishpaca, cucha uripi tiyarirca. 2Chaipica achca gentecuna paipajman c'uchuyamujpimi barcoman yaicushpa tiyarirca. Tucui gentecunaca, cucha uripimi carca. 3Chaipimi Jesusca, achca yuyachij parlocunahuan parlashpa cashna nirca:
“Tarpuj runami tarpunaman llujshirca. 4Tarpunaman rishpa muyuta shitacujpica, asha muyuca ñanpimi urmarca. Chaitaca pajarocuna shamushpami micurca. 5Asha muyuca, rumilla allpapimi urmarca. Chaipica mana achca allpa tiyanpi urmashcamantami utca huiñarca. Allpa mana ucujta cashcamantami chashna huiñarca. 6Ashtahuanpish inti llujshishpa rupachijpica, jahualla sapi cashcamanta chaquirircallami. 7Asha muyuca, casha chaupipimi urmarca. Cashacunapish huiñajpi augarishpa mana huiñai tucurcachu. 8Ashtahuanpish alli allpapi urmaj muyuca, alli granotami p'ucurca. Shuj muyullamantami maijanca patsajta, maijanca sujta chungata, maijanca quimsa chungata granorca. 9Maijanpish uyanapaj rinrinta charijca uyaichigari” nircami.
Yuyachij parlocunata imapaj parlashcami
(Mr 4.10-12; Lc 8.9-10)
10Ña parlashca q'uipami, yachacujcuna paipajman c'uchuyamushpaca:
–¿Ima nishpataj canta uyajcunamanca yuyachij parlocunallahuan rimanguiyari?– nircacuna.
11Shina nijpi Jesusca:
–Taita Dios mandagrin, pi mana yachashca pacalla cajtaca, cancunamanmi ricuchishca. Ashtahuanpish paicunamanca, chaitaca mana ricuchishcachu. 12Pacalla cajta maijanpish yachajmanca ashtahuan cujpi ashtahuanmi yachanga. Ashtahuanpish mana yachajtaca, pai ashalla yachashcatapish quichungami. 13Chaimantami yuyachij parlocunallahuan yachachini: Paicunaca ricushpapish mana ricuncunachu, uyashpapish mana uyashca shina tucushpami mana entendincuna. 14Profeta Isaías cashna nishca shinallatajmi paicunaca tucun:
“Uyaitapish uyanguichijmi, manataj entendinguichijchu.
Ricuitapish ricunguichijmi manataj ricunguichijchu.
15Cai llajtapi causajcunapaj shunguca rumiyashcami.
Paicunapaj rinrinca tapashca shinami.
Paicunapaj ñahuicunapish huichcashca shinami tucushca.
Chaimanta uyashpapish mana uyashca shina tucuchun.
Paicunapaj shungutapish ama cutirichun mana entendijta ruragri.
Paicuna chashna tucujpimi, ñucaca mana alliyachisha” nircami.
Chaimi pajtashca.
16Ashtahuanpish cancunapaj ñahuica ricuj cashcamanta, cancunapaj rinrinca uyaj cashcamanta cushichishcami canguichij. 17Profetacunapish, cashcata rurajcunapish cancuna ricucuntaca ricunaihuan cashpapish, mana ricurcacunachu. Cancuna uyacuntaca uyanaihuan cashpapish, mana uyarcacunachu. Chaica chashnatajmi– nircami.
Tarpujmanta parlashcata Jesús entendichishcami
(Mr 4.13-20; Lc 8.11-15)
18“Uyaichij, tarpujmanta yuyachij parlota ñuca parlashcaca cashnami: 19Lluchu ñanpi urmashca muyuca cashnami: Taita Dios mandagrinmanta huillashcata uyashpapish, mana entendijpica, paipaj shungupi tarpushcata, diablo shamushpa anchuchina cashcatami nisha nin. 20Rumilla allpapi tarpushca shinaca, alli huillaita uyashcahuan cushicushpa chasquijcunami. 21Ashtahuanpish paipi sapi mana ucujta cajpimi llaqui japijpi, alli huillaita caticushcamanta llaquichina yuyailla llaquichijpica, ñitcarishpa manarajpish unipi ña saquirinlla. 22Cashalla allpapi tarpushca shinaca, Diospaj Shimita huillashcata uyashpapish cai pachapi ima shinalla rurajcuna rurashca shina charijyana yuyaicunahuan umarishpami, huillashca Shimitaca chai yuyaicuna tapajpi, paicunapaj causaipica imata mana granon. 23Ashtahuanpish alli allpapi tarpushca shinaca, Diospaj Shimita huillashcata uyashpa, entendishpa alli granota p'ucujmi. Chaica shuj muyullamantami patsajta, sujta chungata, quimsa chungata granoj” nircami.
Trigomanta cizañamanta yuyachishpa parlashcami
24Cai yuyachij parlotapishmi Jesusca, cashna nishpa parlarca: “Jahua pachamanta mandacujpica, shuj runa paipaj allpapi alli muyuta tarpuj shinami canga. 25Tarpushca q'uipa tucuicuna dormicujpica, chagrayujta p'iñaj shamushpami, trigo tarpushcapi cizañata tarpushpa rirca. 26Trigo huiñashpa espigamujpica, cizañapish ricurircami. 27Chagrayujpajta rurajcuna ricushpa chagrayujpajman shamushpaca: “Amito, cambaj allpapica alli muyutamari tarpuchircangui. ¿Imamantachari cizañapishmari huiñashca?” nircacunami. 28Chaimi amoca: “Ñucata p'iñajmi chashna rurashca” nijpimi, paipajta rurajcunaca: “¿Chaitaca anchuchigrishunchu?” nircacuna. 29Shina nijpi amoca: “Cizañata anchuchicushpaca, ñataj trigotaraj anchuchinguichijman saquichijlla. 30Tandana punllacama ishquindijtaj huiñachun saquichijlla. Tandana punllapimi tandajcunataca: Cizañataraj tandashpa huataichij rupachingapaj. Trigotaca ñuca huasipi huaquichichij” nircami” nishpami parlarca.
Mostaza muyumanta yuyachishpa parlashcami
(Mr 4.30-32; Lc 13.18-19)
31Cai yuyachij parlohuanpishmi, cashna nishpa parlarca: “Jahua pachamanta mandacujpica, mostaza muyuta shuj runa japishpa, paipaj allpapi tarpushca shinami tucunga. 32Mostazaca, tucui muyucunamanta yalli uchijlla cashpapish, huiñashpaca huertapi tiyaj tucui yuracunata yalli jatunmi. Chashna jatun yura cajpimi, pajarocuna shamushpa, ramacunapica tazinta rurashpa chai ucupi causancuna” nircami.
Levaduramanta yuyachishpa parlashcami
(Lc 13.20-21)
33Shujtaj yuyachij parlohuanca: “Jahua pachamanta mandacujpica, shuj huarmi quimsa taza cutapi levadurahuan chapujpi, tucuita p'unguillichij shinami canga” nircami.
Yuyachij parlocunallahuantaj Jesús huillashcami
(Mr 4.33-34)
34Jesusca tucui caicunataca, yuyachij parlocunallahuanmi chaipi cajcunamanca parlarca. Yuyachij parlocuna illajllaca, mana parlarcachu. 35Paicunata chashna yachachishpaca:
“Cai pacha callarimanta pacalla cajtaca yuyachij parlocunallahuanmi ñuca shimihuantaj parlasha” nishpa profeta huillashca pajtachunmi Jesusca chashna yachachirca.
Cizañamanta parlashcata Jesús entendichishcami
36Chaipi tucui cajcunata minchacamachij nishca q'uipami, Jesusca huasiman yaicurca. Chaipimi paipaj yachacujcuna paipajman c'uchuyashpaca:
–Chagrapi cizaña huiñashcamanta yuyachij parlo imata nisha nishcata huillahuai– nircacuna.
37Jesús cutichishpaca:
–Alli muyuta tarpujca, Runa Aichayujmi. 38Tarpuna allpaca, cai pachapi causajcunami. Alli muyu shinaca, Dios mandacujpi chaipi caj huahuacunami. Cizaña shinaca, diablopaj huahuacunami. 39Cizañata tarpujca p'iñaj diablomi. Tandanaca cai shina causai punllacuna tucurinami, tandajcunaca angelcunami.
40Cizañata p'itishpa rupachij shinami cai shina causai tucuri punllapipish canga. 41Runa Aichayujca pai mandacui punllacunapi ñitcachishpalla causajcunata, millaita rurachijcunataca paipaj angelcunata cachashpa tandachichishpami, 42nina rupacun hornopi shitanga. Chaipica jatunta huacana, quirucuna canirinami canga. 43Ashtahuanpish cashcata rurajcunaca, paicunapaj Yaya mandacunpimi inti shina achij nicungacuna. Maijanpish uyanapaj rinrinta charijca uyaichigari.
Pacashca cullquimanta Jesús parlashcami
44Allpapi pacashca cullquita shuj runa japishpaca, cushicushpami chaillapitaj pacashpa saquishpa tucui charishcacunata c'atushpa chai allpataca randin. Jahua pachamanta mandacunca chai shinami.
Sumaj valij perlami
45Jahua pachamanta mandacunca alli perlacunata mashcashpa randishpa, c'atushpa purij runa shinapishmi. 46Tucuimanta yalli alli perlata ricushpaca, paipaj tucui charishcacunata c'atushpami chai perlataca randin.
Linchimanta yuyachishpa parlashcami
47Jahua pachamanta mandacunca linchita mama cuchapi shitajpi, tucui laya chalhuacunata tandamuj shinami. 48Linchipi ña junda cajpica, cucha uriman llujshichishpa tiyarishpami allicunataca canastapi churan, mana allicunataca shitancuna. 49Cai shina causai tucuripipish chashnallatajmi canga. Chaipica angelcuna llujshishpami millaita rurajcunataca, cashcata rurajcunamanta ch'icanyachingacuna. 50Millaicunataca nina rupacun hornopimi shitanga. Chaipica jatunta huacana, quirucuna canirinami canga– nircami.
Mushujtapish maucatapish llujshichij shinami canga nishcami
51Chai q'uipami Jesusca:
–Cai tucui yachachishcacunataca ¿allichu entendircanguichij?– nijpi paicunaca:
–Ari, amito– nircacuna.
52Shina nijpi Jesusca:
–Mandashcacunata yachachijcuna, jahua pachamanta mandacujpi yachacuj tucushpaca, shuj huasiyuj yaya paipaj sumaj charinacunata mushujtapish, maucatapish llujshichij shinami cangacuna– nircami.
Jesusca paipaj llajta Nazaretpi huillashcami
(Mr 6.1-6; Lc 4.16-30)
53Yuyachij parlocunata tucui parlashca q'uipaca Jesusca chaimantaca rircallami. 54Paipaj quiquin llajtaman shamushpami, chai llajtapi cajcunapaj sinagogacunapi yachachirca. Pai yachachishcamanta chai llajtapi causajcuna mancharinacushpaca:
–¿Caica, maipishi cai shina yachaitaca yachamun? ¿Ima shinashi cai milagrocunatapish ruran? 55¿Manachu caica carpinteropaj churilla? ¿Manachu paipaj mamapish María? ¿Manachu huauquicunapish Jacobo, José, Simón, Judas? 56¿Manachu tucui paipaj panicunapish ñucanchij causan llajtallapitaj causancuna? Paica ¿maimantataj cai tucuicunataca llujshichinchu ímami?– ninacurcacunami.
57Paicuna mana crisha nijpimi Jesusca:
–Maijan profetatapish shujtaj llajtapica allimi chasquin. Ashtahuanpish quiquin llajtapi cajcuna, quiquin huasipi cajcunaca mana alli nincunachu– nircami.
58Jesusca paita mana crijpimi, paipaj llajtapica mana achca milagrocunata rurarca.
Currently Selected:
MATEO 13: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.